TVB大晒冷 黃宗澤胡杏兒一齊零交流

【無綫大晒冷】杏兒提Bosco猛話: 唔好問呢啲

今日無綫動員全台數百藝員大晒冷,仲會送出八部快意(Fiat)房車,都係為咗挽回最近低迷嘅收視。

今日全台花旦小生都現身,連過氣情侶胡杏兒同黃宗澤(Bosco)都同場,問到杏兒同前男友黃宗澤同場會唔會尷尬?佢話:「同場唔尷尬,佢仲企我旁邊。」咁有冇傾偈?杏兒就話未有機會傾。

咁大家有冇聯絡?杏兒就話:「有段時間無,係同事會見面。」係咪已經放低咗?佢話:「無嘢,無嘢,唔好問呢啲,唔好講,講到咁嚴重。」問會唔會復合,佢都係嗰句:「唔好講呢啲。」咁講下雯女畀TVB封殺得啦o掛?佢就話:「唔會o掛,都唔好啦,大家好來好去。」咁無綫爭取到世界盃獨家播映權,佢想唔想做主持?杏兒話:「唔好,我做主持好差。」

而Bosco近日就畀人影到揸車帶住3個女仔去SOHO區蒲,不過發現記者後就丟低幾個女仔喺街,事後佢就唔認,只係話佢冇去玩,順手載幾位女士去夜蒲啫,信不信由你。

TVB大晒冷 黃宗澤胡杏兒一齊零交流

又整蠱藝人 黃宗澤杏兒一齊企 零交流

今日無綫大晒冷,逾300位藝員一齊影大合照兼拍宣傳片。

排位如下:
第一排(左起)蕭正楠、李詩韻、陳展鵬、田蕊妮、黎耀祥、陳百祥、汪明荃、鄭裕玲、馬國明、胡杏兒、黃宗澤、徐子珊同王祖藍

第二排(左起)胡定欣、黃賢智,陳敏之、黃德斌、關菊英、錢嘉樂、薛家燕、李司棋、吳啟華、米雪、黃浩然、黃智雯、苟芸慧、岑麗香、陳智燊

企正中間,係阿姐;夾住佢嘅係嘟嘟同阿叻。馬明BB今次冇戴眼鏡,排前面,同視帝祥可謂平起平坐。最大整蠱,都係胡杏兒同黃宗澤呢pair,陰功,都分咗手咁耐,無綫仲要夾佢兩個企埋一齊,咁啱今日又有雜誌封面話黃宗澤一拖三女夜蒲斷正,尷尬到不得了。結果杏兒只能夠同馬明雞啄不斷,希望令氣氛瘁冇咁尷啦。

左右逢源 徐子珊兩緋聞男友齊現身

通常一講到全台大合照,排位好重要,好似話,田蕊妮排第一行、盛傳獲力捧嘅黃翠如BB就企第二行左一,點睇,都係田蕊妮被看高一線。

至於同殼王陳國強傳過緋聞嘅徐子珊,今日都有到,亦都係企第一行。如果講花旦排位,咁第一行就有佢、胡杏兒、李詩韻同田蕊妮,敏之同胡定欣、苟姑娘、黃智雯等都係企後一行,睇嚟無綫力捧嘅花旦,非子珊同杏兒莫屬喇。問子珊同殼王同場會否尷尬?佢話﹕「佢年年都喺度,點尷尬,唔通唔使返工咩?」講到尷尬,子珊同黃宗澤都傳過緋聞,今日又企埋同一行,子珊當然例牌都話冇嘢0架啦。

無綫投得2014年巴西世界盃轉播權,至於屆時會否同亞視合作,依家仲言之尚早,但無綫一眾藝人已經猛話好開心。今日大晒冷嗰陣,徐子珊話:「我聽到,我好鍾意世界盃嘅氣氛,好好好好開心,我會自薦去巴西做主持,叫阿叻帶埋我去。」

鄧萃雯盛傳因為狂轟《金枝慾孽貳》編審,疑因此遭無綫封殺,就連今日全台大晒冷,雯女都冇份。子珊就話:「冇聽過,乜咁大事呀?係咪中間有誤會?」佢又話第一次拍劇就同雯女合作,大讚對方對後輩好好。至於盛傳林峯秘婚?子珊話:「吓,咁快?冇打俾佢,好耐冇見佢,佢哋好開心。」

