7年情開花 鍾嘉欣嫁硬伍允龍

2014年剛好入行10年的鍾嘉欣,一直保持清純形象,更成為首個被討論區巴打封為「BB」的女藝人。嘉欣BB入行多年,鮮有緋聞傳出,除了拍攝《溏心風暴》傳出撻著林峯,及早前因為坐陳展鵬順風車遇上車禍外,多年來就只有一個伍允龍,而且一傳就傳足七年。據了解,嘉欣BB與伍允龍這七年來雖然有過離離合合,但二人始終走在一起。3週刊收到可靠消息,指二人已去到談婚論嫁的階段,雙方更已成功拜見對方家長,欠的只是嘉欣BB一句「Yes, I do!」而已。

近年鍾嘉欣事業一帆風順,穩坐當家花旦之位,只可惜這位當家花旦卻與獎無緣,去年《萬千星輝頒獎典禮》本是「視后」大熱門之一,但最終仍敗在田蕊妮手上。相比之下,伍允龍雖然仍在努力向上的階段,但事業開始露曙光,近日他首次擔正的電影《惡戰》上畫,口碑票房都理想,拉近二人事業上的距離,令二人更加打風都打唔甩。

3週刊 第746期:7年情開花 陳展鵬冇行 鍾嘉欣嫁硬伍允龍

罕有談婚姻

雖然鍾嘉欣與伍允龍傳足七年緋聞,但二人一直沒有承認情侶關係,可見二人對公開戀情頗為忌諱,但隨住二人感情越來越穩定,日前鍾嘉欣就罕有地在自己微博公開為男友主演的電影落力宣傳,日前出席擔任代言的美容公司晚宴時,更大談自己的結婚大計,揚言timing就會結,她又大方承認有看男友新戲,明顯有意逐步將戀情浮面。

「其實自己一直都希望35歲前可以生小朋友,唔會因為怕身材走樣而唔生,但我一定要先結婚,只係依家未有計劃結婚,總之雙方有共識要結婚就會結。佢(指伍允龍)套新戲《惡戰》我都有去睇,(係咪係想高調公開戀情?)任何一個朋友有高質素嘅製作我都會支持,佢拍得好辛苦,咁短時間創造一個神,真心戥佢開心有呢套作品……最希望梗係可以同佢一齊睇。」雖然仍然沒有承認情侶關係,但至少嘉欣BB已踏出一大步。

打風打唔甩

其實鍾嘉欣入行多年一直緋聞不多,就算早前拍《溏心風暴》時傳出與林峯撻著,又曾傳出與陳展鵬因為合作《巨輪》拍出愛火花,嘉欣更因為坐陳展鵬順風車而傳出緋聞,但全都是流料。據了解,林峯當年拍《溏》劇時的確對嘉欣有feel,亦有人推波助瀾想塑造二人為情侶檔齊齊搵真銀,然而嘉欣一直對煲水緋聞表現抗拒,對林峯更只有朋友及同事的感覺;至於與陳展鵬的緋聞,二人在《巨輪》中非常入戲,再加上「炒車事件」令二人關係相當可疑,但其實嘉欣始終對伍允龍一條心,陳展鵬如何發功亦插不入這段「嘉龍戀」。

「Philip(伍允龍)同嘉欣不嬲都好好,兩個都好保護同好錫對方,朋友圈個個都清楚,只係佢哋好少帶另一半去朋友gathering,因為嘉欣拍劇好忙,Philip本身又忙,又要做幕後、又要教拳,只不過出面人唔知。早排傳分手都係耍吓花槍啫,佢兩個真係好夾,如無意外就一定係順住結婚條路行,Philip一直都儲緊錢,佢係個好有擔當嘅人,一直都想事業再好先啲娶老婆,不過如果嘉欣肯嘅話,佢隨時ready。嘉欣都係一個好鍾意家庭嘅女人,又乖又想結婚生仔。」一名熟悉二人的友人表示。

