上月中舉行的《勁歌金曲優秀選第一回》，多日後突然傳出謝安琪打尖綵排事件，因而觸怒正在綵排的容祖兒所屬的英皇娛樂，更引發起拉隊離場抗議事件，影響整個節目流程。事件最終令兩位當日負責綵排的導演被炒，震撼整個電視城。3週刊收到可靠消息，事件原本只是小事一樁，但卻因為綜藝科總監余詠珊處理不當，令事件火上加油，最終要TVB高層介入，怒炒兩名導演平息事件，最後更要由余詠珊出面請英皇一眾高層食飯「降火」。而事件亦令謝安琪成為TVB一眾幕後眾矢之的，私底下全面杯葛，以報兩名導演無辜被炒之仇。
上月14日舉行的《勁歌金曲優秀選第一回》雖然已曲終人散，但隨後卻傳出謝安琪打尖風波，令兩名當日負責綵排的導演最終被炒，雖然事件表面上已告一段落，但餘震卻牽涉到英皇老闆、高層吳雨及TVB一眾高層。
嬲爆拉隊離場
舉行優秀選當日，容祖兒早在中午12點左右已到達電視城進行綵排，據知當時容祖兒正與老拍檔李克勤進行綵排，原本只是數分鐘的表演，但卻因為現場導演不滿而不停綵排，直至四時左右，祖兒仍在綵排之際，卻突然被一名導演叫停，安排才剛到場的謝安琪綵排，事件令祖兒非常愕然，其助手亦即時上前了解情況，有關安排最後令祖兒等人不滿，最終將事件報回公司，由行政總裁吳雨「拍板」以容祖兒「急性腸胃炎」為由拉隊離場。最後幾經交涉下，英皇才決定留下洪卓立及泳兒領獎及表演，但二人仍然唱完即閃，未有為節目尾段亮相。事件最後是負責當日綵排的兩名導演「被炒」，以平息英皇的不滿。
輕佻回電惹禍
事件表面上看似平息，但其實餘震未了。據本刊收到可靠消息，指謝安琪打尖事件令英皇不滿後，TVB綜藝科總監余詠珊收到匯報後，即時致電英皇高層吳雨，希望可以解決事件。有知情人士表示，當時余詠珊表現輕佻及恃熟賣熟，令吳雨非常不滿，直接引發出拉隊離場的決定。
「當時余詠珊打俾吳雨，一開口就好輕佻咁同吳雨講：『大哥，好小事啫，唔使咁勞氣……既然腸胃炎，我都冇辦法嘅……』，對余詠珊嚟講就梗係小事，但對英皇嚟講就係大件事，祖兒係英皇一姐都咁樣對佢，咁其他二、三線嗰啲點算，咪踩到上心口都得。大哥（吳雨暱稱）當時已經火火哋，但都好客氣咁問余詠珊點解決，點知余詠珊一味耍大哥，大家都知當年大哥都係TVB綜藝節目阿頭，唔係話耍幾句就可以當冇事，既然大哥見唔到對家有誠意去解決事件，最後就決定拉隊離場。」
老闆親自出馬
正所謂「醜事傳千里」，祖兒被打尖事件傳到英皇老闆楊受成耳中，一向愛錫祖兒的楊受成非常震怒，隨即親自致電TVB「高高層」，包括執行董事兼集團總經理李寶安、助理總經理歐偉林等等作出投訴，由於事件驚動到高高層，余詠珊亦不敢掉以輕心，隨即再致電吳雨道歉，事件才得以降溫，但就卻堅決不讓祖兒再出席當晚的優秀選，不過英皇仍決定留下洪卓立及泳兒表演，但表明只限表演及領獎，不會留下做closing。「大哥都算俾足面TVB，祖兒就冇可能轉頭返去，所以最後都留低兩個歌手俾TVB，等佢唔使成個頒獎禮得番自己公司歌手，但就講明唔會留到最後，總之拎完獎唱完歌就走。」當晚可見，TVB安排泳兒在節目尾聲領獎及表演，但最終都是唱完即走，就算離closing只有十分鐘亦不稍作逗留。
