壹週刊 1053期

信埋佢今次囉！（設計對白）

探熱針

崔建邦生日　唐詩詠摸上門

2010年05月13日

崔建邦與唐詩詠經過三合三分，以為崔建邦搭上中巴（鄺敏慧）狠飛舊愛，唐詩詠便會醒覺心死，與崔建邦從此一刀兩斷。
無奈已經試過兩度被飛的唐詩詠，始終走唔出崔建邦手指罅，最近兩人又再度復合。上星期五（五月七日）崔建邦生日前夕，唐詩詠偷偷摸上男友屋企，短敍慶祝。

生日女郎

去年十二月，崔建邦涉嫌打傷女友中巴（鄺敏慧）後，因涉官非而全面停工。落難時間，唐詩詠沒有雪上加霜踢多腳，反而公開出口力撐，令崔建邦十分感動，認為對方始是自己最愛。
「 Amigo真係知衰，知道自己唔識珍惜，其實佢一早就想同番 Natalie復合，但考慮到而家咁嘅環境，驚拖累對方，所以都唔敢強烈咁表態。但最近佢哋見多咗，成日一齊出街，自自然然咪喺番埋一齊。」崔建邦身邊人說。
五月八日是崔建邦三十一歲生日，生日前夕（上週五、七日），唐詩詠就在崔建邦位於畢架山的寓所出現。
當日下午四時，在崔建邦屋企與男友歡聚完的唐詩詠，事先電召了一部的士去到大廈門口，車到後，戴住帽仍見一頭亂髮的她極速跳上車，更刻意將身體彎低，高度戒備。

慌張
發現記者，唐詩詠急忙叫司機加速。

掩面
為了逃避鏡頭，唐詩詠更出手掩面。

班救兵

其間，唐詩詠發現有記者跟踪，即時發晒茅，叫司機加速兜圈，由於一直甩唔到身，最後她唯有班救兵，連人帶車去到九龍塘一間獨立屋，門外已有保安幫手擋駕，記者影相，保安員更出手遮擋鏡頭；至於一直將頭伏低的唐詩詠，俾完錢落車，即一支箭衝入屋內。
事實上，唐詩詠近期已頻頻被發現出現崔建邦屋企，據同屋苑的鄰居透露，幾乎每星期都會見到她，次次都是的士出入，例牌戴帽垂低頭，好怕被人認出。
「其實 Natalie唔想俾人知佢同 Amigo復合，因為之前好多朋友都喺佢面前數 Amigo點唔好， Natalie怕啲朋友反對佢哋喺番埋一齊，所以佢唔肯認，仲同人講佢哋好耐無聯絡。」唐詩詠好友說。

全面停工的崔建邦要等候法庭宣判後，才會同 TVB商討復工，近日他經常駕車到美孚街市買餸，親自下廚氹唐詩詠。

崔建邦同唐詩詠由○五年拍拖至今，分手多次，但轉頭又復合晒恩愛。

發生毆打事件後，中巴多次公開哭訴她與崔建邦之間的感情瓜葛。分手後，中巴向傳媒發放了多張與崔建邦的親密合照。

本月初唐詩詠生日，《鐵馬尋橋》一班男演員包括鄭嘉穎、馬國明、黃家諾同林子善事前一日為她慶祝。

三離三合

崔建邦與唐詩詠在 05年一齊主持《 K-100》而撻着，一年多後，因男方轉軚戀上模特兒 Louisa而分手。 07年中，二人約會被撞破，揭發復合。
09年 2月崔建邦與徐淑敏拖手夜蒲斷正，唐詩詠提出分手，後來男方極力箍煲，又在唐母去世時幫手打點及安慰，成功復合。
09年 8月崔建邦在《打出十人巷》中認識「中巴」，兩人火速行埋，唐詩詠被迫退出，同年十二月發生崔涉嫌毆打「中巴」，案件在本月十八日上庭。