「Barbie姐」自大狂「大隻GiGi」是非精

「Barbie姐」自大狂「大隻GiGi」是非精

「Barbie姐」自大狂「大隻GiGi」是非精

今屆港姐花邊新聞多多,昨日又有佳麗大爆泳衣面試內幕,指大熱的「Barbie姐」公主病發,講明選美是為買車買樓,又鍾意被人讚似李嘉欣;而「大隻GiGi」則被踢爆愛四圍講是非!

新一屆港姐入圍名單雖然仍未揭盅,但爆料停不了,昨日又有一位成功進入第二輪面試的暱名佳麗爆大鑊,指有佳麗在泳衣面試時態度囂張,矛頭直指近日的風頭躉「Barbie姐」,她說:「佢面試完之後同成班女仔好好傾,不停講自己嘢,話一定要攞冠軍,仲話自己要攞晒啲獎金、獎品,又話要買樓買車……圍內班女仔都讚佢靚,有人話佢似李嘉欣同張栢芝,佢唔單止受落,仲笑晒口話鍾意人讚佢似李嘉欣多啲喎!」其實「Barbie姐」在首輪面試時已十分寸嘴,揚言「奪冠」後才肯講名字,今趟再被爆公主病發,如能成功入圍,定必引爆連串是非!

樂易玲窒「菲版謝婷婷」

每年港姐面試,佳麗都要過五關、斬六將,除要穿泳衣見評判外,與評判「閒聊」亦令她們膽戰心驚,爆料佳麗說:「『Sweet鍾麗淇』皮膚太黑,畀樂小姐(樂易玲)問佢係曬定係天生?佢答話係自己曬黑,樂小姐即時頭擰擰話:『你曬到啲比堅尼印出晒嚟嘞!』」搞到佳麗好冇癮!」至於畢業於紐約大學的多媒體廣播系碩士生「菲版謝婷婷」JuJu見評判時大晒英文,即被樂小姐反問:「你究竟識唔識中文o架?」

GiGi愛充有錢女

除了面試內幕,昨日繼續有讀者爆料指曾參加去年「美酒天使大賽」的「大隻GiGi」 GiGi Yan,在為期一個月的活動內不停講是非,失落冠軍後又四圍唱衰其他人,並指GiGi最鍾意充有錢女,又有意借Rosemary名氣過橋,Rosemary只曾擔任《美》評判,絕非其師姐。記者向GiGi求證,她在電話中驚青的說:「我未入圍,同TVB簽咗嘢,呢啲是非,都要問清楚TVB先知可唔可以講。」而Rosemary則表示不認識GiGi。

決賽慳皮棄紅館

今屆港姐決賽暫定七月三十一日舉行,無綫為貫徹老闆娘方逸華的「慳皮」方針,將取消過往港姐決賽多在紅館舉行的慣例,改為在方逸華旗下的將軍澳邵氏影城舉行,所謂的「租場費用」,便可「左袋入右袋」!無綫近年做大騷常為減低製作成本而傷腦筋,以往港姐騷分準決賽和決賽,以及安排佳麗參選之過程,隨着方逸華掌管無綫後,其「慳皮」方針將製作模式「去蕪存菁」,自去年起港姐騷只得十二名佳麗在決賽中爭后冠。

去年港姐決賽一如以往在紅館舉行,可惜今年此情不再!
去年港姐決賽一如以往在紅館舉行,可惜今年此情不再!(資料圖片)

泳裝面試被偷拍無綫追究到底

對於昨日有雜誌刊登應屆候選港姐泳裝面試場面偷拍相,無綫外事部副總監曾醒明表示未有看有關報道,但據他所知,港姐評審過程全由內部進行,場內工作人員亦有所規限,清一色是女性,絕無閒雜人等,他說:「要確認啲相喺邊個角度偷影,了解整件事過程,如果係不合法偷影,事態嚴重,對一班女仔亦好唔尊重,公司定會正視今次事件。」

Tianna坦言面試壓力很大
Tianna坦言面試壓力很大。(資料圖片)

此外,面試佳麗之一的Tianna表示,面試預了穿比堅尼見評判,對於被偷拍也感到有壓力,皆因面試後被「狗仔隊」追到寓所樓下,她覺得面試要面對很多壓力。而另一位佳麗Suyen不知被偷拍面試過程,她透露面試場地尚算隱蔽,當換上泳裝後一直披上外衣等候,期間亦沒有男士經過。

曾醒明
曾醒明揚言無綫會正視偷拍事件。(資料圖片)

港姐寸寸貢

港姐不僅靠美貌上位,更具備寸嘴智慧,歷來有不少港姐都靠寸爆搶鏡!

徐子珊

04年港姐冠軍徐子珊參選時常被指黑面,當年港姐三甲陪六叔團拜,徐子珊寸爆同屆亞軍朱慧敏攝位向六叔獻殷勤:「我唔排除佢識同老人家相處多啲,我就唔敢咁埋,怕尷尬!」

袁彌明

落選的05年港姐袁彌明及冠軍葉翠翠參選時是非不斷,袁彌明曾寸爆葉翠翠「打假波」,又寸盡不少紅星,包括在網誌暗寸鄧麗欣學歷低,不配做「才女」。

張舒雅

張舒雅08年參選港姐期間,公然煲煙及啜爆「補習天王」男友David Chiu,當選冠軍後,她更多次Hea爆甩底活動,無綫稱她帶病退選華姐,她卻反寸無綫:「公司話我有病,但我冇病,只係疲勞過度。」

熱捧Suyen入三甲

網民對今屆入圍港姐議論紛紛,雖然認為港姐質素普遍下降,但仍對部分佳麗讚不絕口,最被網友看好的分別是「Barbie姐」、「密實湯唯」及「透墊OL」Jelly Girls成員張莉莎(Suyen),她們堪稱網上票選三甲,至於網民的眼光是否準確,則要留待決賽當日再作分曉。