李璧琦（Becky）傳奇並不是星夢，是實在的。6歲被迫學琴，17歲考獲英國皇家音樂學院八級鋼琴資格，18歲考取英國皇家音樂學院八級聲樂資格，19歲升讀浸大音樂系，考取「Ms Brother Cassian Scholarship」及「Ms Barbara Fei Vocal Scholarship」。

沙紙一堆、比賽N次、學生過百，34歲的李璧琦在《星夢傳奇》一曲《Think of me》超晒班，後來卻因一粒高音而落敗。輸了比賽，贏盡了愛。其實，李璧琦根本未輸過。

撰文：楊潔雯

■李璧琦擁有一大堆音樂沙紙，但竟然於《星夢傳奇》出局，令不少人跌眼鏡。攝影：黃偉雄

李璧琦在《星夢傳奇》出局了，不是輸給別人，是輸給自己。

活在莫扎特、舒伯特、舒曼的古典音樂世界，有專業資格，又為人師表，也許34歲的李璧琦身上背負着太多太多，壓力太沉重了，比賽前她緊握拳頭說：「比賽我都係好緊張，第一次好緊張，我唔識得組織自己情緒，感覺好似集中唔到咁，個人好散。」賽果是令人惋惜，但這只是part of life，她的唱歌夢不會就此完結。

Becky跟筆者說，她自小愛上唱歌，那怕母親反對拒絕資助，Becky仍然堅持：「由中二開始每年都參加校際唱歌比賽，屋企支持我學琴，6歲開始要我學琴，但係我就好唔鍾意練琴，成日同阿媽嗌交，佢話我考到八級鋼琴，讀唔成書，都可以教琴搵食。叫佢畀我學唱歌，又話唔可以，佢覺得我學唱歌，係唔會得到實際嘅嘢，後來我發覺皇家音樂學院，係可以考vocal，於是我一讀完鋼琴八級，將幫人補習賺到嘅錢，即刻去考八級vocal，其實真係唔易！不過我好鍾意唱歌，所以我好想完成。」

■憑一曲《Think of me》技驚四座，正當大家以為李璧琦是冠軍大熱，誰知她竟極速出局。資料圖片

■無綫炮製的《星夢傳奇》，可算是近期最具話題的比賽節目。資料圖片

教阿叔唱歌

為了唱歌，Becky曾經做過暴風少女，她說：「早出晚歸，唔同人講嘢，諗住考外國大學，讀音樂，最後考到屋企人都唔肯畀我去，我就更加失望，嗰時同媽咪關係更加差，因為佢唔支持我嘅夢想。」Becky得不到家人支持，但她從未捨棄音樂：「讀完書出嚟做model，媽咪由好憎變到好擔心，因為佢覺得我冇一分正經嘅工，又冇穩定收入，嗰時我亦堅持繼續唱歌，我去唱吓wedding，同band一齊去唱，跟包以正一齊去馬來西亞表演，唱一啲好藝術、好新派嘅歌，有少少Jazz，加入新嘅arrangement，聽落去大家未必接受到嗰啲，所以阿媽好擔心。」

生活逼人，金錢引誘，Becky一度跟音樂距離越來越遠，她說：「做model嗰段時間，因為我係freelance，我做過好多嘢，拍廣告、影相，可以搵多啲，所以做少咗音樂。後來發覺我唔想完全唔掂音樂，我就開始教學生，我可以繼續接觸，嗰時係孖住琴行掛單，後來去到07年開始教大班，喺上海總會教auntie同uncle，佢哋全部退咗休，係另外一個挑戰，因為你要做舊歌，鄧麗君、崔萍，甚至50年代英文歌，又要學習同佢哋相處。」

■李璧琦除了唱得，還深懂娛樂圈生存之道，故不介意大晒天賦身材。
資料圖片

■為踏上音樂之路，李璧琦甚至不惜賠上跟家人的關係，足證她有多熱愛音樂。

錯過又如何

Becky為了跟音樂保持緊密關係，除了教音樂，也做過不少幕後製作，她說：「後來有唱廣告歌同電影主題曲，唱過Sony、可口可樂、麥當勞，嗰時陳奕迅唱嗰首主題曲喺電視播，喺麥當勞餐廳入面播嗰個版本就係我唱，係有少少rap rap哋，我又唱過電影主題曲，《偷吻》入面有隻法文歌就係我唱，仲有《後備甜心》主題曲又係我唱。」

有經驗又有學歷，接二連三贏得歌唱比賽，卻無奈地讓機會一次又一次溜走，今日李璧琦無怨無悔：「如果嗰時簽咗，又冇得讀大學，咁我都有諗過唔值呢樣嘢，但係我問我自己，喺我嗰啲人生經驗入面，把握到其中一個，今日我會唔會係咁？我又識咗咁多嘢，我冇咁樣行法嘅話，我今日可能會好驕傲呢！可能好不可一世，o依家我學識點樣做人，係重要過我達到目的，就算我得到，如果我唔開心，性格上越嚟越偏離，我寧願活得開心。」

有話兒：塞翁失馬

■多得這次出局經歷，令李璧琦感受到愛與關懷，她更希望將來有機會出碟傳福音。

成績不似預期，音樂老師顏面何存，幸好李璧琦收到不少學生的關心和慰問，在失足的道上，她感到愛和關懷，原來得比失更多，她說：「學生好支持我，auntie同uncle攬住我安慰我，有個好耐冇學嘅學生，竟然話再要跟我學唱歌，我明白教佢哋唔係因為我自己有幾勁，好似咁多個奧運選手，教練教游水，有邊個教練游得快過個選手？冇喎！咁我係咪要勁過佢哋，同埋要攞獎先可以做老師？唔係囉！」

歌手夢雖遠，但是目標仍在，她以王祖藍為目標，往着這方向進發，她說：「希望可以出一隻Christian music，聽落去好流行，可以傳遞聖經入面嘅愛，好似Sammi嗰首《上帝早已預備》個類型，又唔使放咁多聖經嘅字眼落去，唔係太hard sell，音樂又好pop，無論如何喺我人生入面，我都要做到呢樣嘢，就算去到40、50歲我都想做。祖藍係最貼近我，而又成功嘅例子，好似佢出碟有幾隻歌可以係福音歌，所以我會以祖藍為目標。」

髮型：cliff@ck.com
服裝：Deicy of Hysan Place
場地提供：Harlan’s（The ONE）

■除了拍劇、教唱歌，李璧琦還有不少主持工作，保持一定曝光率。
資料圖片

■無綫處境劇《誰家灶頭無煙火》，助李璧琦打響知名度，成功逐步入屋。劇照