小人物故事，從來就是最動聽。林子善，讀書不成，中三輟學，曾經是「屯門 Michael Jackson」，本來想做偶像郭富城跟班，後來扮低能蠱惑仔，誤打誤撞入了《喜劇之王》訓練班， 16歲被捧做「洪爺」，一戲成名，飄飄然做了明星。之後，一個湯馬斯回旋落地再彈不起，兩年冇工開，等運到要女友和家人接濟。時來運到，走過窮途末路，他懂了，現實世界，錢好重要，家人更加重要。

在深水埗街頭，一名外表兇神惡煞的背心男走在路中央，叼着煙向林子善大嗌：「洪爺！」林子善左顧右盼，用他那把沙啞的聲音回應：「喂！」很好奇，記者劈頭第一句問林子善：「你咪蠱惑仔？」他笑說：「我係唔會壞！」

林子善由《喜劇之王》的大茄洪爺，躍升為《怒火街頭》的第二男主角米律師，事業扶搖直上。　攝影：黃文偉

「我前世係狗」

「我冇行歪路，唔吸毒唔賭錢！」林子善自言黑白分明好乖仔。

然後，他娓娓道來一個很有趣味的孩提故事，他說：「如果我唔係改個咁嘅名，唔係有個咁嘅屋企，有個咁嘅阿哥，我會學壞，因為我未出世之前，三叔玩神打，請關公上嚟對話，關公係講國語 o架！我出世之前，話我係仔，但係話我呢個細路好曳，唔可以亂改名，就請如來佛祖改，即係釋迦牟尼，話呢個 o靚仔前世係狗，再上一世係和尚，今世係男仔，商量過之後，改我做子善，中和番個性格，意思應該係呢個孩子好善良。」
訪問當日天氣酷熱，在深水埗街頭取景，林子善問記者要求爬高定低，禮貌周周，他說：「我冇行歪路，又冇吸毒，又唔賭錢，我係入行先食煙，拍《三五成群》開始。我阿哥家做緝毒，係警察，佢好似《廟街孖兄弟》嘅梁漢文， 6呎高，會教我好多道理，佢話如果我有乜嘢犯錯，佢就冇咗份工，因為會查三代。」
林子善媽媽開大牌檔，自小接觸到不同階層的人，在複雜的人物關係中成長，直接影響他的行為思想，他說：「屯門揸弗人都係我阿媽啲客，成日同我傾偈，教我唔好入黑社會，叔叔話因為自己唔叻，要搵錢，我又見到佢教班孫，叫佢哋唔好做啲乜嘢。乜嘢類型人都有，我見好多，我明白乜嘢叫是非黑白，但係我性格就係黑同白，中間條線好幼，一係鍾意，一係唔鍾意，冇中間。」

屯門米高積遜

在無綫劇《怒火街頭》中，林子善的演出不比鄭嘉穎和胡杏兒遜色。

舉手投足都一陣陣江湖撈味，還以為林子善視電影《古惑仔》中的陳浩南做偶像，估不到他是一名舞蹈員，郭富城才是他的神級偶像，林子善說：「我真係好鍾意郭富城，我係郭富城 fans，又型又正又靚仔！嗰時入訓練班，以為係一個門路，可以做 dancer，因為我想做 dancer，我想做郭富城身邊嗰啲人。入行之後喺一個頒獎禮第一次見郭富城，佢企喺我隔籬，我即場呆咗！」
林子善英文名叫 Jazz，可想而知他熱愛舞蹈，在屯門舞出我天地，跳出名堂，屯門 Michael Jackson就是他，他說：「係我 Miss改，嗰時我有跳 MJ，學鄭秀文《煞科》、郭富城《最激帝國》，一開始喺屯門舞蹈團做 dancer，同班師奶一齊跳，得我一個男仔，不過我好鍾意，冇所謂，個個師奶當我係仔，我得啲師奶好開心 o架！」

