龜縮避席拒蒲頭 崔建邦繼續瘟女度日 樂易玲:call極都唔覆!
崔建邦龜縮不自愛,照肺密會一拖再拖,激到掌管藝員部的樂易玲紮紮跳,難怪連TVB總經理陳志雲亦嘲諷崔生要轉行,大家咪以為崔建邦會識驚,人家上星期繼續拖女撐枱腳,定生死?睬你都傻。反觀陳總另一愛將鄧健泓就積極好多,縱使一度被投閒置散,也耷低頭做好自己,結果獲陳總欽點開節目繼續有得撈。崔建邦,學嘢啦。
失去陳志雲眷顧,崔建邦根本無運行,生死大權轉交藝員部製作資源部副總監樂易玲手上,早前樂小姐接受本報訪問時,坦言覺得崔建邦形象差,有意勸他轉行,又或讓他轉戰幕後,從低做起。
勸崔建邦自愛
機會不是人人懂珍惜,崔建邦選擇龜縮避世,不願接受這個現實,據知樂易玲方面一直聯絡不上崔建邦,Call足五日都唔覆,雖然一個月假期早已期滿,但崔建邦繼續玩潛水,唔覆機、唔蒲頭、唔回應。
然而,崔建邦卻繼續瘟女,上星期,有人目睹他拖着新歡現身中環高級食店,兩人表現親暱,有講有笑,龜縮原來只限公事。
對崔建邦的「賴皮」表現,樂易玲顯得非常無奈,接受本報記者訪問時說:「咁佢Call極都唔覆,我可以點呀?連陳生(陳志雲)都叫我同佢講,叫佢轉行呀!(佢係咪怕被宣判死刑呀?)唔好咁講,其實我係幫緊佢,我都會聽下佢講嘢,然後由佢同公司立場着想,好似周永恒咁,佢都曾經犯過錯,但轉營都好快,依家唱下福音歌,之前同太太趙梓淇一齊做《心有靈犀》,大家對佢地都好受落。」
鄧健泓:樹大好遮蔭!
崔建邦唔愛惜自己,反觀陳總另一愛將鄧健泓就好努力,即使被冷待,仍努力做好自己,在《隔離七人情》飾演的bellboy及《刑警》中客串演出的雙重人格殺妓醫生,皆大受好評,亦因此重新贏得陳總愛錫,獲提前傾續約之餘,亦加重新劇《飛虎》戲份兼獲欽點開節目做主持。
曾考慮返內地當導演搵人仔的鄧健泓說:「唔會走,始終樹大好遮蔭,我一向都係咁,有嘢就做,希望未來拍更多電視劇,最想做一啲癲癲喪喪,情緒波幅好大的角色,做殭屍都唔錯。」
樂易玲有意勸崔建邦轉戰幕後,從而改變形象,可惜有人玩龜縮,樂小姐連續五日Call爆都唔覆。
愛蒲爛玩兼屢次犯下大錯,崔建邦都死性不改,難為連陳總都開聲叫他轉行。
反觀,陳總另一愛將鄧健泓(右)就默默耕耘。
崔建邦早前涉打前女友「中巴」,之後又涉及另一宗醉駕案件,形象插水。