十年過去，浩瀚煙波裏，群星懷念梅艷芳的情懷未變。阿梅出名重情義，背後的男人至今對她並未忘懷，摯友劉培基難忘阿梅在深切治療部留醫時，眼裏依依不捨的目光；舊愛林國斌曾跟阿梅亡命天涯，可惜兩人性格火星撞地球，有緣無份；近藤真彥是阿梅的一生最愛，阿梅甚至堅持見近藤一面才肯入院做手術。

■不經不覺，一代歌后梅艷芳已離開大家10年，歲月雖留不住，可是她的風采和歌聲永遠銘記在人們腦海裏。

劉培基：陪度最後日子

著名時裝設計師劉培基，一手創立百變梅艷芳形象，他陪阿梅走過21年甜酸苦辣，陪病床上的她度過最後日子，有情有義的阿梅臨終前立下遺囑，將跑馬地毓秀大廈及倫敦物業送給劉培基。

十年前03年12月30日凌晨2點35分，呢個時間一生忘記唔到，雖然法醫官宣佈係2點50分，但其實梅艷芳離開我哋係2點35分，因為通知法醫官上嚟檢查，所以遲咗15分鐘；十年一眨眼就過，好多人同我講，唔好諗咁多嘢，但我陪佢經歷咗一生，點可以話放低，對我嚟講呢十年係遺憾！

好記得當日我喺廣州，做完羅文尾七返家，夜晚兩點幾收到梅艷芳電話，佢話體檢報告出咗，醫生話病情相當嚴重，我叫佢唔好講，怕自己唔喺佢身邊，佢諗得太多，第二日我即刻由廣州返港去佢屋企，佢坐喺床尾梳化，我乜都冇講攬住佢，佢伏喺我度喊，當然係非常難過，佢話因為婦女病，醫生話機率得3、4成，要佢盡快做治療，佢見家姐又係呢個病，唔想經歷嗰種痛苦，但唔睇醫生唔得，所以由睇中醫開始，我陪佢去上海、蘇州睇病。

■劉培基和梅艷芳情如兄妹，共嘗人生甜酸苦辣。

難忘不捨眼神

後期梅艷芳唔睇西醫唔得，因為腫瘤影響佢去洗手間，佢會辛苦，睇西醫做電療，腫瘤消失咗，佢仲好開心打電話畀我：「冇咗囉！」成個人精神晒，佢覺得自己又得啦。佢真係好勇敢、堅強女仔，對生命意志力非常犀利，明知自己嘅病去到咁危險，仲可以做咁多工作，後期佢唔戒口，我唔能夠阻止佢做乜食乜，呢啲係佢心願，惟有支持同陪伴佢，佢話：「做化療好辛苦，如果面前有杯毒藥，相信你做我，你都會飲咗去。」

睇住佢生命一點一點流走，只能夠無奈，佢完成最後一個演唱會，之後去京都拍廣告，佢身體真係接受唔到，更加怕凍，返港即入院，其實最初入院兩三星期，佢狀態係ＯＫ，仲可以成日發訊息，約朋友嚟探佢，其後病情好反覆，要入深切治療部，醫院唔畀陪過夜，我走嘅時候，佢眼神好唔捨得，我呢世都忘記唔到。

12月24日下晝4點幾，我去到醫院，見到梅艷芳契媽、助手表情怪怪哋，我覺得唔尋常，之後醫生同我講：「劉先生，今日可能要同梅小姐插喉，咁可以幫助佢冇咁辛苦。」當時我唔太理解插喉係乜嘢事，見佢插喉後好似更加唔舒服，我打電話畀契爺醫生，佢話插喉應該仲有一個禮拜，我呆咗，嗰晚冇法瞓覺，第二朝7點返養和，見到佢好攰，望吓我就瞌埋眼，由嗰日開始，佢生命一步一步……無可奈何！

直至29日下晝，醫生話：「你哋多啲陪梅小姐，佢應該係呢幾個鐘頭嘅事。」我無言以對，由嗰時開始，唔知邊個打電話畀梅艷芳朋友嚟探佢，佢係鍾意熱鬧嘅人，有緣就嚟探佢啦。當時傳媒朋友都收到消息，嗰7、8個小時，整個香港好似震撼咗，大家只能夠陪佢，佢眼珠一直睩睩睩，我問醫生點解？醫生話係神經線正常反應，佢唔係因為見到人，直至凌晨2點幾，突然見佢助手Donny衝出病房搵醫生，我睇到機器一條線，我知時間到咗，衝埋去佢耳仔講：「唔好再擔心，我哋有緣一定再見，你照顧好自己。」

