近年唔少藝人都開自家店鋪，飲食業、時裝界、就連家品店都有沾手，但隨住山寨技術日益發達，超A貨已不是吹水。

現有2店在手的古巨基，09年在尖沙咀開設第一間自家品牌時裝店，生意一直不俗，但自去年古巨基參加湖南衞視的《我是歌手3》後，觀眾即時發現有衫可抄，公然在淘寶賣古巨基的自家服裝。淘寶多A貨唔奇，最好笑係網民買完老翻，仲要selfie放上網，@埋「苦主」古巨基囉！老闆基仔無奈話：「睇到時哭笑不得！」

古巨基早前忙於參加湖南衞視的《我是歌手3》，除了華麗的西裝外，自家品牌出場率亦甚高。

09年古巨基第一間時裝店開張，好友周慧敏和陳志雲都有到賀。

因為參加內地歌唱節目《我是歌手3》，古巨基在內地再次爆紅（00年因内地電視劇《情深深雨濛濛》而翻身），基仔週邊產品亦有錢途，老翻商人當然不會走甩。

十份一價錢扮基仔

家陣上淘寶，衫褲鞋襪家電甚至寵物乜乜乜都有得買，不過留意番啦，大部分都係山寨貨！

由於古巨基經常着住自家品牌上《我是歌手3》，迅即成為山寨商店新目標，節目播出唔夠2星期，淘寶已經充斥基仔新貨，當中有啲仲連十分一價錢都唔使就做到翻版基仔。

淘寶網友買完貨品，通常都會自拍俾返店主睇，大家睇吓呢位網友着得幾威武！網上圖片

網上圖片

《我是歌手3》由今年1月開始播，一個月唔夠只要打「古巨基」、《我是歌手》即有幾版老翻任你揀。網上圖片

投訴山寨無門

據知古巨基的自家店鋪a big company全賣自己設計的服裝，上得台更加不放過穿回自家衫賣免費廣告機會，可惜反而被老翻商有機可乘。

店鋪職員曾試過到淘寶的知識產權保護平台投訴，可是一直不予受理，「我哋收到投訴話淘寶做好多假貨賣，我哋都想禁止佢哋繼續賣，但係俾過晒好多資料，嗰個投訴平台都係話我哋資料不符，所以一直都禁止唔到。」

苦主老闆古巨基話：「其實好無奈，這不是第一次，以前都試過，甚至見到香港有些鋪頭買入這些山寨貨來發售！有人穿山寨版自拍，還@我。睇到時哭笑不得！」山寨商人出名抄襲力強，基仔認命啦！

古巨基去年喺美國娶咗拍拖20年嘅女友Lorraine做老婆，Lorraine名正言順做老闆娘睇數！

時裝店開業5年上晒軌道，古巨基去年開埋糕餅店，撈多瓣！

明星淘寶店

淘寶除咗有唔少山寨貨之外，其實仲有好多明星都開咗鋪賣正品！好似台灣天王周杰倫，幾年前已經喺淘寶開店賣自家唱片同埋週邊商品，而周秀娜亦開店賣自家bra，最估唔到嘅係草猛嘅蔡一智，向來打扮都別樹一格嘅佢亦開咗間潮店賣服飾，網上開店成本低，其實真係諗得過！

周杰倫賣唱片
Jay嘅網上商店主力賣唱片和週邊商品，仲有佢由出道至今嘅唱片，保證正版先啦！

周秀娜賣胸圍
娜姐最近都喺香港開咗鋪嘅內衣店，其實早就喺淘寶開咗網上商店，就算唔買，入去齋睇娜姐啲相都夠興奮啦！

蔡一智賣潮物
Sir11嘅網上商店，除咗有之前演唱會嘅「賣剩遮」之外，仲有自己設計嘅服飾，不過潮唔潮真係見仁見智喇。