否認借黃宗澤博宣傳 林穎彤拖疑似男友掃貨

今年20歲嘅無綫女藝員林穎彤(Bella),齋講個名大家未必識,不過講到係黃宗澤(Bosco)最近嘅緋聞女友「波波B」,同埋喺無綫劇《熟男有惑》扮醜女秘書Betty嗰個,即時知係邊個。Bosco之前被傳同佢搭上,結果俾胡杏兒知道,盛怒之下嗌分手,有傳Bella周圍同人講自己係Bosco女友「波波B」,不過似乎佢係借Bosco過橋博宣傳,Bella大前日佢就同一個疑似男朋友行街食飯。

林穎彤拖男友
■星期二,林穎彤同男友喺銅鑼灣行街,個男仔仲幫佢整理秀髮(左圖)。 DV圖片

幫手拎戰利品

當日下晝3點幾,Bella同男友喺銅鑼灣行街街,佢哋有傾有講,行得好埋,睇得出好投契。佢哋喺Gap睇衫,男友仲畀好多意見,最後Bella掃咗兩大袋戰利品離開,男友就負責拎嘢,幾有風度。搭扶手電梯嘅時候,男友仲幫Bella整理秀髮,唔知係佢啲頭髮有啲嘢,定係靚得滯忍唔住摸吓呢!

林穎彤拖男友
■林穎彤同男友趁半價大掃貨,好開心喎。
DV圖片

林穎彤拖男友
■林穎彤陪男友買隱形眼鏡,仲不停畀意見。
DV圖片

林穎彤拖男友
■有情飲水飽,林穎彤同男友逼港鐵都係情趣。

之後Bella同男友搭港鐵去葵芳,Bella上咗樓放低兩袋衫,而男友就坐喺公園乖乖地等。冇幾耐,Bella急急腳落樓搵番男友,然後繼續行商場,今次到個男仔去眼鏡店配隱形眼鏡,Bella喺隔籬講唔停。行到夜晚7、8點就一齊醫肚,跟住就冇下文,飽暖思床褥,食飽就各自歸家休息喇。

否認借黃宗澤博宣傳 「波波B」:只專心工作

被拍到同疑似男朋友行街食飯掃貨。「波波B」今早喺微博貼文,佢話:「連累了朋友被拍到,真不好意思,澄清:現在只專心工作和照顧媽媽!還有,我一直沒有借任何人博宣傳,只有踏實做好本份!傳媒朋友為了工作辛苦了! 感謝大家!」

自從Bella同Bosco傳緋聞後,佢曾經喺微博抒發感受,月初佢曾寫過:「娛樂圈花邊新聞天天都有,為了增加娛樂性更瞎作我乳名的意思,但最心痛是令很多愛與支持我的人擔心!知道嗎?您們的穎彤會很堅強面對,經歷亦令我成長,衷心感恩每一位的愛。 」月中時佢又話:「眼睛放寬一點看事情,就不會以假當真。」