由鄭嘉穎同胡杏兒主演嘅《怒火街頭》叫好又叫座，無綫趁勢原班人馬開續集。不過，由於之前劇中演索腿天后嘅陳敏之已經魂歸天國，無綫惟有搵另一女角嚟襯男主角之一嘅李璨琛。

有傳無綫有意搵同嘉穎拍過拖嘅佘詩曼襯李璨琛，陳敏之亦開晒口建議翻生做索腿天后孖生細妹，但其實無綫早排已密斟劉心悠演出。只係劇本斟好晒，劉心悠方面亦度好晒期，點知無綫臨時要劉心悠簽一年藝員合約，劉心悠唔甘心拍一部劇就俾無綫綁足一年阻住銀，所以最終都係拉倒；與劉心悠拉倒後，馮仁昭聽聞近日無綫已同卸任港姐亞軍張秀文試戲，搵張秀文嘅話，點都好過要李璨琛硬啃「豬扒港姐」陳庭欣同莊思明嘅。

無綫本來斟咗劉心悠拍《怒火 2》，點知埋門一腳因為簽約問題而撻 Q。
資料圖片

陳敏之喺《怒火》同李璨琛係情侶，但劇情要佢意外身亡，無綫惟有幫李璨琛另覓對像。
劇照

上屆港姐亞軍張秀文有機接替陳敏之演《怒火 2》。

不想簽一年約

日前馮仁昭打電話向劉心悠經理人王小姐求證，佢承認無綫斟劉心悠拍《怒火 2》。王小姐話：「佢哋有搵過心悠，基本上傾過故事大綱，劇本大家 OK，做嗰個有興趣， TVB又有興趣搵呢個人，但一講到合約條款就 kick咗喺度。我哋唔會覺得 TVB無理，始終 TVB有自己政策，但合約會有好多掣肘，要拍呢個劇簽一年未必做得到。不過，大家絕對冇不愉快，今次合作唔到，都希望將來有機會再合作。」