近日一名TVB前PA（助理編導）化名「偽文豪」出書，大數07年在TVB擔任PA期間的辛酸史，迅即成為全城熱話，有曾經在TVB做過PA的前同事力撐，亦引來不少藝人猛烈批評，就連TVB亦罕有地連續兩集《東張西望》作出還擊，為公司辯護。日前3週刊找來偽文豪接受訪問，道出不為人知的辛酸史外，3週刊還找來另一位不願開名的前PA，大爆電視城內藝人各式各樣的古怪行為。
本週一偽文豪的新書《TVB血淚屎》正式推出，據知暫時銷情理想，得到不少讀者支持。上週六（12日），3週刊透過出版商相約偽文豪接受訪問，期間他再細談在TVB中的辛酸史，及一些他或舊同事在電視城內的「奇遇」。
純屬分享
眼前的偽文豪仍是一貫的斯文淡定，對於出書細數在TVB期間的辛酸史，偽文豪再次強調他不是與TVB有仇，相反他非常感激在TVB工作的七個月期間，令他學到很多東西，只是愛之越深亦恨之越切。「好多人都以為我好憎TVB或者書入面嘅藝人，好似林峯、吳卓羲等等，但其實唔係，我只係想分享我嘅所見所聞，或者大家可以當一本小說好似一個頑童歷險記咁睇，只不過劇情唔係我憑空創作，而係我嘅親身經歷。」
明星效應
對於大爆藝人不為人知的一面，甚至是負面形象的軼事，偽文豪坦言只是為了讓新書有更大的吸引力，絕不是針對某幾位藝人，如此大迴響，只是傳媒集中去報道兩位小生而已。「首先我要講TVB入面大部分幕後同事，或者幕前藝員都對我哋好好，就算我話林峯爛口，但我都有讚佢呀，有幾多個男人唔講粗口？我自己都講啦，唔係咩大事件，至於吳卓羲……我相信大部分工作過嘅TVB人，都好清楚佢為係點，佢見到高層一個樣，對我哋又另一個樣，我真係不敢恭維，我只係將自己親眼見到嘅事講出嚟。我都有讚藝人，好似馬國明就對我哋好好，唔會見高拜見低就踩！
我知道早一兩日TVB搵佢兩個藝人訪問澄清，我覺得好好笑，吳卓羲連點回應都未識，淨係識講自己有幾錫幕後工作人員，有冇人會信佢吖？如果我係佢，我就會咁答：『咁多年前嘅事我真係唔記得喇，或者當年我真係年少氣盛，不過我依家改咗好多，對其他人都好好。』咁咪夠得體囉！至於TVB搵其他藝人回應又係搞笑，你一係就搵參演過《少年四大名捕》嘅工作人員或者藝人回應，如果全部都企出嚟話佢哋冇講過粗口，咁你TVB咪型囉，你依家搵啲冇參與過拍攝嘅藝人回應，可信度有幾高，大家可以自己去研究啦。」
火爆導演
偽文豪說他在TVB工作七個月期間，見盡不少前輩或同事的辛酸，有工作了六、七年的同事仍然是PA，晉升機會仍然是零，有工作了多年的同事，都說TVB上市前是一間人情味濃的大公司，但近年已經變成只顧賺錢的機構。這段期間他聽了不少同事說過的藝人往事，例如汪明荃表面上是一個惡死的前輩，但其實他對PA態度非常好，但如遇上了做錯事的PA，阿姐亦一樣大公無私照鬧無誤；至於之前曾經因為教一名女演員做戲而動手動腳的導演，偽文豪說他在電視城內出名是「雙面人」，不用工作的時候與很多人都是有說有笑，但當正式埋位後，他就即時判若兩人，又火爆又急進，就像傳他早前當眾鬧阿佘，就絕對是真有其事，不少台前幕後都很怕跟他合作。
用行動宣洩不滿
其實TVB這麼多年，除了不少幕後工作人員感到不受重視外，就連幕前的藝人都曾因為不滿而發聲，甚至以行動來表達不滿。當中以萬梓良的「血衣事件」最為轟動。
1991年萬梓良拍攝《大家族》時，因為不滿當時廠期太緊，拍攝時間不足夠而令藝人長期不夠時間休息，一日他在身上的T-shirt寫上「乞求雞毛司令賜廠期」在仍是廣播道的電視城巡遊，「血衣事件」哄動全城。至於另一位同樣火爆聞名的黃日華，2010年在「三哥」苗僑偉安排下重返TVB，齊齊合作《刑警》，劇集收視口碑皆報捷，但同年黃日華卻沒有獲邀出席台慶，對此黃日華感到不受重視，在微博狂插無「強姦民意」，更寫上「Totally Very Bad」來揶揄「TVB」。
落閘迫續約
至於近年已北上發展的陳鍵鋒，去年接受傳媒訪問時，就大爆當年與TVB傾合約，除了不讓經理人陪同外，又實行極度困獸鬥的環境下迫令簽約，最後陳鍵鋒決定離開北上發展，而已過檔「港視」的劉玉翠，亦說當年TVB就迫令她放無薪假兩個月來當還騷，12個月糧變成14個月出。而當中最為人津津樂道的，是一名自稱是TVB前經理「盧智仁」，在微博爆料，指TVB多年來先後在內部不同的地方裝上攝錄機，來監控員工的一舉一動，他甚至拍下一條短片上載上網，當中人士包括方逸華及已過身的邵逸夫，轟動一時。
