戲真情假 黃宗澤胡定欣 愛恨交纏

2012年7月,胡杏兒突然在電台節目中承認與黃宗澤已正式分手,8年情宣布玩完,全城嘩然。雖然二人多次對外表示分手亦是朋友,但二人分手後多次在TVB活動同場出現,每次都是近距離零交流,連合照亦不願意。

據了解,自從黃宗澤與胡杏兒分手後,杏兒不少好友都站在杏兒立場,從而敵視黃宗澤,當中以杏兒多年「同姓好友」胡定欣反應最激烈,多次私底下在同事面前狂數黃宗澤「負心漢」,令二人面和心不和。

早前黃宗澤與胡定欣在《點金勝手》再度合作,二人在劇中飾演夫妻,鏡頭前表現恩愛話咀就咀,鏡頭後二人卻如同陌路人。有傳黃宗澤與楊崢傳出姊弟戀後成為全城熱話,胡定欣更在朋友面前藐爆:「咪睇佢哋好得幾耐囉!」這句說話令黃宗澤非常不滿,二人關係正式惡化,就連日前《點》舉行記者會,一向聽教聽話的黃宗澤名義上以身在內地拍劇而未能出席,以視像會議「出席」活動,但其實是避免與胡定欣同場出現,「冇眼屎、乾淨盲」避免衝突。

黃宗澤與胡定欣曾多次合作兼識於微時,加上「雙胡」感情要好,黃宗澤與胡定欣一直都是要好朋友關係,只是因為「澤兒戀」分手收場,胡定欣覺得是男方爛玩而導致分手,令二人關係出現變化,由好友變成陌路人。

3週刊 第765期:戲真情假 黃宗澤 胡定欣 愛恨交纏

鏡頭後陌路人

據了解,早在《點金勝手》開拍時,胡定欣曾表示不欲與黃宗澤合作,但最終因為公司堅持而繼續演出,有參與幕後演出的工作人員表示,二人在片場除了埋位拍攝及對稿時才走在一起,其他時間都是各據山頭互不理睬。

「其實開工頭幾日大家已經發覺唔太對路,佢兩個都係大細路,以前由未埋位玩到埋位,拍完又再玩過,但o依家兩個人就好似唔識咁,不過佢兩個都好專業,一埋位真係交足戲,似足兩公婆,不過導演一嗌cut,兩個就一東一西咁彈開,係人都睇得出佢兩個有心病啦。」工作人員表示。

罕有缺席宣傳

一向重視自己作品的黃宗澤,每次有劇集出都會盡力配合宣傳,即使身在外地工作,他亦會盡量要求配合,就算早機回,晚機走都沒有所謂,但這次《點》的宣傳活動,黃宗澤卻罕有地沒有回港出席,只是第一次宣傳時以視像會議「參與」,之後再缺席兩次宣傳活動,而兩次宣傳活動胡定欣都有到場。表面理由是忙於拍攝,在上海未能抽身回港,但實情是避免與胡定欣同場出現而尷尬。

「上海飛香港兩個零鐘,有幾唔方便。聽講TVB有叫過波仔(黃宗澤)返香港,不過波仔話上面套劇好趕,請唔到假,公司點會唔知發生咩事,所以最後都唔強迫佢返香港,反正之前機票錢都預咗,所以就搵個同事上去同佢做個現場直擊,當係搞搞新意思!」知情者表示。

3週刊 第765期:戲真情假 黃宗澤 胡定欣 愛恨交纏

臭口篤正死穴

本來黃宗澤對胡定欣一直甚為忍讓,但忍讓卻未必一定可以換來太平,最終卻因為女方得寸進尺而觸及黃宗澤的「死穴」,令二人正式反目收場,男女雙方去到有你冇我的地步。

「本來胡定欣點樣單打波仔,波仔都可以當時運高,聽唔到,但自從佢同楊崢相戀搞到一鑊粥之後,就好介意有人拎呢件事做話題,點知胡定欣就係唔生性,有一次佢班同事面前講:『咪睇吓佢哋好得幾耐囉!』,最後兩個人真係分手收場,波仔就覺得有人已經過晒火位,所以決定唔會再忍,有人再唔收口亂講嘢,佢一定會還口,你睇佢今次企到咁硬唔返香港宣傳,連TVB都冇佢符,就知佢有幾唔想見某個人!」知情人士續說。

對於被傳與胡定欣反面收場,記者致電身在國內拍劇的黃宗澤,對於有關傳言,他一概否認。

記:記者  黃:黃宗澤

記:聽聞你同胡定欣反面咗喎?

黃:你邊度聽返嚟?完全冇咁嘅事,我同定欣不知幾friend。

記:有人話你同杏兒分咗手之後,胡定欣覺得係你辜負咗杏兒,所以係咁鬧爆你。

黃:哈哈……絕對冇啲咁嘅事啦。

記:咁你有冇聽過有人講過唔睇好你同楊崢戀情,仲話睇你哋好得幾耐?

黃:冇聽過……亦唔信佢會咁講。

記:你又唔返香港宣傳《點》,有傳話你就係要避胡定欣,所以唔返?

黃:唔好傻啦,我返唔返係公司安排,不過我呢邊真係趕拍,咁無理由要成組人等我一個!

記:幾時返香港宣傳?

黃:等公司安排啦,佢幫我度到期安排好又唔影響拍攝,我一定返嚟宣傳喎。

圈中好友三「胡」女

胡杏兒在圈中多年,身邊不乏好友,但當中以另外兩個同「姓」兼同「性」的胡杏兒及胡蓓蔚,就像早前記者便發現三胡趁有空檔,齊齊到九龍城打邊爐。當日連「大頭妹」胡蓓蔚的老公單立文亦有同場出現,一行四人更食至晚上11時才離開,之後才各自駕車回家。

「定欣同杏兒03年合作《衝上雲霄》時候已經好老友,之後又成日合作拍劇,加上兩個都係姓胡,覺得好親切。至於胡蓓蔚亦係因為胡杏兒之前出唱片要上勁歌金曲而認識,都係因為同姓而三分親,佢哋成日都有聚會,總之有邊日大家都冇工作在身,就一定會一齊食飯,感情比好多親姊妹重要好,所以難怪胡定欣因為緊張杏兒而搞到同波仔冇朋友做。」

3週刊 第765期:戲真情假 黃宗澤 胡定欣 愛恨交纏