遺囑另有意義

嗰時已經好多喇嘛為佢誦經，喇嘛話要為佢誦8小時經，唔能夠郁動佢，姑娘就幫佢拆喉，我落去親口同傳媒宣佈：「梅艷芳已經走咗！」凌晨4點幾返到佢屋企，動物真係有靈性，佢嗰兩隻肥貓，由我入門、沖涼到喺梳化椅瞓覺，兩隻肥貓冇離開我一步，第二朝7點我返醫院，11點幾誦完經，我陪佢去香港大酒店，成個人麻木咗，完全唔想有感覺！

佢走咗之後……其實唔應該講，但畢竟係事實，我諗唔到佢立份咁遺囑，我唔係贏咗事業上嘅百變梅艷芳，而係一份遺囑裏面，估唔到自己多咗一個小妹妹，自己由細一個人長大，從來冇家庭，估唔到遺囑得到一份關愛，啲人講戲子無義，梅艷芳將呢句說話推翻。

梅艷芳係屬於香港，能歌善舞，能夠壓場，舞台女王非佢莫屬，百年才出佢一個巨星，我陪咗佢21年，由佢19歲出道到40歲離開，由佢第一件參加東京音樂節服裝，到最後一件入棺服裝，都係我一手做，當年華星搵我幫手做梅艷芳，我知道佢4、5歲出嚟唱歌，佢嘅經歷我似曾相識，因為我8歲開始獨立生活，我哋為咗生活幾乎冇咗童年，所以我係用心造佢。

「永遠係小妹妹」

人同人之間相處真誠好重要，雖然佢有時令我好激氣，佢係極為反叛嘅人，佢喺我面前唯一一次反叛，就係佢食煙仔，因為佢唔知道我反應會點，嗰次有公事上佢屋企傾，佢話心情唔係太好，工作壓力大，感情唔係咁順利，之後佢點煙食，我唔係唔鍾意人食煙，但當時好多謠傳佢吸毒紋身，佢係極度聰明女仔，部署咁多嘢喺我面前食煙，我只能夠當睇唔到。

佢喺人哋面前係大家姐，但喺我面前係唔可能嘅事，佢一出道已經知我係有脾氣嘅人，我永遠唔賣帳，佢對我嚟講永遠都係小妹妹，佢所有開心唔開心，我都陪佢經歷，92退休至02年，佢唔係咁開心，冇咗之前開心會飲酒唱K，佢冇晒興趣，因為佢成熟咗，諗嘢多咗，快樂少咗。佢走後所有風風雨雨，我都一力承擔，好多謝生命曾遇到咁出色嘅梅艷芳！

口述：劉培基
筆錄：余燕儀

林國斌：阿梅私下好溫柔

■林國斌欣賞阿梅有義氣，現在也常為舊愛念經。

86年林國斌認識梅艷芳，90年相戀，卡拉OK事件後他陪阿梅亡命天涯，那半年兩人緊密相依，曾想過返港後結婚，怎知卻是分手收場！阿梅走後，林國斌經常都往省善真堂拜祭，為舊愛念經。

我做龍虎武師時識阿梅，當時對佢一啲感覺都冇，幾年後我家姐過身，當時明星足球隊叫我出埠，我心情唔好唔想去，佢哋捉我去，阿梅見我悶悶不樂，佢知道後安慰我，傾咗幾粒鐘，我先知佢私下好溫柔，大家交換電話，好自然開始。

我哋一齊有好多深刻日子，第一次約會去BBQ，大家都唔識起爐，搞到倒瀉籮蟹；有晚我揸車同人嘈交，呢個女人真係義氣仔女，佢驚我唔夠人打，衝落嚟攞支棍畀我；我同佢一齊之後，搬去佢屋企住，我有次話想食羊扒，嗰晚佢唔得閒，第二日我要開工，佢問我幾點返？返到屋企見到佢點咗好多蠟燭，好浪漫，佢仲着咗晚裝，我問搞乜？拍戲咩？阿梅詐型話：「搞錯，人哋咁有心機！」我嗰時細個唔識欣賞，o依家諗番好sweet。

