張智霖袁詠儀帶隊 積德祈福 間接作孽

一命二運三風水,在圈中大紅大紫的藝人,對道家佛學,風水命理,或多或少都有涉獵,而篤信佛學的張智霖及袁詠儀,就甚為神心,除了不時出席祈福法會,參拜大寶法王外,閒時便偕同好友伍詠薇、蔡一智夫婦,齊齊出海放生祈福,更將手持馬蹄蟹、海星等相片上載微博,靚靚此舉隨即惹來環保人士及網民炮轟,指她夫婦破壞生態,但靚靚就一於好少理,揚言「唔會因為負能量嘅人嘅意見,去改變自己諗法。」

其實圈中不少藝人也會進行放生祈福,但若然放生不得其法,令生物未能適應環境而死亡,無疑是好心做壞事,放生變殺生。城中兩大玄學家,林炳南及吳佩孚,便會講解正確的放生方法,他們均異口同聲表示用錯放生方法,等於間接作孽,求乜冇乜事小,更隨時好運變衰運,惹禍上身。

Chilam 靚靚帶隊 積德祈福 間接作孽

萬人迷Cool魔張智霖(Chilam),跟太太袁詠儀均是虔誠佛教徒,平日誠心拜佛外,每逢大寶法王等密宗高僧來港舉行法會,他們夫婦例必偕同好友蔡一智夫婦等人,一起出席法會,誠心祈福,祈求菩薩庇佑。Chilam近年事業跟他擔正的無劇集《衝上雲霄II》一樣,一飛沖天,身價飆升,更以5千萬3年加盟蕭定一旗下,進軍大銀幕,將當年讓Chilam再闖高峰的經典劇集《十月初五的月光》開拍成電影,繼後還有夥拍周秀娜的電影《風月俏佳人》,片約、廣告一浪接一浪。

間接造孽求乜冇乜

Chilam事業一帆風順,當然認為是佛祖庇佑,所以Chilam跟靚靚一有時間,便會拉大隊出海放生,行善積德,為自己及家人消災解厄,祈福添壽。靚靚行善不遺餘力外,亦在微博大事宣揚自己的善行,日前靚靚、Chilam偕同好友蔡一智夫婦及伍詠薇,一同出海放生,Chilam、阿智齊齊赤裸上身,在船上玩單槓,大騷健碩身材,而靚靚則跟伍詠薇、周雪芳等好姊妹合照,笑容滿臉,明顯心情甚佳。眾人腳邊放滿多箱海鮮,包括有花蟹、石斑、大蜆等,而靚靚更隨手拎起一隻巨型馬蹄蟹拍照,對自己的善行,靚靚明顯自我感覺良好。

懶理環保網民炮轟

不過靚靚的放生善行,卻被環保人士批評,大量海產突然放入海,隨時會影響海洋生態,而網民亦直指靚靚放生行為,除了有機會被其他漁民再次捕獲放生海產外,而若然被飼養的生物,不適應新環境,隨時難逃死亡命運,而靚靚一手拎起的馬蹄蟹尾部,是用作翻身及改變游泳方向,實際上非常脆弱,至於花蟹難抵深海的水壓,應在淺水地方放生,靚靚的放生行徑隨時變成殺生。但靚靚卻懶理外界反對聲音,反指有人「太多負面想法」,更揚言會繼續放生,「唔會因為負能量人意見,去改變自己諗法。」

Chilam頭頭碰著黑

靚靚雖然無視網民,但Chilam的運程卻突然遇上阻滯,去年尾,Chilam以為憑《衝上雲霄II》Cool魔一角,視帝十拿九穩,卻被遠在上海的黃子華截糊,坐足全晚只得一個「我最喜愛男角色」的豬肉獎。跟了Chilam多年的助手,又跟自己有金錢糾紛,令Chilam損失7位數,雖然公司已將該名助手解僱,但已令當上老襯的Chilam甚為無癮。另外,Chilam於千禧年憑劇集《十月初五的月光》初哥哥一角,令他的人氣事業登上高峰,現時跟佘詩曼開拍《十》的電影,Chilam當然甚有期望,想不到開鏡一日,只是拍了三個take便要停廠,隨即傳出Chilam對劇本不大滿意,要身兼編劇及導演的葉念琛再改寫劇本,而停廠消息曝光後,Chilam跟葉念琛便放二人合照上微博闢謠,但Chilam頭頭碰著黑已是無容置疑。

Chilam 靚靚帶隊 積德祈福 間接作孽

靚靚追女食詐糊

至於靚靚雖然有個萬人迷老公,又有囝囝張慕童,但夫妻二人也想追多個女,可惜靚靚肚皮卻唔爭氣,多次傳出有孕也是食詐糊,甚為無癮。另外,近年在內地發展的靚靚,在內地拍攝的劇集《龍門鏢局》,加入了不少廣東俗語,卻不被內地觀眾接受,收視口碑雙雙仆直。幸好Chilam繼內地的真人騷《兩天一夜》後,孖住靚靚參加另一個真人騷《一路上有你》,夫妻檔上陣才挽回不少人氣。日前等《十》片復工的Chilam,便偕同兩位友人到置地high tea,戴著黑超的他,面色黑過墨斗,笑容欠奉,全程心不在焉,跟朋友坐了不夠45分鐘,便急急腳走人。

阿呂幾十萬倒落海

圈中信佛藝人往往有鋪放生癮,包括有樂壇天后王菲、Janice Man、黃宗澤、王喜、呂良偉及舒淇等,而呂良偉於今年初,便買了40萬海產去放生,更試過在家中沐浴時,見到隻螞蟻,他都會救其一命。對於圈中人愛放生積德,動輒幾十萬掉落海,但往往不得其法,放生變殺生,兩位城中著名玄學家林炳南及吳佩孚,均不約而同表示「間接做孽」,不但未能積福,更會令運勢受到影響,隨時由行好運變衰運,得不償失。

玄學家林炳南表示,「放生嘅目的,不外乎係誠心向善,都算係慈善嘅野,但放生嘅動物,會唔會因為咁而死,又係另一個問題。正確放生嘅方法,首先要計算流年方位,再同事主嘅命格配合,而駕船出海放生,就一定要擇吉日同埋揀啱時辰,要知道吉凶嘅方位。當然有啲海產係唔適合放生,若然明知都照做,咁就帶有少少殺生味道,會影響到放生者嘅運氣。」

另一位玄學家吳佩孚則表示:「放生係佛教同埋道教上都會有,讓人減低殺孽,消災解厄。道教係信多神論,所以出海放生時,隨咗拜天拜地,仲要拜龍宮龍王。至於佛教層面,因為相信有輪迴嘅說法,所以會口唸往生咒,放生積德外,亦幫生物除去孽障,下世輪迴有機會做人。當然如果唔理物種,亂咁放生,咁就係間接做咗殺孽,好心做壞事,亦會影響運程。好多時啲人放生,都係自我感覺良好,如果要行善積德,不如捐錢去慈善基構仲好。」

Chilam 靚靚帶隊 積德祈福 間接作孽