娛樂圈一向予人勢利的印象，甚少有真友情出現，但凡事總有例外，就像榮升「電視城第一筍盤」、過了2月生日就40歲的馬國明，自從年前與「范根」張穎康合作《回到三國》後，隨即成為好友。早前張穎康與太太麥雅緻宣佈造人成功，仍然單身的馬國明就比二人更加興奮，據知一向喜愛小朋友的馬國明，考慮無論是誕下的是「馬仔」或「馬女」，他都要做「契爺」，早前他就襯未開劇有空檔時間，與張穎康兩公婆齊齊到尖沙咀玩具反斗城買禮物，馬國明更即場豪花2千元買下可作無線監察BB的webcam作為禮物，實行父母、契爺齊齊睇實BB！

自從與胡定欣因了解而分開後，已升為「電視城第一筍盤」的馬國明，身邊仍未有女友出現，曾多次表示自己喜愛小朋友的他，雖然未有合適對象為他開枝散葉，不過他卻不愁寂寞，因為他早已看中「好兄弟」張穎康的「馬B」，實行馬年馬明做契爺的大計。

專攻嬰兒用品

早前發現早前憑《貓屎媽媽》的「范法」而人氣急升的張穎康與「港姐太太」麥雅緻，在尖沙咀海運大廈出現。由於二人即將榮升「馬年父母」，因此當日二人主攻專門售賣嬰兒用品的商店瀏覽，二人由BB床到日用品再到嬰兒玩具都不放過。其間張穎康見到BB床有「BB公仔」時，更即時父愛爆棚，將公仔當作小孩般模擬實習，反而同樣初為人母的麥雅緻就表現淡定得多，一副只要老公陪在左右就心滿意足的樣子。

馬國明送厚禮

大約一小時後，只見張穎康兩公婆在一間大型的玩具連鎖店門外等候，約五分鐘後就見到馬國明出現，一行三人齊齊走入商店內瀏覽，只見馬國明與張穎康二人一直雞啄唔斷，而麥雅緻就不時望向兩人微笑。之後三人一直邊行邊瀏覽，直至走到一個可以利用手機app上網觀看BB的網絡鏡頭時，馬國明即時拉住二人密密斟。大約十分鐘後，馬明就拿住鏡頭的吉盒到收銀處結帳，盛惠2千大元。之後二人離開商店時發現有記者在場，記者上前訪問，三人亦大方停下來接受訪問。

馬：馬國明　張：張穎康　麥：麥雅緻

記：咁得閒三個人一齊出行街掃貨？

張：係呀，佢話（指馬國明）見未開劇，咪約我出話買禮物俾BB，驚遲開劇就唔得閒買喎。

記：聽聞你想做同張穎康BB上契喎？

馬：……睇到時點先啦，今日係見得閒想買定禮物俾BB，我驚第時等到我得閒先買，佢隨時讀緊小學喇，同埋上契唔係話講就得，我驚到時大家冇時間，一年都見唔到一次，咁呢契爺要唔要都算把啦。

記：幾時自己生返個先？

馬：有得結婚就應該會生，我一向都鍾意小朋友，但講咩都冇用啦，女朋友都未有……

麥：係你眼角高。

記：如果馬明要上契，你又點睇呢？

張：求之不得啦梗係，有馬明做契爺喎，我年終都應該慳唔少，有咩搵契爺搞掂啦，哈哈……講笑，講真如果佢肯我當然ok啦，不過重係言之尚早，係仔係女都未知，6月先係預產期，生到時大家再傾啦。

馬：係啦係啦，到時先算啦，不過我知佢第一次做爸爸媽媽好緊張，所以見到呢個webcam就知道佢一定用，可以無時無刻睇實BB嘛，咦……咁我有時間都可以睇埋一份喎，哈哈！