好久沒有以花做相片構圖，因為好久沒有遇上襯得起花的年青女對手……綜觀娛樂圈，尤其是演戲的，擔得起大旗做女主角而又嫩口的實在沒幾個，蔣家旻， 23歲就已經能從電視箱跳到大銀幕，接連主演葉念琛的兩部電影《溝女不離三兄弟》以及《第一次不是你》，是個異數。

沒有又長又鬈曲的女神指定髮型、沒有戴o靓模不能少的假大眼、沒有梳化造型經理人助手跟到實、亦沒有每次快門都要照鏡補妝把每根頭髮弄貼伏，就是一個人，穿着一身白色露臂的連身裙，短髮淡妝、乾淨清爽，舉手投足一點不造作、回答問題還沒學會過分修飾、想笑的時候大笑、覺得委曲時說哭就哭：「媽咪唔明白我、唔明白呢一行，永遠都係用一啲負面嘅方法去激勵我，攞我去同啲一線嘅女演員比較……」

看到她本人，我開始明白，為甚麼更高?更性感更漂亮更有經驗的女藝人那麼多，李添勝和戚其義都要指定讓她演少女鄧萃雯和少女佘詩曼，葉念琛心目裏，她才是新一代「阿寶」（葉氏愛情片中女角專用角色名）……不止因為年輕，還因為難能可貴的簡單。

一步一腳印

傳媒注目蔣家旻，是從 11年《天與地》裏的嫩版阿佘，師奶認識蔣家旻，是從《愛．回家》的馬子妮。才冒出頭來兩年，就主演了兩部電影等住上畫，這條女主角路看起來超快捷，其實不然。才 23歲，蔣家旻已經出道七年、拍過 40多套劇，從 16歲就開始等，才等到這個機會。
「我自細鍾意做戲，小學最鍾意披晒啲絲巾上身扮《楊貴妃》；中學戲劇社排完戲上台，最享受嗰種冇 take 2嘅成功感；中五畢業第一時間去報演藝學院……我從來唔恨做 star，人哋一叫我做明星我就反感，我嘅夢想職業，係做演員。雖然演藝連面試機會都冇，我從來冇諗過去行第二條路。好彩個天閂咗道門，就會打開另一扇窗畀你，無綫嘅『 TVBeople』揀中我簽約。」
上千個應徵者中，大把演藝畢業生、能歌善舞、樣靚身材正，結果八個入選只得一個是女孩，就是 16歲的蔣家旻：「我同親媽咪去街，好鍾意留意街市人生百態，嗰日面試天才表演，就係做個令我印象深刻嘅街市 salon老闆娘，大大聲喺鋪頭門口派傳單……毫無準備，班考官反而覺得好笑。」
考官名單有樂易玲、王祖藍及宣傳部要員，咁都揀中原來亦唔代表一定有運行，簽完約結果都係要等：「 TVBeople嘅工作係幫 TVB拍宣傳片，有時一個月先得一日有工開，合約又唔同藝員有包薪，大半年時間係我喺屋企等，等完大半年，等到我對演戲嘅火差啲冇晒……入行七年，我最多時間攞咗去等，原來做演員，最緊要識得等。」
等了又等，好彩性格討好，去到哪都有人關照：「喺綜藝組，佢哋知我偶像係森美，特登派我去做《 15/16》嘅獎品小姐；拍《娛樂 I Love You》，就識咗 JJ(賈曉晨)嘅助手，得佢推薦，我第一次拍劇，喺《移情別戀》做袁詠儀個女，唔係佢，添哥同戚其義就未必會有機會見到我；冇呢個開始，珍姐（曾勵珍）就唔會畀我做《愛．回家》入到屋……有時等係好辛苦，但係其實唔係白等，每個地方都有機會、每日都係機會訓練同長進。」

繼鄧麗欣、佘詩曼、周秀娜後，蔣家旻成為葉念琛電影新一代阿寶：「當時有成四十個女仔 casting，導演話個個都話自己 ready做女主角，反而係我平常心但係眼神倔強，最似佢心目中嘅阿寶。」

