陳茵媺日前誕下小Mo子，今日出院喇。陳豪事先張揚話今日五點鐘會陪太太現身受訪，故大批傳媒一早於山頂嘉諾撒醫院守候，但估唔到陳豪竟然玩「聲東擊西」，可惜都係失敗。

今日下午近五點左右，陳豪透過院方表示稍後會於新翼大堂接受訪問，但該處仍未正式辦公，而呢招就係聲東擊西第一步。原來於醫院大門口旁，有電梯直上陳茵媺間房。至下午約五點四十分左右，陳豪先至現身，而同一時間，茵媺就準備出院喇。

時光倒流返去五點半左右，只見一個女子抱住BB現身，BB用藍色毛氈包住，見唔到樣。女子抱B喺停車場行咗一轉，之後就上番去，未幾再由一位姑娘陪同落嚟，跟住就上咗茵媺架車，原來佢就係小Mo子喇!

本來陳豪一心諗住傳媒會喺大堂等佢，點知記者亦兵分兩路，於大門口旁等到茵媺落樓。身穿黑色衫、披住黑色長披肩嘅茵媺，一身黑色，戴上墨鏡包到實，但見其產後亦好快已修身，冇乜點水腫，並由陳豪媽陪同上車。因為停車場內有啲高及腳肘上下位置嘅鐵鏈，現場記者齊聲嗌住茵媺唔好跨過去，但茵媺就照跨，快步上車。點知正準備上車時，保安大聲嗌唔好，原來心急上車見B嘅茵媺上錯車，結果茵媺急急搵番自己架車，一邊儍笑，好可愛。記者問佢任何問題，佢茵媺係笑晒話OK，未有回應。

身在醫院大堂嘅陳豪轉移視線呢招失敗咗，見佢都有啲唔開心。問佢點解咁鬼馬呢？佢就苦笑講:「BB啱啱出世，太太又剛生完，未cover好。等佢哋cover好之後，一定影張靚靚全家福，擺上網俾大家睇。」問到是否茵媺產後不想上鏡？陳豪即緊張地謂:「唔係，太太好靚，非常靚，好靚。」

陳豪又表示佢但會繼續開工，唔會停住；佢又話依家已經病好咗，終於可以親親BB喇。至於初為人父感受，陳豪就話:「比想像中開心，BB好靚，感覺好美妙。收到好多朋友嘅祝福，但因為依家較忙，要遲少少先可以回覆。」佢又話茵媺刻下要好好休養調理，至於屋企多咗一位新家庭成員，陳豪笑言:「我都要時間學習適應吓。」

生完B嘅茵媺，皮膚依然咁好，而且冇水腫，真係得天獨厚!