視后中空寶

鍾嘉欣已不是十八、廿二,早已到了適婚年齡,加上她形象健康,就算結婚亦一樣無損她的「BB」地位,只是她與TVB仍有好幾年合約,結婚一事仍需要看TVB態度如何,如果她一意孤行的話,隨時浪費在TVB多年的努力成果。

「嘉欣都冇諗住咁快結婚,始終佢同TVB仲有幾年合約。之前台慶頒獎禮佢呼聲咁高,個個都睇好佢做視后,成班朋友都好想佢,佢都覺得自己有機會,點知最後都係中空寶,點會唔失望!同埋呢件事都令佢有啲啟發,事業係佢自己最大嘅成就,定係搵個錫自己嘅好老公?所以佢開始考慮結婚,陳茵媺結埋婚生埋仔咪又係繼續做,對事業完全冇影響,依家啲fans都唔同以前啦。」好友繼續表示。

伍允龍:我係負責任男人

對於有意迎娶女友,日前伍允龍出席處男擔正主演的《惡戰》首映時,本刊記者問到有傳他與嘉欣籌備結婚,雖然仍然堅持拒絕公開女友身分,但他全程嗒晒糖笑到見牙唔見眼。

伍:伍允龍 3:3週刊

3:依家「升呢」做男主角,會唔會諗吓自己嘅終身大事呢?

伍:我係一個負責任嘅男人,對自己愛嘅女人一定負起應該嘅責任。

3:咁你今年係咪會同嘉欣結婚先?

伍(成個樣):我同邊個結婚不嬲都唔會講啦,因為我某程度要保持私隱,一個藝人咩都奉獻晒俾你哋,連喊呀、笑呀,乜嘢樣都俾晒你哋睇,所以私人嘢要保持私隱。

3:咁即係認定嘉欣係終生伴侶?

伍:呢啲嘢我唔會透露啦,多謝關心。

雖然伍允龍始終留口,不肯承認嘉欣BB的女友身分,但他的樣已經出賣了他,只是套用中國人俚語:「畫公仔唔使畫到出腸」!

聽教聽話無繼續捧

鍾嘉欣早前雖然是視后大熱人馬,不過她就與視后寶座無緣,敗給田蕊妮。雖然未能成功奪后,但鍾嘉欣聽教聽話少緋聞,所以在2014年依然被力捧,未出街的新劇有她連爆破場面也親身上陣,拍得辛苦的《飛虎II》、《大藥坊》、還有TVB製作的微電影《愛情來的時候》,工作不斷。

《惡戰》由頭打到尾

由伍允龍、安志杰主演的《惡戰》,是民初英雄片,片中伍允龍飾演馬永貞,跟安志杰挑戰惡勢力,由頭打到尾,親身上陣拳拳到肉。《惡戰》故事以民初為背景,講述馬永貞到上海當碼頭工人,遇上龍七(安志杰飾)成為好友。龍七與斧頭幫三大犯罪頭子為敵,馬永貞與他聯手反毒,令三人懷恨於心,加以陷害。龍七慘遭暗算外,馬永貞的鄰居鐵菊亦被斧頭幫擄走。馬永貞為救鐵菊,單人匹馬闖入斧頭幫老巢,決定用雙手消滅社會敗類,為民除害。

鍾嘉欣旺夫不旺己

伍允龍和鍾嘉欣拍拖多年,已到談婚論嫁的階段,問到玄學家林炳南師傅兩人命格是否配對時,林師傅表示:「鍾嘉欣馬年犯太歲,但結婚可以沖喜。其實佢命格適合結婚,但因為鼻樑有折,影響婚姻。鼻代表夫宮,所以佢唔適合早婚,最好36歲後結婚。而伍允龍就行緊運,佢命格有女人緣,結婚的話鍾嘉欣會旺佢事業,不過鍾嘉欣只係旺夫,唔旺自己。」