王心慰下令喪改劇本 黃秋生回巢TVB大陣仗

近年TVB大鬧小生荒,因此不時打外援主義,就像去年由吳鎮宇及張智霖重飛的《衝上雲霄II》就贏盡收視口碑,TVB有見及此,決定再落重本力邀外援返娘家拍劇,而率先落實5月回巢拍劇的就有影帝級的黃秋生。據知是次秋生回巢助陣,主要是為了報監製王心慰當年在亞視時期的知遇之恩,只是報恩還報恩,秋生答應回巢的同時,亦表明開拍前一定要齊劇本,等秋生過目後感到滿意才正式開拍,由於秋生出名要求高,因此近日有傳王心慰已開始向眾編劇施壓,劇本更一改再改,令TVB一眾編劇叫苦連天。

貴為影帝級的黃秋生,一向出名工作認真,遇上問題就連老闆亦冇面俾,因此是次秋生回歸拍劇,對觀眾來說絕對是喜事,但對TVB一眾編劇來說,卻是一場世紀大災難。

3週刊 第755期:王心慰下令喪改劇本 黃秋生回巢TVB大陣仗

王心慰出面即OK

據了解,是次秋生首肯回歸TVB拍劇,其「老死」曾志偉固然出力不少,但真正叫秋生心動的,是在亞視時期有「知遇之恩」的王心慰亦有出面做說客,令秋生最後「推無可推」。

「秋生當年喺亞視時候,幾乎係冇監製肯用佢,唔好話主角,連閒角都唔想用,搞到當年秋生日日望有工開,係王心慰別具慧眼,夠膽用秋生,84年Amy姐(王心慰)幫亞視監製第一套電視劇《王昭君》就已經有秋生演出,之後Amy姐大部分亞視劇集都有預秋生,所以秋生一直都當Amy姐係恩人,咁多年都放喺心入面,所以今次Amy姐出面,秋生亦冇得再推,即時應承。」知情人事表示。

出齊劇本先肯拍

雖然王心慰對秋生有知遇之恩,雖然秋生對新劇例如對手、故事背景等等沒有太多特別要求,但亦沒有降低他對劇集的要求,就是開拍前一定要齊劇本給他過目,待他看過後覺得滿意才正式開拍,由於劇集是硬橋硬馬的民初功夫劇,因此王心慰除了對動作場面要求嚴格之外,對劇本更非常緊張,加重編劇組的壓力。

「本來之前有傳秋生會搵演藝學院班學弟幫手編劇,但後來不了了之,好似話係Amy姐唔係太想,覺得咁樣會令TVB班編劇好冇面,所以最後都係交俾班編劇自己創作,不過有傳班編劇雖說已經好用心去創作,但最後都係過唔到Amy姐嗰關,好多次都係Amy姐睇完話要改,改完睇完又改,搞到班編劇牙痛咁聲,但都唔怪得Amy姐,話晒係佢出面搵秋生回巢,點都唔衰得,所以特別緊張。

黃秋生:「去茶餐廳食,冇可能要求五星級酒店水準!」

對於劇本改完又改一事,落實有份演出的敖嘉年表示沒有聽聞過,只表示仍未有劇本到手,「我淨係知道套劇係Amy姐監製,同秋生有份演,好似話5月會開,不過就咩都未收到。不過時間上就應該趕得切,好多時都係開拍前兩星期先收到天書,同埋上監製房傾故仔。今次第一次同秋生合作,大家都係大聖劈卦,輩份上佢係我師叔,都唔會好緊張,反而好期待同佢合作。」

至於即將回巢拍劇的秋生,在電話中表示只是初步傾過故事背景,而他亦要6、7月才有期為TVB開工。

秋:黃秋生 記:3週刊

記:秋生哥,係咪5月返TVB拍劇呢?

秋:5月我仲演緊舞台劇,所以應該6、7月先開。

記:收到劇本未呀?

秋:未喎,只係好初步咁傾過故事背景,民初時期,有得打吓咁啦。

記:有冇聽過Amy姐今次對劇本要求好嚴,係咁叫班編劇喪改,改到好為止?

秋:冇聽過喎,劇本由得TVB班編劇搞啦,總之最好就係齊劇本先開工啦。冇話特別要求高,冇理由去茶餐廳食嘢但要求五星級大酒店水準,又唔係第一次拍電視劇,總之劇本我唔理喇,都冇時間理啦!

記:會唔會到時改劇本?

秋:嗱……大家就係唔識分改劇本同順劇本嘅分別,我一個人點改劇本呀,一改咪成部劇改晒,我只係會順劇本,即係執吓啲對白執順佢咁囉!」

私生子變影帝

1961年出生的黃秋生,是中英混血兒,亦是一名英籍高官的私生子,秋生本名Anthony Perry,但因為四歲時父親拋妻棄子,自此秋生與母親相依為命,改跟母親姓黃。少時候秋生家庭貧困,秋生曾從事過多種職業,例如辦公室助理、汽車維修學徒、裝修工人等等,直至82年報讀亞洲電視演員訓練班而加入娛樂圈。由於中英混血兒的關係,在亞視初期不太獲得重用,直至王心慰大膽起用後,他才演出機會大增。85年秋生自行報讀演藝表現系深造一年,成為演藝首屆畢業生。88年秋生過檔TVB,曾演出不少劇集例如《他來自江湖》、《天若有情》等等。91年秋生轉戰電影圈,94年憑《八仙飯店之人肉叉燒包》首奪香港電影金像獎「最佳男主角」,但之後卻因為「做影帝三年冇運行」,為了維持生計而不停濫拍,被封為「爛片影帝」。不過秋生一直被視為好戲之人,多年來先後奪過不少電影獎項,包括憑《八仙飯店》及《野獸刑警》成為影帝,憑《無間道》奪得香港金像獎及金馬獎「最佳男配角」等等。