方力申爸直認新抱 鄧麗欣年尾擺酒

拍拖逾10年的鄧麗欣(Stephy)、方力申,有指二人已經秘婚,只不過礙於事業仍在衝刺中,二人不想坦誠承應。一直對名份十分重視的Stephy已不下多次要求名正言順成為「方太」,雖然Stephy與小方二人已關係儼如夫妻,雙方家長亦熟稔如親家,唯小方卻未仍有進一步行動。

據指Stephy見身邊好友陸續出嫁,眼見自己亦步入中女之年,Stephy急不及待要當媽咪,是以改行老爺政策,由小方爸爸落令二人公開關係。日前記者向方爸追問此事,新老爺都忍唔住笑到四萬咁口,直忍Stephy新抱名份,當被問到會否心急抱孫,他笑言:「仔大仔世界,順其自然啦,都唔催得咁多,但我都心急。」,看來方父對新抱Stephy相當滿意。

改行老爺政策 Stephy年尾做方太

Stephy和小方拍拖10年,不時傳婚訊,更有傳兩人同居薄扶林,早已秘婚。

雖然Stephy同小方公開戀情多時,但講到結婚,兩人都經常以「工作為先」為理由,笑指未有結婚計劃。不過Stephy身邊的密友表示,Stephy最近眼見姊妹們公開晒幸褔,自己又透露口風隨時生BB,也希望可以公開「方太」名份。據知,Stephy和小方已秘密註冊結婚,只是未有公開,但方父在人前人後都叫Stephy「新抱仔」。

趕生三個B

記者在方爸於中環的畫廊中找他查問。方父見到記者,最初有點緊張,一副嚴肅的表情。記者向他表示:「恭喜你新抱生小朋友。」方父聞言後,表情輕鬆了一點,笑笑口地表示:「唔係,未有小朋友。」記者未提到Stephy名字,方父已知記者所指的「新抱」是誰,直認了Stephy的「新抱」身份。記者再問Stephy是否經常到來探望他,方父笑言:「間唔中啦,都知佢哋忙嘅。」(會唔會心急抱孫呀?)「仔大仔世界,順其自然啦,都唔催得咁多,但我都心急,你哋問番佢哋本人啦。要做嘢啦,下次再傾。」方父甚有禮貌回應,但提起新抱Stephy時,卻不禁露出甜絲絲的笑容。

年尾擺酒

小方同Stephy未達成公開婚訊的共識,但現時已經31歲的她想早點生BB,所以借此「催婚」,公開表示不排除未婚生仔,又謂小方多做運動身體好,隨時可以生BB!Stephy如此一說,不禁讓人懷疑是否已經成功造人。「以前Mini Cookies四餅Kary、Miki都各自預備結婚,Stephy同小方係眾人中最早拍拖,反而都而家都未公開做『方太』!眼見以前同公司嘅楊千嬅公開婚事依然得到唔少歌迷喜歡,Stephy都想大方公開結婚,所以近排都經常同小方明示佢意願。」知情者說。Stephy,曾表示結婚生仔一定會做,是人生必經階段,近日小方亦公開表示想生三個BB,為不想做高齡產婦,Stephy希望可以早日公開做「方太」,為小方生兒育女。

「Stephy見到兩位好姊妹幸褔,都想同年擺喜酒,所以今年隨時閃嫁,只係擔心結婚習俗唔可以太近月份結婚做唔到大家陪嫁姊妹。Miki年頭結婚,Kary 8月擺酒,Stephy應該會揀年尾擺酒。」Stephy身邊人說。如果Stephy今年成功擺酒,當年四餅就只剩下傅穎(Theresa) 無著落喇!

賣剩餅碎

組合Cookies原本有9人,現時除了Kary嫁人和待嫁的Miki、Stephy,還有兩位成員何綺玲(Elaine) 和蒲茜兒(Serena) 已嫁人,只剩四餅女未有聲氣。

傅穎
傅穎(Theresa) 自從和羅仲謙分手後,主力在內地賺人仔,感情未有著落,緋聞也欠奉,新聞多是關於是她的工作和越來越靚的五官。

區文詩
區文詩(Angela) 一向不愁寂寞,男友一個接一個,不乏靚仔外藉男,但早前甩拖,未有嫁期。

陳素瑩
陳素瑩(Gloria)退出娛圈後讀大學,修讀了會計碩士,現已成為會計師。

馬思
馬思(Helena)退出娛圈後,到美國讀藝術治療課程,正式轉行。