港姐冠軍出身的袁詠儀，天生麗質，老公是萬人迷的Cool魔張智霖，又有一個精靈活潑的囝囝張慕童，但靚靚的美滿人生原來仍有遺憾，她曾表示「有一仔一女係人生一大樂事」，恨生女的她，跟Chilam努力了幾年，肚皮仍是未有聲氣。但日前靚靚在中環食飯逛街，一向瘦底的她，瓜子臉突然變得圓潤飽滿，當天她穿上鬆身恤衫，卻仍見到小腹微微隆起，靚靚更不停撫摸肚皮，雖然穿上平底波鞋，步履仍舊小心翼翼，準媽媽的特徵甚為明顯。
Chilam本應在拍攝電影《衝上雲霄》後，即接拍跟周秀娜合作的《風月俏佳人》，明年再拍跟佘詩曼合作的《十月初五的月光》，Chilam知悉靚靚有喜後，即主動要求先拍《十》片，而《風》片則要延期拍攝，留出檔期陪靚靚生產及安胎。不過由於BB未過小器期，所以至今仍未宣布喜訊，相信不久將來，Chilam一家三口會再增添一名家庭成員。
無綫劇集《衝上雲霄II》，令飾演風流機師Cool魔的張智霖(Chilam)人氣急升，紅爆中港台，不但成為廣告商寵兒，內地劇集酬勞亦由25萬人仔升至35萬人仔一集，但Chilam志不在此，乘著Cool魔熱潮集中火力進軍影壇，早前便以5千萬3年加盟蕭定一旗下，而頭炮便是電影《衝上雲霄》，該片不但有Chilam、吳鎮宇等劇集的原班人馬，新加盟的還有古天樂、鄭秀文及郭采潔，但最令人期待是曾跟Chilam傳過緋聞的佘詩曼，在劇中亦會演上一角，可謂星光熠熠。
主動更改拍戲檔期
人氣高企的Chilam，片約一浪接一浪，繼電影《衝上雲霄》後，還有跟周秀娜合作的《風月俏佳人》，另一齣則是將多年前無綫劇集《十月初五的月光》，再次搬上大銀幕，而《十》劇是當年Chilam鹹魚翻生之作，「初哥哥」一角至今仍讓人津津樂道，而女主角則同樣是佘詩曼。據講兩片拍攝時序，是Chilam到英國及比利時拍畢《衝上雲霄》後，緊接著10、11月開拍《風月俏佳人》，待農曆年過後才拍攝《十月初五的月光》，但Chilam卻主動提出，希望先拍《十》片，而《風》片則待明年1月後，才正式落實開拍日期。
短髮靚靚頻摸小腹
Chilam入行多年，一向甚少干涉拍攝電影檔期，今次完全是要遷就太太袁靚靚，皆因一直恨生女的Chilam，終於造人成功，而且今次靚靚很大機會陀女，可喜可賀。上月22日下午1時許，靚靚跟一位女性朋友，到中環置地食午飯，當天靚靚穿起白色鬆身恤衫，闊腳短褲配上平底運動鞋，以往瓜子臉及身材偏瘦的她，當天兩頰渾圓，而下圍亦變得豐滿，在鬆身衫下仍見到靚靚小腹凸起，未知是否想讓胎兒有更多營養，靚靚將短髮剪得更短，跟友人飯後逛街，步履輕快而小心，而在乘扶手電梯時，更不斷撫摸腹部，有齊準媽媽的徵兆。
鬆身衫裙掩飾懷孕
靚靚跟友人飯局，專心安胎，而Chilam則做足丈夫本份，負責湊囝囝慕童，在7月尾，Chilam偕同慕童在中環鬧市現身，囝囝雖然已經7歲，但Chilam仍然十分緊張，全程拖到實，父子傾到雞啄唔斷，感情要好，父子二人其後進入了一幢商廈，據Chilam透露是帶囝囝進行身體檢查。遺傳了Chilam及靚靚的優良基因，小小年紀的慕童，樣貌已生得甚為俊朗，將來長大後隨時能成為父母演藝事業的接班人。除了Chilam跟慕童兩父子的歡樂時光外，其實亦有加上靚靚，一家三口家庭樂，在慕童體檢後數天，Chilam便跟靚靚及慕童，一家人在銅鑼灣利園逛街，當天靚靚便穿上黑色衫及波點傘裙，卻突兀地穿上運動鞋，當時靚靚身形已明顯發福，早見孕味。
聞生女即四萬咁口
早於前年Chilam及靚靚已開到口話恨生女，Chilam表示「都有計劃(追女)，最理想梗係有兩個小朋友，不過呢啲都係要睇天意。」靚靚則揚言「有一仔一女係人生一大樂事」，但二人幾經努力，仍是未能成功。今年1月，Chilam出席賽馬會活動，同場的麥玲玲師傅即席贈Chilam兩句，批示Chilam在馬年及羊年會大紅大紫，兼且添丁置業。Chilam聞言笑道「如果生十兄弟點算？」，玲玲即接著補充「生完仔再生女。」Chilam即笑晒回應：「承妳貴言。」至上月尾，Chilam到吉隆坡舉行巡迴演唱會，而Chilam在個唱記招後，即在百忙中拜會同在當地的寧波車，獲對方加持祝福外，Chilam更向寧波車祈求靚靚平安陀B。
夾生理期夫妻行房
靚靚自己知自己事，今年已43歲的她，早已踏入高齡產婦年紀，但她不時返回內地拍劇，錯過了不少跟Chilam造人的機會。去年Chilam憑《衝上雲霄II》爆紅，但靚靚擔正的內地劇集《龍門鏢局》，自播映以來，一直被內地觀眾狂插劇集內容粗鄙，有教壞小朋友之嫌，收視欠佳，令靚靚甚感無癮，所以靚靚索性將賺錢重任交給人氣急升的Chilam，而自己則專心生B，為求一擊即中，靚靚先睇中醫調理身體，而夫婦行房時亦要計算日子，夾靚靚的排卵期，全力火速造人，而皇天不負有心人，靚靚終於傳來喜訊，為慕童帶來妹妹。
望生囡囡箍實老公
Chilam跟靚靚結婚多年，仍如新婚夫婦般甜蜜恩愛，Chilam在中港兩地拍劇拍戲，卻難免遇上飛來蜢，雖然Chilam對靚靚一條心，但靚靚始終仍未放心，繼囝囝慕童後，早希望生多個囡囡箍實老公。其實Chilam亦十分識做，在拍攝及宣傳電影《衝上雲霄》時，刻意跟曾傳過緋聞的阿佘保持距離，而今次劇集更特別安排古天樂跟阿佘成為一對，Chilam則跟台灣女星郭采潔有感情戲，隔絕Chilam跟阿佘再傳緋聞的機會。繼後拍攝的電影《十月初五的月光》，Chilam跟阿佘雖然是男女主角，Chilam亦大方讓靚靚監場探班，令靚靚可以放下心頭大石，安心生BB。