今晚《金枝慾孽貳》大結局，傳說中嘅佘詩曼(爾淳)未有出現……嚴格而言，其實係有出現過，仲係原班人馬添。
之前都講過，今集大結局係交代天理教殺入皇宮，然後蔡少芬中箭，雯女就撞暈咗，一覺醒來，如妃娘娘原來係發緊夢，身邊嘅簡慕華就由爾荷變番第一輯嘅汀蘭，陪喺如妃身邊。劇情忽然間跳接番去第一輯，又係天理教殺入宮中作亂，華貴人(黎姿)同華貴人同孫白颺葬身火海，爾淳同孔武(陳豪)、安茜(張可頤)一齊逃出宮中，雯女就留喺宮中，同皇后娘娘(陳秀珠)繼續糾纏落去。而如妃清醒之時，原來已經距天理教作亂(注意，係接番第一輯大結局嗰part)已經五年喇。
《金枝1》眾主角﹕爾淳、安茜、玉瑩同如妃娘娘，終於在《金枝貳》重逢。
令人毛管戙嘅時刻到了，耳畔響起林保怡《金枝1》嘅主題曲《兒女》，一幕又一幕《金枝1》嘅場景，如小祿子(係，係黃德斌)中毒死於雪中，福貴人(梁琤)服毒自盡，華貴人截停福貴人靈柩想留住孫白颺等等等等，一一湧現眼前。唔少網民見到呢部份都大嗌好感動，亦有人問﹕「咁其實係咪1同2有關o架，其實第2集講乜我真係完全唔知。」、「睇到呢度，點解我都係仲未明大結局夠竟講咩。」、「時空錯亂…」、「古裝版潛行凶間」。
更多人贊同嘅，可能係呢句﹕「兩套嘢(《金枝1》同2)根本冇得比，咁啱同名啫。」
只不過，今集戚其義同周旭明就透過如妃把口，講番對安茜、爾淳、華貴人嘅命運同感慨，亦見深情。
如妃娘娘話﹕「如果人世間真係有所謂因果，娘娘頭風症反覆難治，就係天意，而我鈕祜祿如玥留喺紅牆中，就是命定。孫白颺同華貴人火海中生死與共，令人愁傷，但亦令人欣羨；畢竟能在凡塵中覓得知心
，唔理結果係白頭到老，定係只能同生共死，都唔係尋常你我可以輕易領受嘅一種福份。就算血脈親倫，緣厚緣薄，亦各有命定，更何況係男女間嘅一份情。本宮既無所得在先，又何來有所追悔。」
「天下間本來就係憾事處處，不過亦因為美滿難求，人世至可以時刻有所祈盼，正如我祈盼淳貴人(佘詩曼)並未身死於動亂當中，或者佢早已換過另一段人生，平淡安穩；而安茜(張可頤)雖然當日踏上嘅係一片茫茫前路，但總算唔係孤身獨行，咁，就已經足夠。」
只可惜，結局唔係咁就算，而係如妃由夢中夢醒番，其人仍身處《金枝貳》時空中，天理教繼續喺宮中殺人放火，最後蔡少芬中箭身亡；平亂後，陳豪同龔嘉欣(木都兒)離開京城，雯女同伍姑娘就喺宮中放風箏，風箏隨風飄走，遙遙飄到陳豪同龔嘉欣嘅馬車後，好似跟住二人一齊遠走。雯女仲代已死嘅蔡少芬寫信俾陳豪，話佢以後會留在宮中度餘生。臨尾拍攝馬車嘅影子，似係回應緊第一輯陳豪同佘詩曼、張可頤坐馬車逃出宮嗰幕一樣，但又講唔下平衡空間，難怪睇到唔少觀眾一舊雲大嗌唔明。
湘菱中箭
咁就死咗了…
如妃混亂中撞親個頭，暈咗。
然後鏡頭一轉，如妃發咗個夢中夢。
爾荷變番《金枝1》嘅汀蘭。
如妃娘娘承接《金枝1》結局，留在宮中同皇后娘娘繼續宮鬥。
如妃一邊同汀蘭講爾淳、安茜等人之命運，鏡頭一邊播番《金枝1》畫面。
小祿子…黃德斌
雪中，小祿子在安茜懷中離世。
安茜同孔武呢一幕雪中足印，大家應不會忘記吧？
華貴人
福貴人服毒自盡
爾淳…佘詩曼
心死嘅孫白颺
天理教作亂，如妃催促孔武帶安茜同爾淳逃離宮外。
最後孫白颺葬身火海，留下半隻指環，由神鴉送番去等緊佢嘅父親陳鴻烈。
《金枝貳》結局。
《金枝1》結局。
逃出宮中的風箏，會是湘菱嗎？