譚詠麟（阿倫）同李克勤「左麟右李」嚟緊12月喺紅館開騷，噚晚佢哋喺電視城錄影特輯節目《左麟右李左Friend右Band大派對》，表現high爆嘅阿倫唱唱下走落台，人群中馬蹄露突然出現咀咗阿倫一啖，不過佢都欣然接受，阿倫又坐男人大髀，而成日甩嘴嘅佢又再唔記得歌詞，不過觀眾都見怪不怪。

阿倫契仔關楚耀都有嚟到支持，不過就俾契爺玩，阿倫笑佢同周秀娜緋聞：「你同麥當娜係咪真㗎？你約人三更半夜跑步，又唔約我？」關楚耀無奈話：「我身上胸肌係真，跑步啫。」阿倫接住又笑話：「你同我哋合唱《愛人女神》，唱咗就成為真嘅女朋友。」唱完後阿倫又大講黃色笑話：「大家估宅男見到麥當娜有咩反應？咪就係《球迷奇遇記》囉，『起來起來起來起來…』。」

訪問時關楚耀都係難逃契爺掌心，問佢有冇再約娜姐？關楚耀話：「唔知佢喺唔喺香港，跑步都可以自己跑。」佢轉話題自薦做阿倫克勤個唱嘉賓跳辣身舞，阿倫又講三級嘢：「做咩，華山論劍咩。」真係口不擇言。

嚟緊「左麟右李」會喺紅館開騷。

阿倫落台同觀眾一齊大玩。

阿倫甩嘴忘詞，大家都見怪不怪。

馬蹄露突然強吻譚詠麟。

阿倫之後仲同馬蹄露面貼面。

關楚耀喺台上畀阿倫係咁玩。

阿倫玩到High晒，諗住落台同大家玩吓，點知畀馬蹄露強吻。

訪問嘅時候阿倫都唔會放過關楚耀。