袁偉豪（Ben）有別於一般新人，佢受訪時唔會扮友善博好感寫佢正面啲，反而喜惡印晒上面。影相時，叫佢做吓動作扮大隻，睬你都傻，但佢自度幾款甫士，又確能凸顯個人性格喎。

Ben工作時好少笑，特別係大笑，一雙眼透出憂鬱，偏偏生成打仔格，呢種配合好矛盾，但勝在圈中少有，近期佢仲想做歌手，參加無綫的《星夢傳奇》，聲綫低沉得來有幾分滄桑味，雖然好快被叮走，但儲多「幾兩」人氣，出埠登台搵真銀綽綽有餘。

Ben承認被評判狠批有點難受，但以「苦口良藥」自我安慰：「評判係塞錢落我袋，我一定會改善，之後搵機會再表演。」他明白節目要有娛樂性，參賽者須放下自尊，虛心接受意見才有收穫。猶記07年他參選《香港先生》，中段被淘汰，卻憑復活戰環節反敗為勝，咪話唔傳奇，今次佢亦希望有翻身機會，只是個個參賽者都有料到，唔係打多兩個觔斗就突到圍。

駕車寧落後慢駛

Ben確實有險死還生的經歷，他揭起上衣，讓記者看其背脊一條疤痕，稱兒時在家不慎從後撞向一道玻璃門，一塊手掌般大的玻璃直插在他右邊身近脊骨位：「家人以為我唔死都會癱，好彩大步檻過。」自此玻璃家具和裝飾全換上塑膠，此事也令他一早懂得注意人身安全，特別是駕車時，堅持「永不夾在兩車之間」，寧願在後面慢駛。

拍戲毋須女友交代

在公路上可以落後於人，演藝圈係殺戮戰場，禮讓等於棄糊，三十二歲仲未爬上一綫位，Ben唔怕遲，只係驚被女人誤前程，早排佢被影到有女陪行街，且傳明年結婚，對此傳言，Ben一臉不悅：「我冇公開過拍拖！」提到與萬綺雯在《好心作怪》有激情戲，被問到事前需否向女友交代時說：「如果要交代，呢個人唔適合我。」

他想起該劇先跳錄激情那一段，當時與萬綺雯未相識，拍攝時有點尷尬：「我以為我好緊張，點知佢仲震過我。」Ben對演藝工作野心唔細，坦言不會甘心於幕前，其中一個志願是開製作公司，現在會趁拍劇空檔向幕後偷師。

文、攝：伊浪 服裝提供：Double Dog@Double Brother