不滿被屈基鴨賣淫 白健恩嚎哭:有人出賣我

港男出身的白健恩(小白),早前被雜誌指透過中間人涉基鴨賣淫,更指其在天水圍酒店外斷正時,嚇到狂奔逃走,事件震驚娛樂圈。上周五小白在經理人Tiffany陪同下,接受本報獨家專訪,聲稱當晚相約很久不見的朋友見面,此人叫Tommy,3年前大家在酒吧搭訕認識,一直靠facebook聯繫,偶然也會約出來飲嘢。可惜事後這朋友如人間蒸發一樣,電話和facebook都取消了,完全失去聯絡,連對質的機會都無。但他沒有怪任何人,只怪自己蠢、太易相信人,更聲淚俱下坦承:「我絕對有好大責任!」他表示俾人呃得咁徹底都是第一次,所以會吸取教訓,望大家畀次機會。

記:當晚你去到天水圍發生咗咩事?

白:我去到天水圍等咗10至15分鐘,個朋友都無出現,打畀佢又無聽電話。突然有4個男人衝出嚟,我嗰刻以為係打劫,因為有個人好似攞住啲嘢想「隊」喺我面前,我咪走囉,萬一佢揸住把刀,我會死㗎嘛!

記:你之後聯絡唔到呢個朋友,電話同facebook都冇咗,其實點識?你同呢個朋友有無錢銀瓜葛?

白:佢叫Tommy,我哋3年前喺酒吧識,佢有「爭」我錢,佢做Sales,之前佢經濟唔好,話生活上要應急,問我可唔可以借錢畀佢用住先,有錢會還番畀我,所以佢有我個戶口號碼,但都係借咗千幾蚊畀佢。

記:呢位朋友係咪同性戀者?佢有冇追求你嘅意圖?

白:佢係同性戀者,但唔覺得佢有意圖喎!大家係好平常嘅朋友關係!

記:你點睇同性戀者?

白:我唔想label佢哋,佢哋揀嘅只係同一般正常男女唔同嘅生活方式,我自己身邊都有同性戀嘅朋友,佢哋同一個正常人無分別,要工作、要食飯、要瞓覺。

記:o依家有無拍拖?以前拍過幾多次拖?

白:入咗行都無拍拖,始終我想focus喺事業上。之前拍過三次拖,但選香港先生之前分咗手,原因都係性格不合。

記:覺得自己係咪好易相信人?有無人話過你蠢?

白:其實我真係比較儍或者蠢,其實父母、朋友,甚至經理人都話過我,好聽啲就單純,唔好聽就戇居。(有無例子?)好似朋友話好窮,請食飯,咁好喇,請啦!

記:你覺得今次呢件事處理成點?

白:(開始哭)我唔想將所有責任推晒喺傳媒同朋友度,我自己都絕對有好大責任,我知我講嘢唔好,好多時會令人誤解咗我嘅意思,甚至乎令件事愈講愈衰,但我都唔想。

記:TVB有無為呢件事搵你傾過?驚唔驚無得撈?

白:當然擔心,其實經理人喺事發後即刻打畀TVB解釋,嗰邊話相信我一定無做過,知道嗰本雜誌係咁,已經封殺咗佢哋,所以唔會理佢哋咁多嘢。

記:其實你嘅經濟係點?

白:OK,今年年頭接咗好多工作,之後又有電影傾成咗,今個禮拜拍,角色唔係好重戲份做主角,但我未拍過電影,我自己都好期待、好開心,會做好佢。

記:每個月嘅收入算唔算穩定?

白:唔穩定,坦白講手停口停,有戲拍、有廣告,收入會多啲,所以平時無嘢拍時,我會教跳舞,(原來都有副業?)我以前教咗好耐,o依家好少教,但有啲教開嘅學生想我繼續教,所以佢哋租啲dance studio叫我去教,主要係教爵士舞同現代舞,平均一個禮拜一、兩堂,大約賺到幾千蚊左右。

記:發生呢件事後,自己點面對?有無聽到啲好難聽嘅說話?

白:樂觀啲去面對,好多人都教我一笑置之,假嘅嘢始終都係假,同埋娛樂圈嘅新聞每個禮拜都有,可能一個禮拜後啲人又唔記得,但我每次睇到個message會提醒自己係一個教訓。而最難接受係啲人講你值5萬5,我哋都嚟組團咯,講到係人都可以做。

撰文:李佩儀 攝影:畢紹基 協力:杜淑霞

髮型:Jacky Au @ Hair Corner 服裝:Tom Tailor 場地提供:喜記蟹將軍

白健恩被問到自己的處理手法時,終忍不住流下男兒淚。
白健恩被問到自己的處理手法時,終忍不住流下男兒淚。

原本發展不俗,但涉賣淫事件發生後,令白健恩感到前路茫茫。
原本發展不俗,但涉賣淫事件發生後,令白健恩感到前路茫茫。

月搵12萬

白健恩自演出無綫劇《法網狙擊》的賤男「邦少」強姦高海寧而為人所認識,工作也接踵而來,過去3個月除了出任廣告代言人,還出席不同的活動,加埋做舞台劇和電視劇和教跳舞,賺近40萬。