結伴亡命天涯

佢鍾意浪漫，但我好似冇送過花畀佢，記得有次情人節仲俾佢鬧，因為佢瞓張床褥好軟，佢成日話瞓到腰骨痛，我用萬幾蚊買磁力床褥送畀佢，點知俾畀佢鬧餐懵：「邊有人送床褥，梗係送花嘛，卡都冇張。」我哋拍拖3年，但冇同佢求過婚，只係曾經有共識，當時因為卡拉OK事件，我陪佢離開香港半年，呢段日子好刻骨銘心，雖然唔關佢事，但搞到咁大鑊，佢有好多顧慮，擔心牽連到家人同我，佢唔係驚，亦唔怕死，佢話：「如果我死咗，可以幫到人，我唔怕！」我都叫勇猛，但佢某程度唔怕死過我，當時我提出陪佢離開香港，初初佢話唔使，怕牽連到我，但我覺得一個女人浪迹天涯好慘，一定要有最相信嘅人喺身邊。

當時我哋相依為命，去過塞班島、泰國、馬來西亞、新加坡，後期住喺新加坡朋友屋企，我哋唔識煮飯，多數食飯盒，最多係煮公仔麵煎蛋，嗰段時間盡量少出街，非常之悶，唯一娛樂行海濱公園。

因為朝夕相對，我哋了解非常深，大家都係臭脾氣，分手原因都係嘈交，嗰半年我哋好掛住香港家人朋友，大家都有思鄉病，不下一次提過返香港不如結婚，返香港後大家好珍惜大家，但佢太緊張我，變咗好多嗌交，兩日一大嗌三日一小嗌。最大問題係佢太鍾意照顧人，所有我起居飲食都照顧晒，唔知係咪大女人，逆佢意唔鍾意，但我大男人，唔鍾意俾人支配安排，初初嘈交我就揸車出去，返自己屋企唔理佢，佢諗咗一招唔食嘢，最耐試過兩日兩夜，我即刻投降道歉，佢眼濕濕攬住我，之後我就唔敢再走咗去。

o依家諗番都可惜，嗰時一齊亡命天涯，點解返港唔夠一年就分開！分開後，初段時間受情緒影響有啲唔開心，時間耐咗可以做番好朋友，加上佢家姐走咗，佢好唔開心，冇男友喺身邊，心靈上想人安慰，唔知係咪呢個原因佢諗起我，大家聯繫緊密番，一星期通一兩次電話講近況，但只係朋友間關心。

口述：林國斌
筆錄：余燕儀

連炎輝：手術前見近藤

■連炎輝（左）介紹阿梅與近藤真彥認識，造就一段情緣。

從事保險業的連炎輝，當年經羅君左（斌仔）介紹跟阿梅傾保險，自此兩人成為無所不談的好友，他暱稱阿梅做「女士」，還介紹阿梅的一生最愛──近藤真彥給她認識。

當年係斌仔介紹佢同我傾保險，識咗後成班一齊玩，佢好鍾意半夜打電話畀我傾偈，係我介紹佢識近藤真彥，當時華星安排近藤嚟香港做騷，因為演出要買保險，所以我識咗近藤。嗰次我叫女士同哥哥（張國榮）陪我去慶功宴捧場，女士話：「咦！細路仔（近藤），唔去。」結果兩個都有陪我去，之後介紹佢哋識，開始交換電話，嗰晚佢哋有少少觸電，之後佢覺得近藤唔係細路仔，都幾大男人又有風度，有時過日本探佢，有次近藤又嚟香港，大家約去disco飲嘢，佢哋就開始拍拖。

隱瞞病情

女士日文同英文都係有限公司，但佢哋電話可以講四個鐘，之後我哋又聽佢講番四個鐘，嗰段日子佢真係好開心，佢仲喺日本買埋樓，有次近藤喺日本做巡迴，我同女士秘密去日本，近藤安排我哋跟住佢巡迴，女士就會將身份降到好低，變普通平民混入工作人員。

之後可能佢哋兩地相隔，各有各忙，時間耐咗感情淡咗，但分手唔關中森明菜事，分手後女士都傷心，但佢明白呢段感情唔會開花結果，後來知近藤結婚，有送花祝賀恭喜佢。女士同近藤感情好特別，佢臨做手術前，都專登飛去日本見近藤，之前佢一直唔肯做手術，大家o氹佢做手術，佢話：「除非你安排我見近藤一次。」7月我陪佢去日本見近藤，咁啱係近藤生日，大家約飲茶食飯，佢見到近藤都好開心，但女士冇同近藤講自己有事，唔想覺得係病人要特別呵護。直至佢走（死）咗，近藤先知道佢有事，晴天霹靂嚇到佢死，問點解當時咁病重都唔講畀佢知？

口述：連炎輝
筆錄：余燕儀