3週刊 第711期

去年7月，黃宗澤（Bosco）與拍拖8年的胡杏兒宣佈分手之後，雖然男方曾有傳在國內拍劇時不時有美相伴，但真命天女一直未有出現，至今仍是單身一人。在訪問中曾多次表示這階段不想談戀愛的黃宗澤，日前卻被本刊發現與三位長腿美女同行夜蒲，但因為發現有記者在場，即時先後「怒踢」三位美女落車，最後獨自返回寓所，無功而回。本刊致電胡杏兒，對於舊愛艷福無邊，她答得淡然：「我冇回應，呢排好忙，都冇聯絡！」

對於日前一王戰三后，被拍下接載三短裙美女，黃宗澤在電話中表示三人是他相識多年的圈外友人，絕非心儀對象。

杏兒提Bosco猛話: 唔好問呢啲

今日無綫動員全台數百藝員大晒冷，全台花旦小生都現身，連過氣情侶胡杏兒同黃宗澤(Bosco)都同場，問到杏兒同前男友黃宗澤同場會唔會尷尬？佢話:「同場唔尷尬，佢仲企我旁邊。」咁有冇傾偈？杏兒就話未有機會傾。

咁大家有冇聯絡？杏兒就話:「有段時間無，係同事會見面。」係咪已經放低咗？佢話:「無嘢，無嘢，唔好問呢啲，唔好講，講到咁嚴重。」問會唔會復合，佢都係嗰句:「唔好講呢啲。」咁講下雯女畀TVB封殺得啦o掛?佢就話:「唔會啩，都唔好啦，大家好來好去。」咁無綫爭取到世界盃獨家播映權，佢想唔想做主持？杏兒話:「唔好，我做主持好差。」

而Bosco近日就畀人影到揸車帶住3個女仔去SOHO區蒲，不過發現記者後就丟低幾個女仔喺街，事後佢就唔認，只係話佢冇去玩，順手載幾位女士去夜蒲啫，信不信由你。

Bosco同杏兒變點頭之交

今日無綫大晒冷，黃宗澤(Bosco)被TVB安排同前女友胡杏兒同場，仲要企隔離，杏兒表現避忌，成日擰歪面。

問到Bosco同杏兒同場零交流，佢今日就回應:「喺外面化妝間有點頭SAY HI。」又話同杏兒好少聯絡，咁係咪好尷尬？Bosco話:「係你哋搞到我哋尷尬。」咁係咪分手後第一次同場?佢話:「唔係，之前頒獎禮都試過，好少事。」係咪放低咗？佢話:「我無嘢嘞，係你哋成日提住。」

咁企喺杏兒隔離有咩感覺?佢話:「正常做嘢，合作就要睇公司安排。」覺唔覺得畀TVB擺上枱，Bosco話:「工作上無嘢，公司安排，OK嘅。」咁就嚟世界盃，TVB攞到獨家播映權，Bosco就話開心，四年一度盛事與眾同樂，仲有22場唔使錢有得睇。

提到傳出林峯秘婚，佢就話唔知真定假，林峯無同佢講，如果係會開心恭喜。