日前本報踢爆亞視「召集」員工喺11月11日，下午4點至5點，喺政總門外集會，反對發牌俾魔童王維基嘅城市電訊。亞視唔少員工紛紛投訴，話公司迫佢哋去示威，亞視就一直冇回應。

示威，就一定要標語，咁究竟亞視今次會有咩口號「俾員工嗌」呢？犀利，有二五send咗份內部通告，subject係「關注香港未來」，話係亞視send俾員工，要佢哋務必出席(係咪堅架？個個去晒咁個台咪真空？)。附件仲有埋標語俾大家「參考」，包括﹕「反對增發免費電視牌照」、「支持亞洲電視」、「亞洲電視 穩步向前」(台慶宣傳標語？)、「反對香港媒體台灣化」等。更神奇係呢句﹕「ATV TVB收視人口四六開」真有其事？

至於大會口號，就話係「關注香港未來，反對濫發電視牌」。如果屬實，真係衝住城電而嚟喎﹗

動員，晒冷，製造輿論，逼公權讓步——如果呢個真係亞視發俾員工嘅電郵，只能說兩個字……張家輝講過嘅呢，你一定明嘅。

有二五爆料，指亞視send電郵俾員工「動員」佢哋去政總，仲俾埋標語。

呢啲疑似由亞視發俾員工嘅集會標語，見到唔可能唔笑。

疑似亞視電郵

聲稱係1111政總集會口號。請問，樣為之濫發？王維基等咗三年喇﹗

亞視度標語迫員工用？ 網民送番俾你﹗
2012-11-09 23:52:08

亞視噚日向員工發電郵，「動員」大家11月11日去政總「反對政府濫發免費電視牌」，連宣傳標語都幫大家「度好晒」。ATV咁用心良苦，有網民亦馬上回禮，為亞視度身訂造一批標語，反亞視反對政府發免費電視牌照。仲話歡迎轉載、列印及製成紙牌添。

以下都係熱血網民自創，部份太「率性」，唔出得街。
– 「仆你個街 亞視嚟嘅。」 (張家輝金句)
– 「亞洲電視 狗肺狼心」 (網民話係回應佢嗰句宣傳口號「香港良心」喎！)
– 「ATV焦點 擺明係老點」
– 「ATV焦點 收視得一點」 (可能只有0.5點)
– 「杜汶澤：我以在亞視出身為恥」 (阿澤在反國教時講過的)
– 「吹水收視四六開 查實異想又天開」 (亞視話自己同CCTVB收視「我四你六」喎)

仲有其他……歡迎網民繼續度度。