袁詠儀硬絕慾 張智霖操肌 狂燥失控

早前因為「Cool魔」而人氣急升的Chilam(張智霖),一連三場的演唱會終於在紅館完滿結束。為了以最佳狀態示人,Chilam特別找來張家輝的健身教練為自己操練一身橫練肌肉,在嚴格控制飲食及不停操練下,Chilam最終以一身強勁肌肉登場,嘩爆全場!只是為了這一身肌肉,一向愛吃的Chilam犧牲了很多。據了解,一向是「好好先生」的Chilam,為了操練而「冇啖好食」,每天只進食營養高但無味的健康食物,令他脾氣變得狂躁,在演唱會期間就因為工作人員犯錯而大發脾氣,而這幾個月更要嚴守教練訓言,戒食之餘還要戒色,影響夫婦間的親密關係,難怪日前記者在中環遇見袁詠儀時黑面dry爆,要自己玩鬼臉自娛。為了演唱會,Chilam與靚靚都去得好盡。

剛順行完成一連三場的演唱會,Chilam亦宣布會放假一段日子,好好的放縱自己及共享天倫樂。只是為了這三場演唱會,他除了放棄自己最愛的火鍋之外,每天食物還要以清淡為主,令Chilam操肌操到狂躁,更因此一反常態而喪鬧工作人員,幾乎打破「好好先生」的金漆招牌。

袁詠儀硬絕慾 張智霖操肌 狂燥失控

日日食餐單

據了解,Chilam非常重視早前完成的演唱會,當演唱會日期確定之後,他就決定找曾經為張家輝操得一身「朱古力腹肌」的健身教授為自己操練,希望以最佳的狀態示人,只是這位教練出名嚴格,就連一向捱得苦的張家輝,亦曾經想過放棄,可想而知Chilam在操肌過程中確是苦不堪言。

據知,一向有做開運動的Chilam對每天勤做機械操肌沒有太多怨言,反而是在進食餐單方面才叫他想過放棄。「係人都知Chilam最鍾意就係食,平時最大樂趣就係四圍食嘢,貴又食平又食,尤其係打邊爐,佢幾乎個個月都要打幾次先安樂,但自從開始健身之後,佢幾個月都唔可以再食,日日都係跟住教練個餐單食足三餐,唔係蛋就係烚菜,肉又要係白烚,冇油冇鹽冇味,真係食到口都歪埋,總之Chilam食咁耐就呻咁耐啦!」Chilam一名友人表示。

發火不停鬧

熟悉Chilam的人都知道他是出名的「好好先生」,就算早前拍《衝上雲霄2》時遇上了PA不停出錯,他都只是在微博發言幫自己「出火」,亦未有當場喪鬧出錯的工作人員,但這次他為了演唱會,卻打破了「好好先生不鬧人」的傳統,當眾發工作人員脾氣。

「當時大家都好意外,其實只係一件好少事,好似係工作人員拎錯咗一件衫俾Chilam,點知Chilam就好似失控係咁鬧,不過就冇講粗口亦冇人身攻擊,只係當時大家見到都好愕然。其實事後Chilam都有同工作人員say sorry,話唔知點解自己會咁躁底忍唔到,被鬧嘅工作人員亦冇怪過Chilam,始終係自己做錯嘢,只不過係奇怪點解Chilam會變得咁躁。其實Chilam自從食餐單之後,食咗唔夠一個月已經好辛苦,已經成日呻自己冇啖好食。雖然個餐單係好健康,但日日咁食,一向慣咗大魚大肉嘅佢,又真係好難頂。」一名工作人員表示。

其實在演唱會期間,每一場的觀眾都期待Chilam大騷肌肉,只是當觀眾不時高呼要他除衫時,他就忍不住大呻一番:「想做死人咩?已經幾個月冇嘢好食,真係同索馬里嗰啲瀕臨死亡邊緣嘅人一樣喇……頭先見到仇人(指健身教練),真係見到都眼冤。」可見在健身期間Chilam忍得有幾辛苦。

袁詠儀硬絕慾 張智霖操肌 狂燥失控

禁慾齊黑面

那邊廂Chilam為了操肌而當眾大發雷霆,這邊廂「Chilam嫂」袁詠儀亦不能獨善其身,因為健身教練除了要求Chilam跟足餐單外,還要求這段期間Chilam要進行禁慾,就連一絲慾念都不能有,因為這段期間如果行房的話,會影響整個操肌的結果。因此這段時間「靚靚」除了不能與丈夫共享美食之外,亦不能過份親熱。

「靚靚同Chilam出名恩愛,兩公婆最鍾意就係四圍搵嘢食,又鍾意打情罵俏,morning kiss、goodnight kiss、goodbye kiss每日都一定唔少得,但教練講明要禁慾,所以所有咩kiss都要暫停,無謂kiss出火啦,所以呢段時間Chilam就係日日出去做gym,返到屋企就淨係傾吓生活碎事,連食飯都要各有各食,驚Chilam見到忍唔住偷食,佢哋完全冇晒親熱行為,幾乎要分床瞓,咁樣靚靚心情好極有限啦!但為咗老公好,佢都冇得出聲!」友人表示。

難怪日前Chilam演唱會完結之前,記者在中環發現靚靚自己一個出現,只見她在街上一邊跟朋友whatsapp一邊落樓梯,之後在路旁黑面等司機,期間又要自己扮鬼臉來娛樂自己,看來沒有老公慰藉的日子,一向集Chilam寵愛在一身的靚靚亦難逃躁爆的日子。