甜蜜遊哈囉喂 陳家樂衛詩雅 拍拖斷正

英皇電影旗下的型男藝人陳家樂,早前在台灣拍攝電影《破風》時,發生意外導致左邊鎖骨骨折,為拍戲可謂身博盡,而在留院期間,緋聞女友詩雅第一個到醫院探望,令戀情甚囂塵上。日前二人不避嫌到海洋公園哈囉喂拍拖,不但在登山車上咬耳仔談心,又一杯兩份飲,而在遊東瀛鬼屋時,家樂走在前頭為詩雅擋走鬼怪,英雄救美,二人全程打情罵俏,戀情早已浮出水面,不認不認還需認。

陳家樂加盟英皇電影後,受到公司力捧拍攝電影《破風》,前途無限。至於家樂的緋聞女友衛詩雅,亦有意全力在影壇發展,有傳緋聞男友陳家樂先過檔電影部試水溫,得到不俗發展,詩雅隨即在家樂搭路下,近日亦轉投英皇電影,二人不時以情侶檔上陣,孖住掘金。

甜蜜遊哈囉喂 陳家樂 衛詩雅 拍拖斷正

摸黑咬耳仔甜入心

日前陳家樂跟詩雅這對緋聞情侶,雙雙在海洋公園現身,原來二人拍住拖到哈囉喂鬼屋,二人雖然一直否認戀情,但當天二人卻有不少情侶般的親暱舉動。當天家樂身穿黃色運動風褸,配上黑色運動褲,而詩雅則是牛仔背心配超短熱褲上陣,甚為惹火誘人。在海洋公園內,二人肩貼肩走著,家樂輕扶著詩雅玉背,詩雅則顯得甚為受落,其後二人進入登山車內,愈坐愈埋仿如連體嬰,二人不但傾到雞啄唔斷,詩雅又跟家樂「咬耳仔」傾密偈,由於車廂搖動,詩雅像錫了家樂一,令整列登山車內充滿柔情蜜意。

開餐一杯兩分飲

其後二人到達以日本江戶時代為背景的「東瀛魔界遊」,日本傳統鬼魅不時現身,令較細膽的詩雅不斷大呼小叫,而家樂則負責保護女方,走在前頭擋著一班嘩鬼,man到爆。其後二人到達鬼溫泉,身穿和服的長髮女鬼,突然從暗處衝出來嚇二人,開頭詩雅都有點面青青,其後卻見怪不怪,不時在鬼怪前自拍,當無臉鬼出場時,詩雅更刻意長髮披面,反嚇場內的一班鬼怪,情景甚為搞笑。

其後二人轉場至「奧屍卡製片廠」,顧名思義,在荷里活常見的鬼怪,如木乃伊、狼人等紛紛出場嚇人。家樂跟詩雅雖然均戴上墨鏡,但仍被不少途人認出,紛紛向二人要求合照及簽名,而他們完全冇明星架子,對「集郵」粉絲來者不拒,非常親民。玩了大半天,家樂提議搵地方醫肚,二人漫步至哈囉喂的主題餐廳「回魂堂」,更叫了一杯像插上元寶蠟燭的「香爐」特飲,二人均覺得有趣,再次取出手機自拍,其後一杯兩分飲,sweet到暈。二人飽餐一頓後,再在公園內四處蹓躂,最後才依依不捨離開。

甜蜜遊哈囉喂 陳家樂 衛詩雅 拍拖斷正

男方承諾甘苦與共

本週一(27日),家樂跟詩雅出席《一個人的武林》首映禮,記者即上前求證他們拍拖遊海洋公園哈囉喂,是否準備公開戀情?

記者:記 衛詩雅:詩 陳家樂:樂

記:見到你哋喺海洋公園親密拍拖喎?
樂:係咩?你見到咩?我哋仲有啲更親密嘅嘢呀!哈哈哈,其實我哋認識咗好多年,好好朋友,冇乜避忌。

記:詩雅轉去英皇電影,係咪為咗你呀?
樂:之前我先去英皇電影,幫佢試水溫囉。講笑啫,其實唔係嘅,等佢自己講啦。
詩:想試吓其他嘢,喺電影發展。同以前個部門一直合作好好,但電影呢邊機會多啲,所以有咁嘅決定,全公司都有共識,覺得應該要咁做。

記:點解嚟海洋公園哈囉喂呢?
詩:我哋兩個都好鍾意睇鬼片,佢去咗台灣大陸拍戲好耐,我哋好耐冇見,趁佢返嚟,佢又話身體好番晒,試吓佢係咪真係好番,咪帶佢入鬼屋囉。
樂:佢一入去即刻箍我頸呀。(詩雅即搶著說:睇吓佢有冇承擔?),佢又話唔驚,入到去即時掐住我,我幫佢擋吓囉。
詩:嗰日有鬼想嚇佢,我即嗌住唔好整佢左邊膊頭,佢受過傷,整佢右邊啦。哈哈哈。(家樂即時大讚詩雅好細心,而詩雅則甜絲絲答「so sweet」。)

記:你哋嚟緊有冇發展機會?
樂:一齊合作,嚟緊應該會拍套戲。
詩:一路都發展緊,喺電影發展方面,都冇間斷過。《很想和你在一起》已經5年前啦,依家大家成長,睇吓有冇新火花。

記:你私底吓去玩,會唔會觸怒公司?
詩:唔會啦,全公司都知我哋好friend,有乜嘢我哋都會第一間通知對方,都知我哋識於微時。
樂:我哋係共患難,希望將來可以共富貴啦。之前受傷返港,佢都係第一個嚟探我,我哋關係不淺。

家樂開到聲願跟詩雅將來「共富貴」,有個靚仔又深情的男友,詩雅可謂幸福滿瀉,看來二人隨時會傳出喜訊,好事近。