袁詠儀（靚靚）敢言性格從未變過，早前就因與老公張智霖（Chilam）打賭視帝一事跟網民駁火，眼看好友伍詠薇為虛無的榮耀鑽牛角尖亦冒死相諫，護夫護友，毫不留力，但為做兒子魔童的好榜樣，敢言之外現已學識認錯。

袁詠儀與網民駁火，源於與老公張智霖打賭能否贏得視帝，結果Chilam大熱倒灶敗在黃子華手上，賽果令她贏得鑽石手鈪。

■靚靚向來敢言，但為做囝囝的好榜樣，現已學識認錯。

嘲老公中計

其實靚靚早睇通遊戲規則明知自己冇得輸：「就算畀都唔會畀張智霖，我貼吳鎮宇，佢好大膽同我賭，其實老公贏輸都會送畀我，只不過係我哋之間嘅樂趣，我想要樣嘢唔知用乜理由，難得佢唔信我嘅預測，我分析佢聽，以佢嘅戲份、同無綫關係、人哋公司嘅作風同行政，好少畀呢類人，佢認同但要挫我銳氣同我輸賭，其實中咗我計。」

Chilam當晚的義氣仔女言論令人感覺「有骨」，靚靚繼續維護老公：「佢唔係好識講嘢有骨，我講可能有啲骨，我問過佢點解咁講，佢話行到出去嗰刻想咁講就咁講，我信佢，都幾寫實吖，出外靠朋友都係咁意思，兄弟又點，有時講義氣係你朋友。」事後靚靚「多謝」無綫被指兩夫婦輸唔起，即時與網民展開罵戰，難道不怕得罪米飯班主？靚靚說：「佢哋過份認真，我覺得係遊戲一場，唔緊要，每個人有言論自由，講人屋企就好介意，覺得你嚟搞事就奉陪到底！」

靚靚不只錫老公，對朋友同樣愛護，伍詠薇拍《金枝慾孽貳》時，靚靚也向她潑冷水：「嗰排睇到伍姑娘唔係我認識嗰個樂天嘅佢，突然好在意人哋對佢嘅睇法，忽略拍戲嘅樂趣，我唔想朋友鑽牛角尖，講呢啲說話可以冇咗個朋友，潑佢冷水叫佢唔好睇獎咁重，就算畀你又點，唔畀係理所當然，睇得重我驚你會黐線，我提醒佢萬一係咁唔使介懷，做得好係觀眾最認同嘅，未必係獎項。」

開口得罪人

靚靚從來有嗰句講嗰句，不怕得罪人？她笑說：「梗係唔係啦！你估我唔驚俾人斬俾人潑鏹水咩！唔係話怕，我都唔想得罪人，改緊㗎，但冇辦法，我個口快過個腦，o依家好咗，識得say sorry，以前講咗就算。」靚靚有所改變，為的是要做兒子魔童的好榜樣：「勇於認錯因為佢，錯咗say sorry佢會睇到，要畀佢知道個責任。」

期盼退休添丁

■靚靚直言想再生多一個，但還沒有和老公達成共識。

張智霖憑Cool魔再上事業高峯，靚靚即時減產多親近兒子，她說：「梗係畀佢做多啲啦！我呢啲最好，年輕退休又有錢，最期盼呢樣。」她很欣慰老公簽了間好公司，更放心讓老公全心全意工作：「我唔係偷懶，要兼顧個仔，唔可以完全唔理，走咗幾個月，真係會有啲曳，佢唔係想曳，只係父母唔喺身邊想人注意，試過佢話媽咪嚟同我食晏，同學仔啲媽咪都有嚟你冇嚟，聽到好痛。」問到會否再多生一個，靚靚直言：「想㗎！但大家未達成共識，老公想陪住個仔成長，如果生多個未必得，佢唔想，仲未過到嗰關。」

服裝：Isabel Marant
髮型：Herman Law of ii hair& nail
化妝：Kerry of Zing makeup school