《求愛大作戰》Vivien食鮑魚事件 Sharon向Rocky公開道歉

《求愛》Vivien請「食好嘢」事件 有機會重演!

噚晚《求愛大作戰》中金句「No…Not this way,Crazy!The other way!」呢句嘢係由富二代Justin所講。話說噚晚個集《求愛》4盛男4盛女去咗印尼龍目島展開海外之旅。

其中一pair係Justin孖住Vivien,話說佢哋去到一個checkpoint,要睇啲好高嘅嘢,咁點?Vivien就好叻咁諗到係用騎膊馬!不過個騎法就真係新穎,要Justin跪低,面對面俾Vivian「上馬」。即係話,Vivien嘅「敏感部位」,會對正Justin塊面。事後Justin都忍唔住話:「有冇搞錯呀,邊有人咁樣騎膊馬0架。」呢啲,大家噚晚已經知道晒啦。

之不過咁喎,其實呢,每晚《求愛》之後,喺YouTube都有個After show檢討賽果,就係成班《求愛》仔仔同囡囡圍埋一齊、喺webcam前同網民交流交流。不過每集都成個鐘咁長,只係見成班人喺mon前嘈嘈閉,真係冇乜心機睇。噚晚成班仔當然有「檢討」Justin同Vivien呢單離奇「上馬」事件。幾乎貞操不保既Justin話:「邊個會咁樣做?諗都諗到啦!嗰時幾嬲呀!」

至於置身事外嘅Rocky就話,如果after show呢條片有5000個view,就會重演事件!!!唔係嘛,咁重口味?Justin就話:「做咗和尚,乜嘢海鮮乜嘢肉都唔想食喇。」

睇嚟Justin對Vivien一啲都唔心動!Vivien,死心吧啦,仲講到當人哋係老公咁!!!

《求愛大作戰》Vivien鮑魚事件 有機會重演!
Vivien呢一下,嚇親Justin!

笑完人扮friend又搲贊助 《求愛》媒味濃

《求愛大作戰》話題愈來愈多,由開頭綠魔Karl,到幾位港女無理批評,再到噚晚Vivien「硬上馬」等等,集集都有新鮮爆點。

唔係hardsell緊大家去追睇,而係相信大家愈睇,就愈覺得《求愛大作戰》好似有9成以上都係造媒,無論係一班參賽者好積極咁用自己fb宣傳,甚至加開fb專頁,日日都喺度講《求愛》,好似Rocky咁,每一日都會講吓《求愛》嘅嘢,仲開post搲贊助,真係無綫包薪藝員都冇咁積極喎!而且一班盛男盞女仲成日搞包場開派對齊齊睇住個節目,傳媒嚟採訪更加無任歡迎啦!好似今晚咁,又約埋食雞煲睇《求愛》喇。

其實上兩星期,被Foul嘅「白馬王子」Vincent都話:「節目內容唔係我自己諗法。」又講到明節目鼓勵佢哋講某啲特定嘅對白,佢話:「節目太正路冇人想睇,每個節目都要有奸角,我講有啲嘢畀無綫剪走咗。」係咪做媒,自己諗。Vincent講到嘅角色扮演,今次《求愛》更明顯添啦。

上一次真人騷《盛女大作戰》嗎?Mandy係媒,Bonnie都係半個媒,本身都有參加網台節目,真係參賽者,其實只係有Florence,Gobby同Suki,當時,一班盛女有冇咁積極呢?真係驚俾人起底,fb閂都閂唔切啦!Florence仲搞到俾教院停職添!

