《使徒行者》貝安琪DeepV誘惑林峯為千語BB 目不斜視

2014.03.25 51

劇集台

將於年中約滿無綫的林峯，近期忙於跟老拍檔佘詩曼拍攝新劇《使徒行者》，雖然可能是效力TVB最後一套劇，但依然相當落力演出卧底角色。不過向來對千語BB好到全香港人都知的他，就算幾投入角色，個心依然向住女友。日前他繼續為該劇在西貢開工，對手更換上性感誘人、穿上貼身DeepV裙的貝安琪，不過林峯表現小心，除了拍攝時有望向女方外，其餘時間目不斜視，難怪電力十足易惹緋聞的貝安琪笑言：「有BB喺度，我哋唔會傳緋聞啦！」

在《使徒行者》中，林峯飾演卧底探員，跟同是飾演卧底的佘詩曼是一對，而飾演混血美女毒犯的貝安琪，將會介入兩人之間，這天拍攝二人交易場面，貝安琪更穿上Deep V銀色連身裙，超性感登場。劇情講述兩人相約在露天茶座見面，貝安琪現身時，猶如電影《本能》內的莎朗史東，表現誘人，但卧底峯依然目不斜視，繼續企硬講數。而戲外林峯亦跟貝安琪保持距離，雖則兩人早在二○一○年的電影《抱抱俏佳人》中已認識對方，但看來有千語BB在心，峯峯已足夠，就算有女在身邊，亦不為所動。

有BB無緋聞

談到今次再飾演第三者角色，貝安琪就澄清：「其實今次角色唔係表面睇咁簡單，係個好複雜嘅角色，就係因為好有挑戰性，我先會接拍。」但問到緋聞極旺的她，怕唔怕會好似上次跟陳展鵬合作《巨輪》一樣，跟林峯傳出緋聞呢？貝安琪即搞笑說：「唔驚！有BB喺度，我哋唔會傳緋聞啦！（係咪因為同展鵬緋聞都未完，所以唔擔心呀？）我同展鵬係好朋友，拍完劇都好少聯絡啦！」

眼睛不亂

林峯坦承很喜歡今次角色，因為從影以來首次飾演卧底，「真係好多謝監製畀呢個機會我，以往成日睇呢啲角色都覺得好有發揮，一直都好恨演，今次終於試到，真係好好玩，加上今次拍檔係阿佘，大家拍過咁多套劇，已經好有默契。」至於會否是TVB最後一套劇，林峯就仍未有定案，「真係未諗住，等拍埋個劇先啦！（唔係要返去爭家產咩？）唉！呢啲得啖笑啦！」問到貝安琪表示不怕跟他傳緋聞，因有千語BB時，他就無奈說：「我哋工作還工作！（貝安琪咁性感你都唔敢喎？）唔係，冇需要啫！」

等埋位時，心中只有千語BB的林峯表現得好小心，與貝安琪保持距離。

當日貝安琪以貼身Deep V裙現身，性感誘人。

拍攝期間，林峯非常投入角色，跟貝安琪有不少眼神交流。

貝安琪拍劇當日，媽媽劉香萍全程跟到實，更為她拍照留念。

林峯常以冧招o氹女友，更經常陪她出席公開活動。