炒人食飯賠罪
據知情人士表示，事件驚動高高層之後，余詠珊隨即被召「照肺」，更要她全力補鑊。於是翌日余詠珊隨即致電吳雨相約食飯賠罪，為表誠意更表明會將當日負責綵排的兩名導演「祭旗」以作交代。 「第二日余詠珊就即刻約大哥食飯，初時余詠珊仲話叫埋英皇老闆楊受成，但楊生一來條氣未順，二來亦唔想同無謂人應酬，所以最後都係得大哥出席。當日飯局余詠珊係咁同大哥道歉，仲話已經出信怒炒當日兩名導演，雖然大哥都話唔關兩名導演事，亦唔需要去到炒魷魚咁嚴重，但余詠珊話一定要，咁始終都係TVB內部決定，大哥都唔方便再出聲。最後大哥講明唔想再有下一次同樣事情發生，雙方關係叫做暫時冇變，不過最無辜就係兩個導演無啦啦就俾公司炒咗。」
順勢借刀殺人
對於兩名導演被「祭旗」，《勁歌金曲》監製麥鎮東就無奈地表示因為綜藝組人手過盛，所以才作出炒人決定。「只係因為我哋人手過盛……呢個係公司高層決定。」
不過3週刊收到消息指被炒的兩名導演，本身不屬於余詠珊派系，有指這次借此事順勢炒魷，之後再安排自己派系的導演空降綜藝組。
英皇與TVB的不快暫且叫做平息風波，但另一位「女主角」謝安琪卻或許未能置身事外。據當日在場的工作人員表示，謝安琪與助手大約四時才到錄影廠，但卻一到步就要求即時安排綵排，更以謝安琪需要為《快樂聯盟》最後一集開會為理由，令其中一名導演被迫作出打尖安排，只是最終事件令兩名導演被炒，加上有人揭發當日謝安琪根本未有開會安排，令一眾幕後工作人員非常忿怒，已決定私底下作出杯葛行動。
暗地杯葛寸Kay
「本來打尖都唔係咩大問題，好多歌手都會因為有工作而提出要求，大家都會盡量作出配合，只不過當日有人四點先到場，嚟到仲要大條道理話趕住去《快樂聯盟》開會，要求先綵排，點知原來有人講大話，根本就係唔想呆等，咁樣累到兩個手足冇咗份工，點講都講唔通啦。雖然係英皇拉隊先至搞到咁大件事，但又唔怪得人哋喎，俾邊個條氣都唔順喇。我知道有好多幕後工作人員都話玩杯葛，例如燈光師就專登打得佢唔靚，導演就唔會俾咁多大頭鏡頭，有收音師話佢啲收音會差啲，要佢專登返公司補錄音……唔會玩到好大嘅，但至少要佢有排煩囉！」一名工作人員表示。
余詠珊 猛料高層
現時在TVB呼風喚雨的余詠珊，任職TVB製作部非戲劇製作總監(綜藝科總監)。她曾任職於多間電子傳媒，包括TVB、香港亞洲電視、香港有線電視、壹電視等等。她於80年代加入TVB，擔任《勁歌金曲》、《歡樂今宵》等編劇。90年代轉職亞視，曾為亞視創作出多個招牌綜藝節目，如《今日睇真D》、《亞洲先生競選》、《尋找他鄉的故事》等等。
其後，余詠珊再跳槽到有線，創立全球第一條24小時播出的華語娛樂新聞台「有線娛樂新聞台」。2004年，余詠珊回巢TVB，為無綫收費電視建立無綫娛樂新聞台，打造多個娛樂新聞節目、明星訪談節目等等。不過，她於2008年再離開TVB，轉到壹傳媒為其打造台灣的電視市場，成功創辦壹電視，直到2012年再回TVB，接掌綜藝科總監一職。