出位五藝人
「易暈」 片場溝新女搵PA開刀
曾經有名有勢的「易暈」，近年聲勢已大不如前，角色亦大多是行行企企，但「易暈」好色之心照舊，最愛就是喪溝新人，又經常借PA來凸出自己的身分。
「呢個「易暈」可以話係將軍澳色魔，佢真係見到邊個靚就想追邊個，唔少女新人都俾佢抽過水，佢最衰就係成日老點PA幫佢做嘢，好似有一次佢睇中一個藝訓班女同學，佢就好有心咁向個女同學噓寒問暖，之後又當住個女同學面前呼喝一個PA，唔係拎紙巾就係話要斟水，搞到個PA俾導演鬧，之後「易暈」仲唔認有老點過PA做嘢，又懶正義咁叫個PA後生仔唔好走精面偷懶，激到個PA生蝦咁跳。」
「嚴肅老師」 化妝間「哦」足兩個鐘
在電視城出名工作認真，遇上不平事一定會出聲的「嚴肅老師」，不少台前幕後都很怕跟他合作，因為只要行錯一步，那管是大步或是小步，都一定會被他「照肺」，小則半小時，長則兩小時亦試過。
「佢（「嚴肅老師」）最鍾意就係教人、哦人，試過有一次有個PA俾錯件唔連戲嘅戲服佢，「嚴肅老師」就捉住個PA喺化妝間係咁哦，連導演話要埋位都唔理，叫導演跳拍其他演員部分先，佢就足足哦咗個PA兩個鐘，真係慘過返學俾Miss罰留堂！」
「煙剷」 錄影廠後巷煲煙反投訴
小生「煙剷」雖然外型正氣，但其實非常自私又自大，成日以為自己係當家小生就完全唔理別人感受。
「電視城入面係人都知「煙剷」煙不離手，佢最鍾意就係趁有幾分鐘空檔食煙，由於出廠食又麻煩又聽唔到廠入面叫自己，所以佢就最鍾意去錄影廠後巷食煙，但由於後巷好多木佈景板，所以TVB一早已經下令唔可以喺後巷食煙，但「煙剷」就一於少理，有一次佢俾保安哥哥發現，保安好聲好氣叫佢唔好食，「煙剷」就即時發爛渣係咁爆粗鬧保安，最後嘈到幾乎動武，好彩導演及時趕到先至冇事。可憐「煙剷」有人撐腰當然冇事，個保安就俾人鬧到狗血淋頭，聽講第二日個保安就自己辭職唔撈。」
「美人公主」 冇泊車證發保安脾氣
一向形象已經唔係好健康的「美人公主」，外表清純溫柔，但其實不知幾潑辣，遇上不如意事就最愛玩投訴，有傳曾經有一位保安哥哥無啦啦俾人問候家人。
「有一日「美人公主」車返電視城，佢換咗新車唔記得將電視城泊車證貼車頭玻璃，保安哥哥唔俾佢入，點知佢就發脾氣狂爆粗係咁鬧，一時問佢知唔知自己係邊個，一時又問佢依家遲入廠，成crew人等緊佢埋位，條數點計！最後嘈到上寫字樓，要外事部高層幫佢同保安阿頭講，先至開閘俾佢入。」
「光頭」 最愛取笑幕後娛人娛己
形象一向開心果的「光頭」，拍劇固然搞笑，但私底下亦愛講笑，更愛將別人的秘事當笑話取笑，將自己的快樂建築在別人身上。
「「光頭」係好鍾意講笑，但佢唔識得分輕重，而且佢最鍾意是非當笑話，成日拎人哋唔想提嘅事當笑話咁講，非常乞人憎。話說有個道具個囝囝要入醫院割包皮，道具好擔心就四圍問人會唔會有事，點知件事傳咗入「光頭」耳中，之後「光頭」喺餐廳撞到道具，就大大聲咁問道具：「喂……你個仔割咗包皮未呀？有冇叫醫生打包返屋企呀……第時唔夠用可以駁長佢喎……哈哈！」搞到道具非常尷尬。
藝人唔撐
偽文豪出書狂數TVB，不少曾經工作過TVB的舊同事都紛紛力撐，不過對於藝人來說，就似乎不表認同，不少更表示PA雖然工作辛苦，但有錯就要認。
馬國明
「其實PA係辛苦，但都學到好多，自己好多時都會體諒，偶然錯一、兩次當然可以接受，但對於有經常錯完又錯，自己都會出聲鬧，但唔會去到講粗口。偽文豪話我對細好好其實我對邊個都係咁，都係做返自己啦。」
曹永廉
「依家做PA已經好好，以前PA做錯事，導演真係控制室開咪爆粗狂鬧，依家就冇再見到啦。有時PA真係錯得好離譜自己都會鬧，好似道具又錯、時間又錯，我都知佢多做，所以真係錯得好離譜或成日都錯，自己先會開聲鬧。」
吳卓羲
「呢件事我冇唔開心，只係覺得好好笑，唔想再幫呢位仁兄宣傳喇，當年拍《少年四大名捕》拍三個幾月，我對佢冇咩印象，亦唔知道佢係邊個。我自問好錫梳頭、化妝工作人員，我自問問心無愧，咁粗口自己都會講，但唔會講粗口鬧人囉！」
王晶
「一個只係做七個幾月PA，出書批評呢個個，未夠資格囉，呢種行為係唔值得鼓勵，陳志雲作為傳媒機構高層竟然幫佢寫序，就更加離譜。如果佢係講我，我實告佢誹謗，做得幾個月助導，成個運作都未了解就學人爆料，幾時輪得到佢！」