伍姑娘伍詠薇近期心情興奮，因有份擔演的《金枝慾孽（貳）》將於22日推出。這套在04年播出時大受歡迎的話題之作，今次再推出續集能否再掀起熱潮，身為女主角當然緊張。日前伍姑娘接受本報專訪，率先透露劇情外，談到飾演的「惇太妃」是名深宮怨婦，一生活得痛苦，跟出名婚姻幸福的她成強烈對比。伍姑娘笑言若是她絕不會咁蠢做怨婦，若老公練海棠偷食必定放手讓他走。

撰文：杜淑霞　攝影：畢紹基
化妝：Jovy Yiu Make Up Forever Academy
髮型：Nicholyip@hair場地：Red Bar & Restaurant

伍姑娘坦言本身愛看《金》劇，今次終於有份演，心情相當興奮，「我不嬲都係阿戚（戚其義）粉絲嚟，佢早期做電影我已經有留意佢，但係咁多年只係合作過亞視嘅《戲王之王》，無綫得《天地男兒》同《CIB刑事情報科》，大家唔係好熟絡，今次因為係飛紙仔，終於有機會傾多啲偈，熟絡咗好多。」

慘過考會考

伍姑娘形容今次飾演的「惇太妃」，因入宮當妃子後皇上便駕崩，根本從未得到寵幸便成寡婦，怨氣極重，心腸亦變得歹毒，成為宮中的滋事份子。跟老公練海棠結婚14年的伍姑娘，一直婚姻美滿，兼且活潑開朗，她坦言要演好這個相反角色確實有難度，「我平時開劇半個月前先會做準備，但今次足足花咗兩個月構思角色，我除咗睇番第一輯外，仲睇咗好多外國宮廷戲做參考，又喺屋企練習點着住清裝鞋行路，因為知道會飛紙仔，練定行路到時就淨係顧對白就得，不過今次對白真係好難，好長兼啲字好深唔識讀，仲要飛紙仔，嗰排真係好似會考咁，晚晚係咁背，壓力真係好大。」

愛貓解抑鬱

伍姑娘坦言拍該劇是從影以來最辛苦一部，但未有像鄧萃雯般拍出個情緒病來，「我又真係唔覺得佢嗰時情緒有問題喎！可能嗰陣時個個都掛住背對白，都變得好緊張啦！而我個人比較多正能量，諗嘢好正面，從來都唔會因為太投入角色，搞到自己情緒出現問題。（返屋企見到個好老公就咩都唔記得晒？）今次就唔關佢事喎！係我見到兩隻寶貝貓啲可愛樣，就咩唔開心嘢都唔記得。」

談到老公練海棠，他就突然出現探班，還恩愛地不停偷拍老婆，現實生活中伍姑娘肯定不用做怨婦，她聽到即笑言，「我邊有咁蠢，有咩唔開心咪分開囉！（老公咁正一定好多狂蜂浪蝶啦？）如果有都好正常，代表我有眼光啫！（練海棠即加把口：我唔會畀人埋身！）如果佢真係搵到真愛，我會畀佢走唔會阻佢，相信佢一樣會咁對我。咁多年我哋都互相信任，真係做到相敬如賓，所有嘢唔會奉旨，唔會要求對方報到，主動講行蹤係唔想對方擔心，佢一直以嚟都冇做過界嘅事，老實講14年當然冇咗嗰份激情，但會變成細水長流嘅家人。」

伍姑娘認為《金枝慾孽貳》是從影以來花了最多心思的作品。

率先爆 劇情玩平行時空

據知今輯《金》劇將大玩平行時空，伍姑娘見被踢爆即說：「其實上一輯故事係我把口虛構出嚟，今輯先至係現實。」原來雯女飾演的「如妃」是伍姑娘「惇太妃」胞姊，兩人本一齊選妃，但出發前「如妃」突然病倒，「惇太妃」被選中，但老皇帝即駕崩，而「如妃」又俾繼任皇上選中為妃，「惇太妃」就一直埋怨「如妃」有心安排，故意在後宮散播種種謠言。充滿機心的乳娘湘菱（蔡少芬）借勢為他人查證真偽來謀利生財，亦順理成章成了如妃的親信，二人情同姊妹，直至戲班老倌高流斐（陳豪）及花旦雲秋玹（關禮傑）入宮演出，牽動了後宮一眾芳心，包括深閨寂寞的「惇太妃」。「如妃」為免「惇太妃」行差踏錯影響大局，想了一個萬全之策，但萬料不到竟令自己身陷「湘菱」和「流斐」一段千絲萬縷的多角關係中，「惇太妃」為向姐姐還以顏色，旁人眼中以為是個瘋子的占卜師「佟吉海」（黃德斌）成了她最強一將。