《第一次不是你》後， 10月蔣家旻再有《溝女不離三兄弟》上映：「第一時間話畀媽咪知，佢眼紅紅話最開心係我終於爭番啖氣。」

女兒的眼淚

輕描淡寫的幾句，其實已經從 16歲等到 23歲，花費了 7年青葱歲月， 7年間，為了等，跟媽媽的磨擦沒少過。處女作《第一次不是你》，說的是初夜被迫交給嫖客而不是初戀男友的遺憾，我問蔣家旻現實中有沒有遺憾，她一說，就開始掉眼淚。「套戲係個女仔為幫媽咪籌六萬蚊醫藥費走去做高鐘（高級私鐘妹），我唔係做到出晒面嘅孝順女，成日駁媽咪嘴，但係駁完嘴一個人時又會後悔，覺得自己做得唔夠好，萬一有日突然失去，一定會覺得好遺憾……」
蔣家旻說，自己是獨生女，出身小康之家，父母低調平凡，一世人老實穩陣，亦最想自己穩穩陣陣，尤其是媽媽，入行前大力反對，入行後諸多不滿，蔣家旻話入行發展不如意時，最大的壓力來自媽媽，一說就哭、愈哭愈傷心：「佢最鍾意攞我同啲一線嘅比，點比啫？人哋背景好後台硬邊有人知？人哋命生得好又點比？佢把口係咁，其實最緊張我，有我嘅雜誌實會買、次次有劇上佢都話唔夠喉，做咩剪剩咁小，我辛苦嘅時候，又係佢煲湯畀我；啲衫，又係佢偷偷哋攞咗去用手洗，其實媽咪都要返工……所以一有開心事，葉念琛揀中我做女主角，我第一個諗到就係打畀媽咪，試映飛，又係第一個請媽咪去睇。嗰晚，媽咪微信我，話我啲戲由頭帶到尾，終於唔使俾人剪晒，佢話嗰晚開心到瞓唔着，話真係當咗我係阿寶，覺得我好命苦……」這個時候，蔣家旻已經哭到眼淚鼻涕一起來。可以想像，坐在電影院裏，全程看着自己女兒個人表演的 95分鐘，對一個母親來說有多夢幻。

07年同屆藝訓班，有黃智雯、何傲兒，蔣家旻話媽咪最愛比較：「你睇吓你人哋又係出道七年，人哋已經做到一線啦！」一講媽咪，就喊唔停。

11年尾，在《天與地》裏扮演少女佘詩曼，是蔣家旻的上位作：「睇落順利，其實套劇 09年拍完等咗兩年至出街，之前大多角色連名都冇。」

16歲一簽約先入綜藝組：「個個都知我偶像係森美，所以派我幫森美做獎品小姐。森美都對我好好，拍《森之愛情》都有預我做閒角。」

真的戀愛了

幾個月光景，從電視台小花晉升電影女主角，蔣家旻說，常要提醒自己，不能忘了謙卑、不能忘本：「最辛苦，係電視劇同電影疊住拍，日頭拍劇、通頂拍戲，明明凍到有寒流，電影又要着背心短褲扮夏天……不過再眼瞓再攰，我一次都冇試過甩底、瞌眼瞓同忘記劇本，一入廠，我再攰都要迫自己做馬子妮，精神活潑番；眼見有啲人，去到某啲位就揀嘢、推嘢，我都要提醒自己，唔好睇得自己太高。好似第一次拍戲就遇上床戲，我都覺得唔算得係乜……你睇吓湯唯，男朋友同佢分手，都照拍《色．戒》啦！」
外表柔弱，蔣家旻實際有膽識得多，處女作就真空露波邊拍床戲，不過拍完，未夠膽叫真命男友、無綫新人朱敏瀚（《點解阿 Sir係阿 Sir》 K4之一）入場睇：「佢唔鍾意?，我諗如果我去拍李安，唔使問……一定分手。其實拍拖，我好介意俾人知，我哋兩個都努力緊、等待緊機會，焦點擺喺我身上，對佢唔尊重唔公平，我又驚人哋覺得我想用感情做新聞。
「我真心驚，緋聞、輿論一定會對一段感情有影響，女人工作多過男仔，一定會有閒言閒語……如果兩者之間得唔到平衡，我覺得，幸福比事業，更重要。」

年初與朱敏瀚戀情曝光：「我信傳媒有能力會改變一段關係、會動搖人信心，所以其實我唔想認拍拖。」

入屋作《愛．回家》拍足兩年，拍到同劇中兄長羅天宇傳緋聞：「開頭都驚拍處境劇會少咗第二啲機會，其實《愛．回家》帶畀我嘅收穫最多。」

變變變生命力

從 16歲等到 23歲，蔣家旻說自己沒有變：「我相信自己唔會變，朋友都係嗰班，夢想都係做演員，我相信自己本質，就算位置變咗，都唔會咁容易變。」
話口未完，本來話底線係露波邊，我假設有一天拍戲組合是李安和梁朝偉，蔣家旻話：「呢個組合，係每個演員嘅夢想，真係俾我遇到，我應該會去馬（全裸）」。係囉，沒有甚麼是不會變的，所以說， 23歲的蔣家旻，只在當下。

撰文：朱小博
攝影：范仲良
髮型： Leo Yiu@OsmosishairR
形象： Becky Chan
服裝： Snidel

（FACE週刊 第326期）