佘詩曼同陳豪合作過好多次，之前嘅《公主嫁到》熱爆全城，佢哋仲因為拍劇而傳出緋聞，近日佢哋又有機會合作拍攝新劇《 4 in Love》，不過家陳豪身邊已經有咗陳茵媺，所以兩人再合作睇怕都唔會擦出愛火花。

不過因為兩人合作無間，所以都老友鬼鬼，前晚 11點佢哋喺旺角西洋菜街拍外景，雖然接近午夜，但係旺角街頭都係人來人往，佢哋拍攝期間仲吸引咗過百人圍觀，搞到條街真係好鬼熱鬧。

陳豪同佘詩曼喺旺角鬧市拍劇仲要拮魚蛋，阿佘仲食到辣親嘴唇。

乳酪店吹水

前晚一身便裝嘅阿佘同陳豪拍攝一場喺旺角掃街食魚蛋、飲珍珠奶茶嘅戲份，阿佘要全程戴上口罩，但又要食魚蛋，仲食到辣親嘴唇㖭，難度都幾高；陳豪個造型就好搞鬼咁喺膊頭掛咗條毛巾吸汗，十足十地盤佬。拍攝期間因好多人圍觀，加上有人影相又嘈雜，所以佢哋都要重拍幾次先完成。

由於前晚天氣翳焗，劇組都好細心，租借咗一間乳酪店畀佢哋攤唞，阿佘同陳豪唔使埋位就匿喺店內休息，佢哋仲傾到雞啄唔斷，其間有粉絲捉佢哋影相，兩人都有求必應，店內職員仲好識做請佢哋食乳酪慰勞佢哋。

阿佘同陳豪唔使埋位就匿喺乳酪店攤唞吹水嘆乳酪。