03年憑《金雞》初嘗台灣金馬影后滋味的吳君如，令她對《金雞》系列有很深的情意結，因此隨即開拍《金雞2》及《金雞SSS》，而本年初上映的賀歲片《金雞SSS》更錄得4千多萬票房，令吳君如更加心雄，希望《金》系列可以成為香港電影的經典系列之一。
為了搞搞新意思，吳君如今年決定由「雞」轉「鴨」，開拍《金鴨》，除了自己親自監製及演出之外，更大打友情牌找圈中好友幫手，當中包括找來好友古天樂出錢投資兼擔任男主角之外，吳君如更希望可以食正「韓流」，有意邀請韓國三大人氣小生李敏鎬、金秀賢及Rain（鄭智薰），再加上本地人氣小生林峯、余文樂等等在戲中做鴨，大大增加電影的吸引力。如此大陣容，除了因為要省靚招牌外，更重要自從她透露有意開拍《金鴨》後，王晶竟然搶先開拍《鴨王》，令吳君如非常不滿，認為有人不顧道義公然偷橋，因此《金鴨》更是許勝不許敗。
是次吳君如除了擔任女主角之外，亦會同時擔任監製，男主角就找來好友古天樂演出，據知是次古天樂除了出力演出之外，更會出錢投資《金鴨》，而他與吳君如亦已經碌盡友情咭，盡量希望電影可以大堆頭，而吳君如更打「韓流」主意，目標是韓國演藝界三大型男。
全力拍攝分道揚鑣
近日全力籌備及拍攝《金鴨》的吳君如，令本身一向工作大過天的她更加冷落陳可辛，就像日前記者就先後兩日發現陳可辛沒有與吳君如同行，先與兩名女友人在中環high tea，應該是傾談工作，不過陳可辛卻不時用手托頭，表現得心不在焉。翌日記者又再發現陳可辛獨自在中環出現，只見他只是邊行邊打電話，然後走上早在路旁等候的七人車離開。再過數天，記者又發現陳可辛與吳君如及家人齊齊到中環食晚膳，雖然二人齊齊進入餐廳，不過吳君如就只是自顧自傾電話，與男友全程零交流，就算大約兩小時後二人與家人一同離開，吳君如亦與男友亦是一前一後離開，上車後二人更分前後座坐，看似關係冷漠。
「其實君如每一次拍戲都係咁，永遠都好似諗緊嘢咁樣，尤其係今次佢做埋監製，所以特別緊張，陳可辛都已經習慣，佢每次拍戲都一定係自己顧自己，到君如拍完戲就會冇事。」知情者表示。
男星露點引女觀眾
據了解，去年賀歲片《金雞SSS》成績理想，吳君如早已構思再拍第四集，但在娛樂圈多年的她，深明《金雞》題材已經拍到好盡，再拍只會將電影淪為爛片系列，打爛自己一手造成的金漆招牌，因此她構思將「金雞」變成「金鴨」，因為她深知香港女性觀眾大多都愛看男星，尤其是男星能夠坦胸露臂的話，就更加有吸引力，情況就如早前張家輝的《激戰》，不少入場的女士都是為了欣賞張家輝的「朱古力身型」。
「君如對《金雞》有一定情意結，佢情願唔拍都唔想整臭個名，所以佢決定轉拍金鴨，一來由雞轉鴨新鮮感大增，加上女星都係麻煩，唔好話裸露，就算性感少少都推三推四，但男星就唔同，齋露上身已經可以令到唔少女觀眾V嘩鬼叫，如果有一、兩個靚仔肯三角褲上陣，單係女觀眾入場已經係票房保證。」一名知情人士表示。
三大韓星赴韓拍攝
除本地男星外，吳君如眼見近年「韓流襲港」，每次有韓星來港都總會有大班fans接機送機，令吳君如興起了找韓國人氣韓星客串做鴨的想頭，據知她對近日在東南亞地區人氣爆燈的李敏鎬、金秀賢及Rain等等非常有興趣，而她更曾經嘗試聯絡韓國方面作初步接觸。
「初時好多人聽到都話吳君如大想頭，覺得韓國啲經理人點會睬佢，不過君如就唔係咁諗，因為韓國都有好多鴨店，對鴨店文化有獨特睇法，而且佢又唔係要班韓星赤裸裸、打真軍，只係搵佢哋客串，所以君如覺得唔係一定冇得傾，佢已經搵咗熟悉韓國方面嘅朋友幫手，試吓聯絡韓國啲經理人，至於人選方面佢當然希望係當紅韓星啦，好似李敏鎬、金秀賢、Rain之類，君如話如果有一個韓星肯拍，改劇本去韓國拍都冇所謂，當然係要一哋香港有名氣嘅韓星啦。如果真係去韓國拍，成本當然會大咗，最緊要係俾錢嘅老闆古天樂都覺得呢條橋可行。」知情者續說。
超大堆頭狙擊王晶
《金鴨》已經正式開鏡，日前高調舉行開鏡儀式的吳君如，罕有地對「金鴨名單」有所保留，非常口密拒絕透露，但記者收到可靠消息，指除了出錢的古天樂已落實演出之外，其餘已經落實演出的還有余文樂、林峯、陳奕迅及杜汶澤，另外還有「碌咭」中的有曾志偉、任達華、謝霆鋒、黃秋生等等，就連「三個小生」謝賢、胡楓、Joe Junior都在考慮之列，而為了令電影更加有睇頭，吳君如更會叫陳可辛幫手「碌咭」找相識多年，曾經在《情義我心知》中做過「弱智鴨」的黎明客串一角，務求《金鴨》要星光熠熠。
「今次吳君如為咗省靚招牌，決定唔做合拍片，唔想因為大陸市場而有好多制肘，佢情願拍得盡啲爭取本地成績，好似《金雞SSS》都收4千幾萬票房，單係香港收入已經封咗蝕本門。不過今次君如咁緊張，最重要都係佢一早已經打算拍《金鴨》，點知只係漏咗少少口風，就俾王晶搶佢頭啖湯拍《鴨王》，雖然兩套戲級數唔同，王晶就擺明賣弄性感，有唔少裸露肉搏場面，而君如呢套就sell大堆頭，但君如條氣就係唔順，覺得有人抄佢橋搶佢頭啖湯，所以佢今次一定唔輸得。」知情人士表示。