廣告代言 x 2 約$10萬

電視劇 x 4 約$5萬

舞台劇 x 2 約$3萬

活動 x 10 約$15萬

教跳舞 x 3 約$3萬

3個月共賺: 約$36萬

經理人喊住撐

為了這件事,身為白健恩經理人的Tiffany,一樣唔好受,當小白聲淚俱下時,她也喊住說:「娛樂圈一個artist如果做錯事,佢肯去改過,你都會俾機會,但白健恩根本無做錯事,而係俾人設一個陷阱,佢要去改係改佢易信人,同埋因為怕醜內向唔識同人溝通或欠缺技巧。如果佢真係有做呢啲嘢,點解唔等多陣上房捉到正,咁先可以話係斷正囉!」

演「龐世邦」回響大 白健恩望拍音樂劇電影

畢業於演藝學院的白健恩(小白),主修音樂劇(Musical Theatre) 之後曾到美國紐約進修。小白從小已喜歡跳舞,主力學習現代舞,亦有學習踢躂舞。因小白鍾情舞台劇的關係,所以亦多次參與舞台劇,而他最大的心願是有機會拍攝音樂劇形式的電影,如《孤星淚》、《如果.愛》等電影,加上小白十分欣賞容祖兒(Joey),所以他一直以來都希望與Joey合作一套音樂劇電影。 ■採訪、攝影:植毅儀

小白當初是透過參選香港先生而入行的,因他當時覺得女仔可以選香港小姐,而男仔就自不然選香港先生入行。但小白本身性格較為文靜,亦甚少說話,但是他很喜歡透過自己的舞蹈或才能去表現自己,所以每當小白在台上表演時,便會善用音樂及歌聲去感動別人。每當有小白不相熟的朋友或粉絲,看過小白在台上的演出後,都會不約而同感到小白與平時判若兩人。

「雖然我在香港先生比賽中沒有贏到任何獎項,但令我有機會簽約成為TVB的藝員,亦從中認識到經理人Tiffany。」原來當初經理人是因為他而自組經理人公司,所以小白順理成章便成為她旗下的第一位藝人,因此兩人都很有信心為未來創一番事業。本身小白非常怕羞,但每當小白知道將會飾演角色時,也會非常投入。在加入TVB這兩年時間,小白覺得自己非常幸運,因TVB一直都給予很多演出機會,曾參與多部電視劇演出,如《法網狙擊》、《愛.回家》和《怒火街頭2》等等,當中飾演醫生、警察等不同類別的角色。雖然當中的角色不算太重戲分,但都投入演出。於去年7月,高鈞賢因為受傷,未能參與演出,小白非常幸運地收到公司通知,邀請他去見監製,從而獲安排在《法網狙擊》內,飾演陳煒細佬『龐世邦』。」這次戲分十分重,並飾演一位奸角,他們擔心觀眾會否對小白定型,認為小白是衰人,不接受他。與監製見面後,他即時與經理人商量,最後大家都覺得是一個很好的機會,因為此劇與他自己本身的性格截然不同,所以是一個大挑戰,之後兩人都沒有太多憂慮,接受這角色。

想多方面發展

及後小白與經理人Tiffany都非常驚訝,因為小白在第八集《法網狙擊》播出後,雖然在首場出現並沒有對白,只在法庭內透過面部表情去演繹「龐世邦」的心情,但當晚即時有很多網民把「龐世邦」的表情轉發出來,紛紛表示究竟這位是誰?雖然沒有對白,但已經吸引到觀眾。之後在第17及18集強暴高海寧的戲分播出後,發覺原來大家都萬眾期待這場戲,除觀眾外,亦有很多媒體、客戶都安坐在電視機前欣賞。這場戲出街後,經理人的電話響個不停,不停收到傳媒朋友、客戶的電話及訊息,讚賞小白表演得很好,這些令小白與經理人感到非常鼓舞,因起初很擔心觀眾感到反感,鬧小白。「『龐世邦』的角色非常突出,令我非常開心,亦覺得今次是一個很好的機會。因為TVB甚少在拍攝完不久便播出,所以覺得所有事都來得很快。作為一位新人,在入行兩年多,雖然不算有很好的成績,但至少被人認同及得到別人賞識,觀眾亦分得非常清楚,雖然他們憎「龐世邦」,但不是憎白健恩,這一點非常難得。我始終仍然是一位新人,所以會繼續努力,未來會繼續多方面發展,並會參與很多舞台劇,演戲、唱歌、跳舞都是一項表演藝術,所以覺得可以多方面發展。」

在2月中,他參與《彩色青春A-Go-Go》演出,上次是音樂劇形式,飾演舞王「胡楓」,今次仍會飾演「胡楓」,亦會繼續唱歌跳舞,於3月此劇便會到新加坡演出。在電視方面,因在《法網狙擊》的演出,令觀眾留下深刻印象,所以他當然希望再有機會參與電視劇拍攝。小白剛剛拍攝完《師父.明白了》,飾演「阿虎」一角,是一個很奇怪的角色,經常被女仔欺負,被她們打,現在正拍攝《神槍狙擊2013》,飾演秦煌的保鑣。

派台歌獲讚賞

剛推出單曲的小白,正忙於到各大電台宣傳,此單曲是表達兩位單身的男生,在情人節沒有女朋友,應該如何度過呢?其實就想表達友誼萬歲,並鼓勵沒有拍拖的人,不用覺得孤單寂寞,因為友誼亦非常重要。這首歌派台後,很多DJ朋友或客戶亦很喜歡,覺得很清新及很有共鳴!未來日子小白最希望進軍大銀幕,拍攝電影。現正學習功夫,為進軍電影鋪路。

评论回复