上星期播到七百集的《愛·回家》，因為收視持續向下，直接影響植入廣告收益，也令繼續加碼的計劃告終；據了解，無綫已下令播到五月就收檔，預期拍到八百集的好夢幻滅。

決定止血，無綫亦埋首為新處境劇埋班，據知有部分《愛·回家》班底，將會有得留低，其中包括劉丹、黎諾懿、徐榮、張達倫、楊卓娜同蔣家旻。

高海寧得寵，獲安排加入《愛·回家》，幫她形象入屋，可惜觀眾唔受，鍾意她性感晒波多啲！

收視暴跌

《愛·回家》由一二年三月開播，做了接近三年，因為收視理想，其間不斷添食、加入新角色，但好景不常！無綫已下令收檔，大限之期：五月！即使監製徐遇安希望拍到八百集才冚旗，但公司高層一致否決，要《愛·回家》盡早玩完。

播映初期收視平穩，長期有廿五、廿六點，就算其餘兩線黃金時段劇集收視暴跌，《愛·回家》都穩得住，甚至有段時間高過兩線劇集，難得硬淨，令劇集可以不停添食延命。

直到近半年，《愛》劇終於冇法承接，收視跟兩線劇一齊下跌，只在二十點邊緣徘徊，由於收視跌過一個特定數目，無綫便需要向廣告商交代，加上植入廣告數量大倒退，廣告收入銳減，有見及此，高層唯有手起刀落，堅持「處決」。

上星期六，高海寧、古明華同一班《愛·回家》演員到銅鑼灣派利是封，兩個新加入的演員受歡迎程度不及一班台柱演員。高海寧將會同黎諾懿做一對，但係觀眾唔多受落，始終懷念馬壯（黎諾懿）同朱慧敏一齊。

又係同一班人

至於接力的新一套處境劇，已經在埋班中，換湯不換藥，是以新劇會沿用大部分《愛·回家》演員，身為處境劇台柱，由《真情》、《皆大歡喜》、《畢打自己人》、《天天天晴》到《愛·回家》的劉丹會被保留外，馬家成員大部分亦有得留低，包括徐榮、林漪娸、黎諾懿及蔣家旻。

過往由於「查李施」同「史林廖賴」兩間律師樓的劇情得到觀眾歡迎，所以「嚴謹」張達倫、「霞姐」楊卓娜同「查家澤」黃子雄亦有得入組。反而新加入的高海寧，即使劇組不斷加重其戲份，但無論收視和人氣，都一池死水，打仗幫唔到手，就算有殼王撐腰，一樣冇得留低，新處境劇，冇佢份！

劉丹是處境劇鐵膽，所以下一檔處境劇他眾望所歸有得留低，而黎諾懿亦有份留低。

馬家大部分成員都可以冧庄，徐榮同蔣家旻已落實有份，而張達倫同楊卓娜都因為有觀眾緣，所以都可以留低。

之前《愛·回家》好收視，全台高層都出席撐，現在收視跌，馬上就要他們收檔。

上星期《愛》劇編劇在微博上透露即將進入結局階段。