因為心中有團火，伍詠薇自薦演無綫新劇《金枝慾孽貳》，硬撼兩屆視后鄧萃雯。不為獎也不為榮譽，純為自我挑戰，不過面對強勁對手，伍姑娘確有笠水（即驚青）嚇到腳震兼便秘的時候，惟有將勤補拙，至於有否想過要以獎項來印證自己的努力？伍姑娘得到好友袁詠儀鬧醒，知道切勿中計！撰文：羅美倫

■入行多年的伍詠薇，對這個行頭依然幹勁十足，希望在歷史上留名。攝影：陳慧安

近日播出的無綫劇集《金枝慾孽貳》女主角人面全非，伍詠薇憑着一團火單挑鄧萃雯，試圖以淳太妃這個造謠生事的大奸角留名，會不會感到壓力？伍姑娘說：「諗太多未發生嘅嘢就係畀壓力自己，做好自己部份至係首要，《金枝貳》同《金枝》係有關係，不過人物唔同，所以冇包袱去演、去唱主題曲，有團火多過有包袱！」

■伍姑娘與鄧萃雯（左）鬥戲，電視迷最有福。《金枝慾孽貳》劇照

初遇雯女腳震

為了演好角色的陰沉，性格開朗的伍姑娘將自己的性格調低，又參考不同年代、不同國籍的古代人物，她說：「我少做古裝，作為演員要全面，唔係淨係死補粉，出嚟感覺要真，啲花盤底鞋行到蝕咗，遇到石路起伏行法又唔同，惟有喺屋企揸住手巾仔係咁行，可能大家覺得出嚟冇乜嘢，人人都做到，但我蠢囉，一個小動作都要練！」

伍姑娘將勤補拙，皆因對手是兩屆視后鄧萃雯，她坦言：「開頭真係腳震?！第一次做咁重嘅古裝劇，自己未顧掂自己又有咁強嘅對手，開頭口都震晒，明明熟讀晒對白，開口就唔記得，同佢（雯女）對戲時，揸住劇本講乜都甩，佢眼神一瞄埋嚟，我已經唔記得下一句，左手將劇本攞起又放低，好似中風咁，緊張到控制唔到自己！雯女好壓場，我去到完全笠水。」正是遇強越強，將伍姑娘心中一團火燒得更旺。至於雯女透露拍攝時曾有抑鬱情緒，伍姑娘雖然沒有抑鬱，卻有其他問題：「我識處理情緒，永遠保持心情開朗工作，不過就有便秘！拍親戚其義嘅戲都去唔到洗手間幾日。」

■伍姑娘自爆為演好角色便秘，坦白得可愛。

■伍姑娘忠又得奸都得，可塑性甚高。

靚靚當頭棒喝

對於自己的演出，伍姑娘坦言感到滿意，問到目標是否視后？她笑笑說：「獎係錦上添花，我係想嘅，但明白有制度、有遊戲規則，唔係跑第一就攞金牌。」最初接演《金枝貳》時，伍姑娘的確想過獎項這回事，尤其前幾年做無綫親生女時，也曾獲視后、最佳女配角提名，直至聽好友袁詠儀、張智霖一席話，她如當頭棒喝，夢醒心變寬：「以前咪陪坐囉，雖然曾經親生過，但發覺親唔親生唔重要，哪怕係奶媽湊大，有人可以喺大陸或台灣紅番轉頭，你嘅爆炸力係你，你得人哋就會求你，點解要求人呢？好開心兩年前同袁詠儀、張智霖傾偈，佢哋話唔好中呢啲計啦，一場遊戲，唔好玩拋手巾咁，人哋單一單眼你就以為條手巾喺你背後，玩你咋！嗰下醒咗，我好多謝佢哋。」

醒覺後的伍姑娘，明白到要對自己有信心，求人不如求己，亦毋須質疑自己的能力，她說：「攞唔到獎唔代表演得唔好，亦唔係由觀眾畀分，最重要係自己知自己付出有幾多。」

服裝：Lane Crawford
髮型：Nichol Yip of Hair
化妝：Jovy Yiu of Make Up Forever Academy

唔當練海棠老公

■伍姑娘與老公練海棠相愛多年，相處之道是保持客氣。資料圖片

今年7月，伍詠薇與老公練海棠便結婚14年，她形容頭五年愛火燒得最旺，現在已用中、慢火去燴，讓感情細水長流，全因二人保持朋友關係，她說：「唔好當佢係老公，否則玩完，我會唔該前唔該後，中國人有心事唔會講出口，不過我行第一步乜都講，無論粗口同多謝。」

雖已是40歲+人妻，但伍姑娘強調仍有追求者，她笑說：「我講你可以嘔，但有啲醜婦都話有人追啦！」不過她懂得點到即止，不會讓不應發生的事發生，她坦言：「某程度同異性溝通點到即止都係滿足自己，着咁靚、keep好唔係畀自己，係證明一啲嘢。男人都一樣，我贊成女人埋佢身電佢，但我哋相處十幾年成日放電佢都悶啦，陌生人放電佢都會即刻企番直，枴杖都掟開，所以要開放啲，老公贒女同俾女贒都係我光榮嚟?！我哋都有傾呢啲，佢覺得我係聰明嘅太太。」

唔做唔知身體好

■伍姑娘（右）搞生意做女強人，請來老友陳敏之幫手。資料圖片

做無綫親生女期間，伍姑娘前年突然請假，轉型做商界女強人，開辦美容品牌，經兩年專心經營，生意都上了軌道，甚至跟無綫脫離親生關係，外間以為她這個轉變皆因心灰意冷，原來她心中那團火還讓她想得更遠，她承認想過將團火用在生意或玩樂上。

對於事業前景，伍姑娘說：「我冇諗過退出，只係唔想做到好老仲喺螢幕不停咁做，五十歲前我仲係眷戀娛樂圈嘅，因為我起步比人慢，啲火至啱啱嚟，??家至有機會掌握、揣摩啲角色，直至俾袁詠儀（靚靚）點醒咗，我知自己團火應該點用，唔做還好，做咗至知身體好，我仲係一匹野馬囉！」