6號陸浩明為無綫娛樂新聞台主持的清淡節目《6號訪》，在本周六（17日）晚上7時播出的一集，將會邀請方力申出任嘉賓。小方談到近年在內地工作為主，遺憾減少時間見家人，而跟鄧麗欣（Stephy）的一段情，更坦言隨時準備結婚，只可惜女方事業心重，仲未肯嫁而已。

6號在訪問中，問到小方由游泳運動員轉型做藝人，當中的心路歷程，原來小方花了6年時間才能適應，當中更遇過不少批評。「啱啱入行，真係好迷惘，仲試過有次經過間學校，俾個男學生追住鬧，叫我返去游水，跟住啲女學生就喺度係咁笑，但係個學生又講中喎！嗰陣我真係咩都唔掂，咪唯有笑笑口咁走囉！」

遺憾冇時間陪家人

小方入行以來覺得最遺憾就是沒時間陪伴家人，尤其是近年長時間在內地工作，每次返家都覺得父母有點改變，為了爭取時間見家人，他唯有犧牲睡眠時間，「我就算幾點鐘瞓，都會校定鬧鐘九點起身，因為屋企人係呢個時間食早餐，如果唔係可能返咗香港，都係同屋企人見唔到面傾唔到偈。」

小方跟Stephy拍拖多年，他笑言全靠夠專一維繫，至於兩人到底何時拉埋天窗呢？小方坦言已準備好，「我心態上同埋各方面其實Ready咗好耐，但係呢啲嘢唔可以單方面㗎嘛！要問另一個先得。佢又特別事業心重，好少將自己感情分享得好徹底，我哋大家都係估吓估吓，細水長流咁啦！」

小方坦言隨時準備與Stephy結婚。

陸浩明知道小方愛吃，於是安排邊打邊爐邊做訪問。

小方和Stephy的愛情電影《獨家試愛》相當收得，亦撮合了二人。