反觀今次《求愛》,配套真係太「充足」,上一集俾人鬧嘅元素,好似俾人狂插嘅Santino,今集就整個綠魔Karl,而「港男港女」呢個永遠都拗唔完嘅話題,自然會有人分擔呢個角色,就係Sharon同Vivien啦!至於各人嘅facebook,更加係日日更新日日有花臣,你寸我我寸你,邊忽似真人騷?似做媒就真。仲有,Rocky之前都講咗,佢係因為監製岑應先至做呢個節目,又係一早就識,情況同《盛女》Mandy好似。

講開女,噚晚港女Sharon喺《求愛》aftershow,仲同一班盛男齊齊笑爆Vivien「上馬事件」,但轉個頭,今日又開post話Vivien好慘。唔係精神分裂,就係做戲囉。跟住呢,阿佳又幫Vivien講好話:「其實我哋不斷同佢(和VV)講好說話,因為我哋係真心朋友。」、「VV心地好好,好夠義氣,好LOYAL。」

片入面又互相嫌棄,aftershow又笑爆人,但又幫口話對方好人好女仔,其實都明「真人騷」都係「騷」一個,但幾多「真人」幾多「騷」呢?太過做媒,觀眾都係當睇戲,你睇mytv而家個廣告就食正係speed dating廣告,最終大贏家,點都係TVB!


阿佳fb專頁,開放俾人追蹤,要宣傳都易好多。


依家又幫Vivien口,話佢係好女仔。


都要密切留意報章報道。


就好似「盛女」俾人話宣傳speed dating一樣,今次更加擺到明賣廣告,食到應。


連去食雞煲都要公告天下,真係積極到呢….


成日講we can do it做乜呢?如來係Rocky等人搞出來嘅其中一個project,………..


Sharon唔係明星,但都想搲贊助。

Sharon向Rocky公開道歉 演變同阿佳爆罵戰

噚日一集《求愛大作戰》嘅精采荒淫…丫唔係,係荒島遊戲,睇到網民眼都凸晒,因為幾段情節都好鬼誇,最後一段講到Sharon同Rocky等人勝出遊戲,唔使去荒島過夜,可以撐枱腳食自助餐。

點知,Sharon港女格又現形,又話Rocky個樣「岩巉」喎,仲嫌棄同對方食飯,未經修改對白如下:

「有人請你食飯,你望住佢個樣,都要食得落至得o架!我唔係話Rocky個樣真係好差好差,但係就始終佢可能塊面上面就…即係比較多岩巉嘅月球表面位啦。

你望到佢個樣你會……如果唔望實係OK,但係望實好似你會食唔落飯囉。Vivien有講過話,不如Rocky,我俾錢你去整容啦,整好咗先至同我食飯啦。」

哇,使唔使咁講嘢呀?咁樣一講俾網民鬧爆都係意料中事啦,唔知係咪知衰呢,今日就喺fb道歉喎,佢寫住:

「關於昨日節目出現的劇情,她(Vivien)並不介意大家對『鮑x事件』跟『仍不知情』而取笑,她亦笑言而對,但她很在意男參加者們串謀對策一起去戲弄她或言明不想跟她同隊,此事對她自尊心造成極大傷害,希望可以在此表明她心理上真的受到傷害。本人在此亦向黃先生(Rocky Wong)致歉,對於本人無禮的言論而對該人士之傷害,深表歉意。」

不過阿佳就喺fb回Sharon話:「我很好奇,你打這段文字的時候,客觀上希望它有甚麼功能?致歉原本是改善形象的方法。我說原本。

例如我為自己過去自以為是的性格或言行,真心誠意地認為十分不該,於是我以行動改過,表達歉意,然後獲他人體諒和機會。…『該人士』?會否讓人覺得太單單打打呢?」

之後Sharon就回應話:「在此致歉純粹用於道歉立場上,本人昨日而在黃先生面前鄭重地表達了自己的歉意。而且此文字的重點內容在上半部,是你們如何用計謀去踐踏v小姐的自尊心。」


Sharon於fb向Rocky道歉,但就用「該人士」,顯得唔係咁順氣咁,就同阿佳喺FB唇槍舌劍。


「有人請你食飯,你望住佢個樣,都要食得落至得o架!」


「但係就始終佢可能塊面上面就…即係比較多岩巉嘅月球表面位啦。」


呢個節目媒味甚濃,唔係明星嘅Sharon,都公開搲贊助。


網民話:「人哋Rocky冇諗過請你食飯喎!」