一向被不少港女視為理想男友模範的吳彥祖，自13年榮升父親後，好男人形象受到高度評價，男神地位相當鞏固！
雖然有話男人40一枝花，不過去年定居三藩市的吳彥祖，似乎keep唔住副靚body，除了輕微中年發福，更出現男人大忌——禿頭！上週四（19日）由美國回港拍攝荷里活新戲的吳彥祖，由內到外滲出陣陣佬味，唔只當街用手撩牙，仲加埋條明顯向後移的髮線，真係好令人擔心喎！
上週四凌晨，吳彥祖為西片《 Geostorm》開工，當晚戲份由 1點拍到天光，吳彥祖食完串燒做宵夜後，竟然當街用手指撩牙，核突啲喎！
可能時差關係，吳彥祖等埋位期間頻頻打喊路，個口擘到似足《奪命狂呼》個面具！
同王合喜（左）傾完偈，吳彥祖又開始肚餓，狂隊梳打餅。
去年因要照顧患病母親而返回美國定居的吳彥祖，結束了香港的經理人公司，同時亦將事業重心搬到美國，方便陪伴老婆 Lisa S.及 1歲多的女兒吳斐然（ Raven）。
單拖返港拍戲
決定長居美國，吳彥祖暫時未有接拍港產片，反而參與由編過《天煞——地球反擊戰》及《哥斯拉》的導演Dean Devlin執導的電影《Geostorm》，同劇演員還有《戰狼300》男星謝勒畢拿等。
上週四（ 19日）凌晨，吳彥祖為新戲在九龍城開工，同場仲有王合喜，兩人等埋位時，吳彥祖竟然麻甩男上身，當街打喊路唔掩口，趁冇人留意時仲用手指撩牙，行為似足核突阿叔！
移居美國後，吳彥祖生活相當悠閒，經常同老婆及囡囡Raven周圍去。
增 15磅操肌
除了這部荷里活製作，吳彥祖亦會參演由老友馮德倫擔任製片、被稱為「美版西遊記」的劇集《 Badlands》，飾演西版孫悟空 Sunny。除了成為美劇主角，吳彥祖更會兼任製片及武術指導，幕前幕後都有份。
為演好首部美劇，吳彥祖要增 15磅，更要狂操體能同肌肉。不過身型點 fit都冇用，吳彥祖同 Eason一樣面對中年男士脫髮危機，髮線不斷向後移，右邊髮位更因稀疏而「現窿」。再唔搵專家幫手，睇怕遲下要轉型做沙僧喇！
’15現窿
頭髮又薄又稀，真係好難掩飾，亦令到男神嘅右邊靚樣大打折扣。
吳彥祖將近期操肌相放上 ig同粉絲分享，仲有打拳片段。髮線（小圖）後到咁，真係嚇一嚇！網上圖片
’13 M額
13年囡囡出世，吳彥祖曾經發過一家三口合照，當時已經見到佢開始 M字額。網上圖片
小鮮肉進化史
24歲
98年初出道的吳彥祖勁 fresh，眼神同笑容都電力十足！
32歲
06年幫 Leslie Kee露毛影慈善寫真，當時肌肉尚算結實。
38歲
12年同 Lisa S.結婚，婚後明顯開始鬆懈發福，面形變圓。
39歲
去年拍《魔警》要減 30磅，即時冇晒線條變排骨仔。