花無百日紅，蔡少芬（Ada）深明此道理，早就洞悉不是所有事都理所當然，亦知自己已過了死拍爛拍的播種階段，早前斥巨資與友人合組自家童裝品牌，進軍商界，不過Ada不會因此淡出，拍劇兼顧做生意之餘，仍會撐起半邊天，好讓老公張晉安心發展更好的事業，Ada可說是個真正的女強人。

■蔡少芬知道演藝生命不長久，兼向商界發展，打造自家品牌童裝生意。攝影：葉君海

蔡少芬最近開童裝品牌店當起老闆來，她非只是做生招牌，而是落手落腳邊做邊學，難道有意淡出轉型做女強人？Ada說：「我冇呢個本事，應該話我好鍾意繼續做戲，唔想放棄，唔想因生意影響我有自己演藝事業，不過如果有朝一日，我老公要我全身侍奉呢個家庭，我就會考慮放棄，否則唔會放棄自己演藝事業。」

力不到不為財，Ada既要拍劇做生意，又要照顧家庭，時間如何分配？她說：「冇乜點大計劃㗎，咁多年計劃都冇意思，尤其係拍戲，早年我拍李連杰、周星馳啲戲，個個記者同我講：『嘩！呢期仲唔係你？』但係半年冇人搵我撈，發覺原來好多嘢唔係等於㗎！總之有幾多做幾多，腳踏實地做好每一日有嘅嘢，後面嘅嘢就因為你o依家有嘅嘢而嚟，冇嘢亦唔需要驚奇，呢個世界冇話公唔公平。」

拍劇保知名度

當然，有些事還是可以自己掌握，就如生意拍檔，Ada遇上兩位專業人士，基本上打理好一切，但所有事都會向她匯報清楚，輕鬆部份會讓她參與，令她可邊做邊學，Ada說：「我唔係掛名㗎，雖然辛苦，但好玩，學到好多嘢，好似設計咁，以為好簡單只需要畫圖，原來要整模，塊布有幾多塊面，唔夠以為就咁再買布，但原來唔得，一批有幾多規定，冇得隨便加，成本亦會高咗，先至知原來當中好大學問。」

Ada入行以來一直只管拍劇，忽然做起老闆來，倒是新鮮，難道她深明演藝事業不一定長久？Ada坦言：「一路以嚟都覺做戲演藝唔係佔我百分百時間，開工都係等，o依家會揀嚟拍，唔似初出道一年十部，唔係要錢唔要命，係要機會唔要命，嗰時錢唔多㗎，反而o依家一部頂唔少部，嗰時要搵機會畀自己演，訓練自己啲戲，o依家到某個成熟階段，經驗已夠，唔使死拍爛拍只係做同一樣嘢，呢個世界錢搵唔晒，最緊要享受過程，做生意係另一門手藝，我喺香港、大陸嘅知名度又有幫忙。」至少Ada不會減少到內地拍劇搵銀，她笑言：「我要供樓㗎！嚟緊大陸商演、廣告都有，拍劇就要睇劇本，拍劇可以保持知名度，酬勞又唔錯，所以一年都想拍一兩部自己鍾意嘅。」

撐老公向外闖

生意上軌道，可以揀喜歡而又好酬勞的劇集拍，更令Ada開心的是，老公張晉藉電影《一代宗師》彈出後，事業扶搖直上，睇齊她的好成績，Ada說：「o依家老公工作咁好，帶嚟屋企收入更加好，當然替佢開心啦，我都未試過拍賀歲片，仲同發哥（周潤發）拍，好朋友成績好都替佢開心，何況身邊另一半，佢越好我咪越好囉，佢嘅即係我嘅！我亦會全力支持佢向外闖，佢係工作狂，終於攞到佢想要嘅滿足感，亦都有人識得欣賞我欣賞嘅嘢。」Ada坦言現在是她人生最開心的階段，家庭令她體會到生命裏所有美滿事，這個張家女強人目標是日日過得快樂！

未能過檔港視

■Ada在營商過程中學到不少，漸對做生意有興趣。

蔡少芬成功晉身做女強人，既要照顧家庭，又要參與童裝生意的營運，身兼數職的她再三強調不會放棄演藝事業，依然盡量保持每年都有產量。
在無綫出身的蔡少芬，跟娘家一直保持良好合作關係，目前跟無綫仍有兩年部頭合約，故暫時未可以跟其他公司合作，問到會否誓死效忠無綫？Ada笑言：「冇乜誓死效忠呢回事嘅，我一向接工作都係睇劇本、檔期、對手等條件。」
除王維基旗下的香港電視已全力在製作劇集外，有線及nowTV的免費電視台亦將投入服務，會增加劇集的製作，對於現在電視行業環境變得更開放，Ada表示當然歡迎，並說：「平台開放得多，對演員嚟講一定係好事啦！」