蔡少芬谷奶抱肥B密冚油頭
蔡少芬（Ada）上月產下女兒張楚兒後，深居簡出專心坐月，昨日Ada罕有帶着本周六才滿月的楚兒外出，母女首度曝光，產女至今按足傳統未有洗頭的Ada全程戴帽，連番進補的她上圍明顯三級跳至E奶。其愛女楚兒手腳如節瓜般圓碌碌，頭大額圓，下巴一如蝦餃王，頭髮濃密兼鼻尖嘴細，似足媽咪般省鏡。
Ada自上月11日剖腹誕下九磅四的肥B女張楚兒後，母女倆一直未有露面，但愛女心切的Ada不時於微博上載女兒的近照與童鞋分享湊女樂。
蔡少芬未坐滿月便出門購物，捨不得楚兒的她抱着囡囡首度曝光。
巨Ｂ楚兒肥嘟嘟、頭大大，正睡得香甜。
帶B女掃貨遊車河
專心坐月的Ada依足傳統，產女至今未有洗頭及甚少外出，不過昨日適逢端午佳節，Ada罕有出關，早上送老公出門往外地工作後，下午亦帶同將於本周六滿月的楚兒外出購物遊車河。
昨午約二時，Ada驅車接載愛女楚兒及陪月三姨離開元朗寓所，直駛往屋苑內的超市，她泊好車後即獨自下車，陪月及女兒則留在車內等候。戴上帽遮掩「油頭」及身穿貼身連身灰色裙的Ada，產後已收身不少，不過在產後進補兼谷奶的情況下，上圍明顯三級跳至E級。她急步往超市後，細心選購了橙、蘋果、麵包及蔬菜等營養食品。
素顏上陣的她引來不少顧客目光，但Ada未有理會，再揀選了兩盒鮮奶及雞蛋後，才往排隊付款。
其後Ada推着購物車前往停車場會合女兒及陪月，Ada甫見記者亦一臉愕然，但友善的她仍笑笑口打招呼，問她為何不帶B女往超市？Ada說：「天氣咁熱，留佢喺車休息啦。」問及如何慶祝端陽佳節及女兒滿月？Ada聞言只笑而不答，但問到老公張晉時，她一臉幸福的說：「佢要返大陸做嘢呀。（新居幾時入伙？）未呀，仲裝修緊，有排先搬啦！」
Ada購物完畢，笑晒推着購物車離去。
Ada在超市內選購營養食品。
產後的蔡少芬因為谷奶，身材較前更勁。
蔡少芬、張晉的新居仍在趕工裝修中。
節瓜腳加蝦餃下巴
說罷Ada即驅車接載女兒返家，下車時她小心翼翼抱着十多磅的楚兒，正甜睡的楚兒頭髮濃密，屬重量級巨B的她手仔腳仔肥肥白白如節瓜般粗壯，加上面頰、額頭也圓碌碌，就連下巴也肉騰騰一如蝦餃王，鼻尖及嘴仔細細，似足Ada般，靚靚B女極為可愛。Ada抱着女兒入屋後，便與記者揮手道別。
此外，昨日聯絡上Ada的經理人，問及楚兒滿月事宜，她說：「滿月就唔會擺喇，百日宴就未決定，總之Ada依家好享受湊女樂。」
張晉等Ada坐完月先擺酒
蔡少芬（Ada）老公張晉昨日中午戴着黑超，身穿黑背心現身機場，獨自走到港龍櫃位辦理登機手續，問他前往哪兒？張晉說：「我去北京。（開工拍戲？）唔係，去北京辦簽證。（辦完簽證趕返香港，幫囡囡張楚兒擺滿月宴？）我都冇話過要擺滿月宴，就算係都等Ada洗咗頭（意即坐完月）先講啦！（時間太趕，擺百日宴？）都係等Ada洗咗頭先講啦。」
張晉說待太太蔡少芬坐完月才決定幾時為囡囡擺酒。
再問張晉做新手爹哋感覺如何？他四萬咁口說：「OK吖，都幾開心，湊BB都幾好玩。（Ada身體點樣？）佢好好，瘦番好多。」
張晉在櫃位辦登機手續，準備飛北京。
唐寧讚楚兒肥得可愛
Ada（蔡少芬）和唐寧分別剛升任媽媽，兩人常在微博上交流湊BB心得，共同話題多多，已度過坐月時期的唐寧，最近更開始為舞台劇綵排，昨日她說只看過楚兒的相片：「佢肥嘟嘟、好得意。（會送禮物？）睇佢個女需要啲乜嘢，大家都係媽媽最清楚，BB實際需要嘅都係奶粉呀、尿片咁，我唔贊成送衫，因為BB大得快，好快唔啱着。（唔擺滿月會相約食飯？）其實依家興擺百日宴，我哋都唔擺滿月啦，食飯都會約，因為係藉機出嚟見吓面。」
Ada另一好友朱茵已見過楚兒，大讚她似足媽咪：「Ada生個女時好辛苦，我有睇佢微博，知佢仲要清晨五點就要起身餵奶，好辛苦，如果到自己生BB都有啲驚，但呢啲嘢隨緣啦！」
潮媽破禁 生完照洗照吹
新任媽咪坐月期間禁忌特別多，例如不能洗頭、吹風，不過圈中不少潮媽懶理禁忌，紛紛忍不住破禁。
琦琦：我喺醫院生完第二日已經洗頭，屋企就用薑水洗，洗完會用兩個風筒吹乾個頭；另外，醫生建議餵人奶時要特別注意衞生。
童愛玲：台灣人傳統要在醫院坐月一個月，我忍到第十一日，已經靜靜雞去髮型屋洗頭；而且台灣坐月嘅傳統係唔可以飲水，只可以飲用米酒煮出嚟嘅水，但我忍到第二個禮拜，已經偷偷買水飲。
歐倩怡：我生完大仔第三日就沖涼，知道用薑水沖涼可以驅風。我有親戚讀「陪月課程」，指以前啲人用井水沖涼，所以好容易冷親，好彩依家有暖水沖涼洗頭，沖完用風筒吹乾啲頭髮就冇事。
坐月唔洗頭 古老做法錯
有指孕婦產子後坐月期間一個月內不宜洗頭，避免「頭風」，關嘉美醫生指做法大錯特錯：「唔洗頭係古老嘢，咁會患皮膚炎，依家多鼓勵餵人奶，媽媽唔乾淨會增加ＢＢ受細菌感染嘅機會，都係洗乾淨後多啲同ＢＢ親密接觸仲好。醫學上冇『頭風』，只係怕易冷親，洗頭後即刻吹乾就得，建議留短髮方便打理。」
有指以薑水洗頭可驅風，關醫生表示此做法亦可，留意水要乾淨。另外，她提醒餵母乳的媽媽宜均衡飲食及食富營養的食物，避免吃燕窩等含高蛋白質的補品，影響剖腹傷口的復原情況，同時ＢＢ亦不需吸收這些養分。