今年24歲的「邦民女」陳嘉寶(Anjaylia)去年終於完成學業，正式投身社會入演藝界。剛畢業之後，Anjaylia已經成功轉型，由模特兒晉升做演員，入選接拍TVB電視劇《女人俱樂部》，戲中飾演李若彤少女版，她表示演員才是她入行的夢想，坦言今次為此劇奉獻好多個的「第一次」及禁例，她直說：「第一次在電視跳舞、第一次著泳裝見人，仲獻埋熒幕初吻！」

由18歲入模特兒界，憑清純外表的陳嘉寶深得宅男歡心，廣告「邦民女」形象更成為她的標記，早前更連續第5年為「邦民財務」代言。去年她終於剪掉多年的齊蔭長髮，目的是為走入公仔箱初嘗拍劇滋味。

早前陳嘉寶出席劇集《女人俱樂部》首播飯局，她坦言心情緊張：「呢部係我第一部劇，毛姐教咗我好多，會話俾我哋聽可以用唔同演法去表達，作為新人呢個機會好難得，好開心可以拍呢個劇。」被問到拍劇的難忘事，Anjaylia笑言拍此劇她犧牲了很多的第一次，直說：「第一次喺電視跳舞、第一次電視著泳裝現人，仲獻埋螢幕初吻俾『少年版吳啟華』何廣沛，而且我入行咁耐，都未著過泳衣，之前做模特兒嗰時屋企人好反對，唔俾我性感，佢哋講笑咁話潛水衣都可以考慮，但今次劇情需要上游水堂，所以問過媽咪都ok，所以就第一次著泳衣見人。」

去年陳嘉寶在活動上自爆終一嘗初戀滋味，而且入行亦得到男友鼓勵與支持，她將男友稱呼為「E先生」，Anjaylia表示「E先生」比自己年長逾8年，但並不介意，甜笑說：「我第一次拍拖，甚麼也不懂，亦不懂煮飯，但他非常體貼，而且送花送得很密。」Anjaylia指即將會為TVB拍一個關於行山的節目，並會擔任主持：「我鍾意演戲多啲，但都希望有機會多啲嘗試唔同嘅嘢，吸收唔同嘅經驗。」

Profile

陳嘉寶 (Anjaylia)
年齡：24歲
身高：163cm
三圍：32B-23-34