今年4月，郭富城（Aaron）同33歲熊黛林（Lynn）的七年地下情玩完，前者火速搭上24歲卜卜脆的內地o靚模葉熙祺（AK），拍拖三個月，女方便獲准「攻城」！「新城嫂」AK跟記者大爆同城城的親密關係，仲毫不忌諱甜到漏坦承：「我好冧城城！佢對我好有心，靚仔又有才華，唯獨係不解溫柔！」囡囡開到口詐型，城城下次溫馨的時候就不要太狂野，一字記之曰︰溫柔。

葉熙祺（AK）夠膽識，之前為鞏固「新城嫂」地位，連環辣低情敵熊黛林、苟芸慧同仙樂都，句句有骨無面畀，完全唔怕開火會令「男友佬」唔Like，可能女方我行我素的好勝公主格，令一向被女寵壞的城城覺得過癮，竟然多番包容AK，就算傳城城送鑽戒求婚都無扯火，只是避談：「我唔想回應，因為唔想將無聊失實嘅報道變成長篇小說，我明白娛樂圈嘅遊戲規則，但要適可而止。」

多番維護城城

城城送鑽戒求婚及父女戀有性無愛的報道只是雜誌的自行幻想，AK的經理人已發聲明作出強烈譴責，AK亦用人格去保證絕冇講過！不過，AK接受本報訪問時直認收過多份由城城送出、好有價值的禮物：「我唔止收過一份，仲有好多份，但冇幾百萬咁貴重，總之唔係平價嘢，至於送乜就唔講啦，呢啲係我哋之間嘅秘密，我哋自己分享就可以。」

再問到是否情人節禮物，六月生日的AK二話不說，「情人節我哋都仲未識。（那是生日禮物嗎？）咦，唔記得嘞，我雙子座冇乜記性㗎。」不過，Follow城城7年的Lynn只換來一部Mini Cooper！AK聞及此事，即衰衰地偷笑並衝口而出：「咁又真係孤寒咗喎。」語畢，即發表假設性想法維護城城：「可能佢想送保時捷，Lynn想要Mini Cooper呢？我唔知呀，但印象中佢唔孤寒，對朋友仲好大方。」葉熙祺重申多次去宣示主權：「因為我唔止收佢一份禮物，所以佢唔算孤寒！」

缺父愛愛叔叔

AK小妹妹更忍不住大讚「男友」：「我好冧佢，佢好為朋友着想，對我好有心，我哋係傾得到心事嘅好朋友，佢仲會用前輩身份畀意見我，又承諾會做導師教我跳舞。佢又靚仔，又有才華，身形又吸引，唯一佢唔夠溫柔囉！」問到城城怎樣不解溫柔？她欲言又止，掩面難為情道：「唔……知喎！（太粗暴？）少少啦！」草草幾句便收口！ AK更自爆因為坎坷身世而有戀父狂，暗示接受「父女戀」：「因為父母離異，細細個冇得同父母住，7歲我就要入讀寄宿學校，好想有個爸爸，最好男朋友似爸爸咁湊我，直至18歲先知道，口中嘅其中一個Uncle原來就係我爸爸，o依家每隔兩、三年都會來港見Uncle一次面。」真係聽者心酸。

新城嫂狂搵錢

問到有關「城城系」女人，AK不評論熊黛林，因為大家路線不同，亦無留意苟芸慧，但就乘機抬高自己，說出骨中話：「因為家庭背景問題，我好獨立，唔黐身，唔缺錢，亦唔恨做城嫂，我喺中央戲劇學院讀聲樂出身，想靠自己，唔使郭富城幫！」

其實自上位做了「城嫂」，AK舔埋熊黛林的Job更升價三倍，出席商演價高達8萬港元，且有價有市，加埋拍關錦鵬愛情文藝大悲劇新片，黐城城半年足足勁賺過百萬：「我希望未來幾年可以成立工作室！目前以工作為主，結婚唔諗住。」AK唔催婚，唔黐身，唔恨錢，正好配合城城要延後至50歲才結婚的時間表！「父女戀」對晒咀形。

牙尖嘴利

AK人仔細細但講說話超厲害，句句有骨，名副其實辣椒女一名。

秘密論
去年10月，傳房祖名跟葉熙祺閃婚，女方更指見過成龍，豈料成龍卻表示未見過她，AK面對大哥都唔收口，聲稱「諗唔到講真話會令人咁氣憤，o依家學識要守好多秘密。」

垃圾論
從事護膚品生意的仙樂都自爆N年前曾在「城竇」幫城城做Facial，郭富城還未回應，葉熙祺即反擊：「垃圾嘅人，我唔會回應！」疑暗罵仙樂都是垃圾。

小三論
郭富城與熊黛林分手後，被指第三者是苟芸慧及葉熙祺，AK回應：「我這一世都沒可能做小三、小四，亦問心無愧。」

食藥論
阿Lynn暗示葉熙祺好進取，同佢性格唔同！葉熙祺即在微博還擊。