郭富城度劇本四大天王拍戲

2013.06.21 26

即時新聞

城城度劇本搵華仔學友黎明客串

郭富城、阿Sa(蔡卓妍)、陳曉東、林德信同Hotcha一班歌手，喺沙田出席「香港電台數碼車Roadshow 2013」啟動禮，港台助理廣播處長張文新喺現場宣布下個禮拜五榮休，結束40年廣播生涯。

當年四大天王個名就係張文新改，不過依家要搵到佢哋四個同台一齊表演都唔易，但阿城話計劃搵齊佢哋客串拍電影：「我度緊劇本，諗住自編自導自演一部電影，想搵齊佢哋三個幫我客串。」

四大天王一齊拍戲，究竟係咩戲呢？

以前嘅《超級學校霸王》，都差黎明！

大隻東東晒手臂自爆幾層樓揸手

今日陳曉東喺沙田出席「香港電台數碼車Roadshow 2013」啟動禮，一排冇見東東，佢全程都好high，仲不停騷自己隻手臂，好自滿話操到好fit。早排東東喺台灣內湖買億幾台幣豪宅，佢話：「兩年後至有得收樓，買呢間屋係阿媽心願。」同阿媽一齊住，第時結婚咪冇得同老婆二人世界?東東笑言：「有房嘛!買多間囉，我上海間屋都畀老竇霸咗，北京層樓依放緊租。」香港一班冇樓族，聽到都只能流口水啦…

另外，一向緋聞多多嘅林德信傳同陳妍希撻著，佢又例牌否認：「我同佢識咗超過十年，係好熟嘅朋友，從來冇諗過有冇發展，但我覺得佢幾cute，唔知點解我有咁多(緋聞)，搞到好麻煩，有啲女仔(朋友)唔鍾意曝光會好小心。」

操到咁大隻，晒下先。