林峯接劇先斬後奏 組公司撬徐子珊楊怡

繼早前不續約英皇唱片及即將於今年3、4月約滿無的林峯,已經擺到明唔想留低,之前重放晒風表示未傾新約。有傳黃百鳴想將他收歸旗下同女友吳千語情侶檔搵銀,而Paco的太陽娛樂又向他招手,但3週刊收到消息,林峯已決定投資千萬搞經理人公司,涉足電視、電影和廣告製作,在內地大搞個人工作室!據知林峯在失落視帝之後,已無心留戀TVB,所以hea得就hea住做。其實表面掛住拍拖懶懶閒的林峯,早已有晒全盤計劃,今年他拍完TVB手頭上的最後一套劇集之後,他已先斬後奏落實在中年與周秀娜合拍內地電視劇,實行減產唔減糧,還有意招攬徐子珊及楊怡過檔,齊齊在內地狂搵人仔,肥水不流別人田。

3週刊 第752期:林峯接劇先斬後奏 組公司撬徐子珊楊怡

上個月當盛傳林峯對自組公司一事,他雖沒親口承認,卻表示開公司會收穫多些,同時他亦說:「如果齋講打工,我一定只會考慮 TVB,因為我只打過 TVB一份工。」語帶雙關。

無綫最得寵的「親生仔」林峯,雖然一直受公司力捧,但前年失落視帝,最終敗在黎耀祥手上之後,萌生離心的他便揚言考慮退出娛圈返家幫有「廈門李嘉誠」之稱的爸爸打理生意,及後與千語BB高調拍拖,不理公司反對公開戀情。

舖排伏線

工作方面,向來千依百順的他一意孤行接拍nowTV有份投資、無綫前監製梅小青製作的劇集《大漢賢后衛子夫》,客串黃百鳴賀歲片《六福喜事》更是先斬後奏,對無綫、高層樂易玲可謂完全冇面畀,其實林峯做這些事都只為舖排伏線,而滿約一事已經逼在眉睫,他的大計已經全面展開。上星期林峯出席《使徒行者》記者會,相信是約滿前還清劇債的最後一部。

自組娛樂公司

雖然林峯表示即將只會一年拍一部劇集,外面工作現時亦是由公司替他安排,但據收到可靠消息指他已經開展個人工作室。林峯向友人透露,自己反正再過幾年,都要返屋企幫手,與其俾人抽佣,索性自己千萬自組經理人公司,以現時在內地拍劇40萬元一集的身價,加上有爸爸的大水喉射住,確有足夠資金同人氣自組娛樂公司,而頭炮工作就是落實在年中與周秀娜合拍內地愛情電視劇。

而有傳跟隨他十多年的經理人Candy亦會跟林峯過檔,和屬同一經理人的徐子珊及楊怡,亦有意招攬她們拍內地劇搵人仔,難怪即將約滿的楊怡遲遲未肯續約。