由曾志偉碌晒人情卡做監製嘅無綫新劇《Aerobic Girls舞室保衛戰》今日開鏡拜神，前排已經介紹晒劇中七個女主角李若彤、李麗珍、陳慧珊、江欣燕、葉蘊儀、袁潔瑩同張慧儀，而男主角就有吳啟華同鄭丹瑞（阿旦）。

阿旦做李若彤老公

有咁多個女主角，男主角咁少點夠分。劇集另一監製陳維冠透露鄭敬基同盧大偉都有份演出，而甚少拍劇嘅崔建邦都會客串。回流返香港拍第一套劇嘅鄭敬基，喺劇中飾演一個藝術家，會同李麗珍有感情戲。而做司儀叻嘅崔建邦就會扮年輕版嘅鄭敬基，仲會以80年代look出現。至於阿旦就演李若彤個老公，吳啟華喺劇中就俾幾個女主角鍾意，不過就係煩到佢怕咗女人，結果一個都冇揀到。

■套劇叫《Aerobic Girls舞室保衛戰》，唔知會唔會加番場男、女演員混合跳舞嘅場面呢？
設計圖片及對白

■（左起）葉蘊儀、李若彤、李麗珍、江欣燕、陳慧珊、張慧儀同袁潔瑩合作拍劇，令人期待。
資料圖片
計起嚟，除咗班女主角好多個都係退隱咗俾志偉搵番出嚟之外，連班男演員都係，不過勝在有啲知名度，之前《金枝慾孽貳》就俾人話二線角色唔夠份量，相信呢個劇冇呢個問題出現。陳維冠仲話，班男演員都知個劇係以女人戲為主，知自己戲份唔太多，不過，因為套劇講幾位女主角無論喺乜嘢階段都可以重新出發，題材好正面，所以都答應演出。