捱出頭做老闆

林子善幸運，沿途有愛。他的家人和女友，還有他口中的良師益友，一直守護他，他說：「記得嗰時兩年冇嘢做，冇心機，成日喺屋企打機，等戲拍，我女朋友見我冇錢就放錢喺我銀包，好慘！之後走去幫人企特價場賣 hip hop衫，一日 10個鐘 150蚊，第一個月出糧有 6,000幾蚊，諗住畀 2,000蚊屋企，之後買隻錶送畀女朋友，點知我返到去送畀佢，仲要俾佢鬧，佢一路鬧一路喊，話我做乜亂使錢，我好嬲，又好無奈，嗰時我激動到差啲打爛隻碟。所以我知我好好彩，個個女朋友都肯同我捱，家我個女朋友都好好。」
29歲的林子善捱到出頭天，現在擁有全港最大型的捽碟公司，旗下 DJ幾十名，但是他本人仍然「爛做」，他說：「好天搵埋落雨柴，乜都做，細場我都會打，我好鍾意錢，家最希望係再有層樓畀自己，家供緊嗰層係畀阿爸阿媽，第日就有層樓可以養埋個老婆，咁就最理想喇！」相信這就是林子善完美的人生。

反對星爺拍悲劇

林子善在《喜劇之王》爆笑彈出，他感謝周星馳的提攜。

周星馳一手提攜林子善入行，他口中的星爺對他影響很深。林子善在海員學校讀書，最喜歡扮鬼扮馬，同學替他填表考《喜劇之王》訓練班，他為了見周星馳一面，跟在 300人後面，終於見到星爺，他說：「嗰時覺得去到又唔見吓，好似好鬼無聊，一入去見到基哥（李兆基），即刻失望喇！我扮一個喺屯門做蠱惑仔嘅 friend，基哥睇完，就推我入去見周生喇！」

「佢成日挑戰我」

很多人覺得周星馳難相處，林子善偏偏不怕他，更不會阿諛奉承他，林子善說：「佢啲智慧咁高，班門弄斧仲衰，唔鍾意就唔鍾意，以前一開會就問我好唔好，所有人都話好，我就唔出聲，所以佢成日挑戰我。」所謂忠言逆耳，當年林子善舉腳反對周星馳拍《長江七號》，他說：「佢話人哋鍾意睇我笑，不如我整到人哋喊，個個都話好，我唔出聲，佢突然問我『洪爺，好唔好呀？』我話，作為一個觀眾，我由細到大想睇你搞笑，你家整我喊，冇咗你嗰樣嘢，我梗係覺得唔好睇啦！」
講到星爺孤寒成性，林子善說：「其實佢唔係咁，喺內地拍戲，佢住五星，都要畀我哋住四星，我又聽住佢話要同我哋其他演員一齊食飯，但係，你問佢要錢，梗係唔得啦！佢係一個唔係好識計數嘅人，係超級唔識，佢對數字唔得 o架！」

「佢叫我畀心機」

林子善認為每個人都需要用心感受，表面永遠是看不透，他說：「耐唔耐都有打畀佢，話畀佢知我喺 TVB，佢咪叫我畀心機！其實佢係一個好關心人嘅人，有時可能識咗十幾年都未必了解佢，了解一個人唔係用眼去睇，係用心感受，只係佢唔鍾意同人解釋。」

「唔信自己會彈出嚟」

林子善在深水埗拍攝時，粉絲開心上前邀合照。

由《喜劇之王》的蠱惑仔洪爺，到《怒火街頭》搖身一變成為官仔骨骨的米佐治律師，林子善說：「我覺得係監製唐基明夠薑搵我呢個粉腸做，我英文又流，最初拍嗰時，我成日周身郁，係大哥（鄭嘉穎）成日提我，我一郁佢就拍我，後期我已經做到上咗身，個人好定、好呆、好斯文，連我班 friend都覺得我怪怪哋。」

做主角過眼雲煙

之前的洪爺，今日的米律師，林子善覺得全部都是過眼雲煙，他說：「我唔信自己會彈出嚟，我唔會對自己有期望，就唔會有失望，人哋話你係第二男主角就飄飄然，轉頭搵你做客串過鏡，你返唔到轉頭，所以我唔會咁諗，我唔咁諗，我就做乜都得。」