69歲白姐姐再傳婚變 白韻琹fb驚爆謝偉俊狼心狗肺

現年69歲嘅白韻琹同54歲嘅立法會議員謝偉俊(Paul),自從97年喺拉斯維加斯秘婚,頻傳婚變,當年更曾有報道話,兩人嘅婚姻,只係「風水婚姻」,有名無實。婚後白姐姐亦不止一次爆料,話同阿Paul呢咁多年來,從未接過吻,仲話要「食自己」,即係有愛冇性,惹來全城嘩然。

兩人傳出離婚,都唔係近日嘅事。09年阿Paul被揭同一個後生過白姐姐一大截嘅「青島張茆」互發挑情電郵,白姐姐即自導自演分手鬧劇,令未有機會孔雀開屏嘅謝偉俊極速縮沙。事後白姐姐重提阿Paul嘅感情缺失,佢哈哈兩聲之後話:「再勁啲都仲有。」

白姐姐對Paul「無限包容」,但兩人多年來一直「關係不變」,有指一來係因為傳聞中嘅「風水婚姻」,二來係因為白姐姐一直都係阿Paul嘅投資揸弗人,單係09年,兩人喺香港就持有17個物業,海外亦有11個之多,估計單係資產已過億,白姐姐都話:「佢(阿Paul)唔係一個作決定嘅人,如果由佢話事,可能一個物業都冇。」早前Paul又同白姐姐早前抽中咗買The Austin兩個單位,總值約1800 萬,打算用嚟收租,白姐姐仲到場揀樓。

今早白姐姐白韻琹於fb突然更新status、寫道:「殘酷無情的你,只顧自己的快樂和享受,你有當我是有血有肉有感覺的人嗎?」更謂:「你當我垃圾,你太沒良心……我痛恨自己相信一個狼心狗肺……」及後白姐姐就刪除呢個po,解釋謂上述只是一封信件,係佢跟進緊一位求助人所提供嘅資料。白姐姐仲解釋謂因為佢唔太熟悉手機上fb功能,令當事人信件公開咗。

但其實,白姐姐今早係咪真係唔小心?事關佢曾經將一張寫住謝偉俊個名、疑似香港九龍匯翔道8號The Austin買賣嘅購樓意願登記收據貼咗上fb。收據顯示,呢個「謝偉俊」購入The Austin兩個物業,每個單位先付30萬作購樓意外登記。白姐姐無厘頭上載咗呢張相做fb嘅封面圖片,唔通又係唔小心?

大家都玩過fb,都知道上載fb相片做封面相唔係話「唔小心」就up到;而且,之前都有報道,話白姐姐同謝偉俊因為買唔到「天璽」,最後「轉攻」The Austin,仲抽中咗兩個單位,總值約1800萬,白姐姐都有去睇樓,何以呢張白姐姐展示嘅The Austin購樓意願登記收據,得謝偉俊個名?而白姐姐點解又po出嚟?

仲有喎,白姐姐26號仲同阿Paul出席萬聖節活動,白姐姐都有上載呢輯相,但翌日又上載一張,佢上月16號坐巴士時發生意外入院嘅相,並於fb帖文:「人傷不及心傷」,似乎婚變傳聞,唔係空穴來風。

69歲白韻琹fb驚爆:我痛恨自己相信一個狼心狗肺…


白姐姐今早上載咗右圖為fb的封面圖片,圖中疑似為The Austin兩個物業之購樓意願登記收據。
白韻琹謝偉俊
上月底,白姐姐都有去睇The Austin,有指佢同謝偉俊購入兩個單位。
白韻琹謝偉俊
白姐姐同謝偉俊上月26日仲一齊出席萬聖節活動。
白韻琹謝偉俊
白姐姐自貼呢張巴士意外入院相,寫道:「人傷不及心傷」。但呢張相已經剷咗了。
白韻琹謝偉俊
白姐姐曾爆謝偉俊從未吻過她。
白韻琹謝偉俊
白姐姐2001年出獄,謝偉俊一直陪同在側,予以最大支持。
69歲白韻琹54歲謝偉俊再傳婚變
清純而充滿書卷味的白姐姐。
69歲白韻琹54歲謝偉俊再傳婚變
sex appeal