加強福利挽藝人 規定日抖8粒鐘 鼓勵投訴

今日無綫總動員全台超過353人齊出動,要夾好時間兼停廠影大合照,過程艱巨。無綫助理總經理區偉林,無綫話事人「殼王」陳國強、樂易玲等今日都有現身,加上今日無綫宣佈奪得世界盃播映權,喜上加喜。

近日無綫是非不絕,一來兩檔黃金劇收視低,其中《金枝慾孽貳》唔止收視同口碑都唔得,更被女主角鄧萃雯狂插拍攝時冇劇本。事有湊巧,今日無綫助理總經理區偉林表示:「已經同製作部講咗,2014年,入廠拍劇,要有八成劇本先准開工,需要全部人磨合。」但佢否認呢個安排係同雯女炮轟有關。區偉林表示﹕「呢個計劃年初訂立,需一年時間去做,希望出年做呢件事。信心一定有,呢個係公司目標。」

對於無綫藝人流失率極高,盛傳離巢嘅謝天華同陳法拉今日都冇影,區偉林就表示﹕「係有同事流失,佢哋雖然走咗,但都稱呼佢哋係同事,希望佢哋快返,似套劇一樣,叫《愛‧回家》。」嘩,好肉麻吓喎。

區偉林又向員工送上心理安慰療程,除咗每組更俾八小時藝員休息外,仲包括﹕「無論工作上有開心唔開心,都可以同我哋講,放心,冇嘢解決唔到,但係要反映,我哋都想加快步伐處理同改善。」佢又話今日安排咗自助餐請大家食,仲送埋紅綠T恤添呀。

樂易玲好想陳豪茵媺結婚生仔

今日無綫大晒冷,300藝員出席,高層當然都要出席啦。其中樂易玲被問到林峯最近傳出秘婚,仲去到美國出席胞弟大學畢業禮時,順手同千語BB註冊,樂易玲就話:「唔係,一年前佢已經講咗,點都要坐飛機去睇細佬畢業禮,返香港之後佢去咗橫店幫劇埋尾。」

而同樣被傳結婚,女友陳茵媺仲大肚嘅陳豪呢?樂小姐就話:「陳豪原來會嚟,位都已經幫佢劃咗,不過可能怕咗你哋(指記者)。」咁茵媺係唔係大肚?樂小姐話:「唔知,佢屋企有急事返去,打去都無人聽,我覺得唔係大肚,男大當婚女大當嫁,我一廂情願想佢娶同生仔。」係咪返去安胎?樂小姐強調茵媺返去有嘢做。

最近有傳志偉開經理人公司搶無綫人,樂易玲話:「佢向來有製作公司,好多嘢都幫無綫手,藝人唔簽無綫,有其他都係好事,都自己人無所謂。」而問到TVB係咪封殺鄧萃雯,佢就話:「有人坦白表達自己,過咗去無事,無隔夜愁,有啱劇本會再用。」

祥仔撐雯女 :佢講自己嘅睇法冇錯

黎耀祥今日出席無綫大晒冷,佢同黃宗澤、加埋馬國明BB,已經係有份現身嘅小生當中,最勁嗰三個(有份企第二行嘅吳啟華唔計啦)。

陳豪就話驚咗又俾人問婚訊而「避席」,視帝祥一樣成為被問焦點,先係今日有報道話,祥仔主演嘅《巾幗梟雄之諜血長天》,因為班底同《神探高倫布》幾乎一樣:監製李添勝+編審葉廣蔭+演員黎耀祥+馬賽。有指無綫驚咗又重蹈覆轍、收視見底,故抽起《巾幗III》唔做台慶劇,改為由都係視帝祥、陳豪、陳法拉嘅《傳愛事務所》接棒。

今日祥仔被問到此事時,就話:「唔關我事,從來冇聽過係台慶劇。」至於佢嘅《巾幗》老拍檔鄧萃雯傳遭無綫封殺,祥仔表示:「有聽過,佢有佢嘅工作,唔會有太大影響。拍嘢係享受,唔係太大件事啫。」祥仔直言同雯女好少聯絡,如果有合作機會嘅話會問吓。

至於雯女透過傳媒同微博向《金枝貳》態度有問題?祥仔表示:「每個人有自己嘅睇法,每個人角度唔同,佢講自己嘅睇法冇錯,睇大家點去睇呢樣嘢。」至於說有人「跳船」冇承擔,祥仔謂﹕「有冇承擔見仁見智,香港係自由社會,畀人講嘢,做人要努力表達自己意見,係冇錯。」