亞視56周年台慶Logo似「死」字 盛品儒死撐唔似

噚日,係亞視同球星岩布仙尼嘅生日,雖然亞視就冇叫岩布仙尼唱生日歌,但假假哋都叫搞咗個「台慶節目」,喺停車場又砌牌又唱下歌仔咁,好過冇啦…

要知道,亞視都「重金」買咗4場自稱「重量級」嘅球賽直播,而且又重新做過個網頁,仲搵人設計咗一個56周年嘅Logo,噚日砌牌都有見到,但就唔多清楚。亞視近日就喺電視播出一段祝ATV生日快樂嘅片段….不過個Logo一出,網上就瘋傳,點解?因個Logo似足個「死」字….網民意見如下:

「生日死死聲,打破傳統。」
「留名恥笑亞視」
「亞視一死,仲邊有話題攞嚟笑」
「咁中意重播,可唔可以重播岩布仙尼生日快樂?」
「我諗如果係in house,designer做完個job之後跟手笑住遞辭職信;不過亞視點養得起designer?out source 咋?」

好擔心個Designer呀!

亞視56周年台慶Logo似「死」字 盛品儒死撐唔似
似….唔….似….個….死….字…..呀?

盛品儒:唔似死字,人哋就死

亞視56周年台慶Logo似「死」字 盛品儒死撐唔似
盛品儒死撐話個Logo唔似死字,網民應該唔會同意啦!

今日網上熱傳亞視56週年Logo圖片….點解?因為個Logo人人都話似個「死」,大吉利是咩!

網民仲擔心設計Logo嗰位Designer嘅安危,今日盛品儒話設計Logo位仁兄係亞視美術部人員,他不認為Logo似「死」字,指網民想像力豐富而己,佢今日受訪話:「我哋管理層有審批過,唔似死字,反而覺得設計充滿現代感同美感。人哋就死,亞視會繼續生存。」認為網上熱烈討論證明好多人關心亞視,不過佢就唔排除遲啲會順應民意略為修改。