廖碧兒（Bernice）行錯棋，去年十二月手執Hermes包包高調會富二代林忠豪後，一夜間，由入屋乖女瞬間變成拜金港女，十惡不赦人人得而諸之，反觀陳豪保持緘默便贏得一面倒掌聲。事隔大半年，Bernice終忍不住揭破舊愛真面目，聲淚俱下說：「係我信錯人，名份係男仔畀嘅，我依家搵到錢，唔使靠男人！」曾受盡委屈的Bernice細訴與陳豪的一段情。

跟佘詩曼一樣，廖碧兒約滿無綫便轉簽內地經理人，全力往內地發展掘金，說到「雙豪」（陳豪、林忠豪）關係至今仍糾纏不清，Bernice坦言「莫名奇妙」，我們先說近日公開發表「愛的宣言」的富二代林忠豪，「冇！我哋真係冇拍過拖，我哋只係好好朋友，亦感受唔到佢嘅追求。

怨無綫無人情味

坦白講，感情方面我已放低，主要是經歷了人生最大轉變，現只會更珍惜所擁有的，只想試更多新事物。」Bernice說。

說的「大轉變」是一次大手術，Bernice說她去年接拍無綫新劇《依家有喜》期間，一時大意踏空誤傷脊椎骨，導致脊椎骨第四至第五節裂開了一塊，壓住神經線，手術成功機會是五十五十，有機會癱瘓，服止痛藥捱了兩個多月，撐至《依》劇埋尾才接受腰椎顯微手術（Lumbar　Microdiscectomy）。「這是一個大手術，起碼要三至六個月先至行得番，關乎到腰骨，唔可以唔理。做完手術後，我右邊身體癱瘓，感覺好無助，無安全感，雖然有家人相伴，又全面封鎖負面消息，但我心情仍很低落，好怕以後唔可以再跳舞，好怕失去演藝發展的能力，我仲未結婚生仔，以後的人生會點呢？個心好驚，日日以淚洗面。」Bernice透露，這陣子形象插水，無綫不單沒有任何賠償，就連慰問鮮花也欠奉，零人情味讓Bernice明白現實殘酷，人終須要靠自己。

否定陳豪「筍盤論」

說到舊愛陳豪情歸陳茵媺，Bernice笑言早於08年已跟陳豪分手，故病危半癱期間，沒得到對方的關懷慰問，這麼說，陳豪豈非無情無義？Bernice斬釘截鐵說：「唔知！可能佢忙，但佢一定知道我受傷入院，因為大家係同一個經理人公司。（失望嗎？）我滿腦子問自己幾時康復？不斷為自己打氣，人哋點做我冇得強求，我只係感謝身邊關心我同尊重我的人，是家人和fans。（有嬲嗎？）我唔會放在心，發洩完就算，係我信錯人！不過算啦，要有經驗先至識了解自己，我唔識分析乜嘢係『筍盤』喎，女仔嘅名份，係要由男仔畀嘅！」。

那「成也陳豪，敗也陳豪」又點睇？讀番書的Bernice說得堅定：「歷史書原文解釋，其實係關乎嗰個人的問題，唔關我事！其實我的事業唔係由佢開展，係靠自己努力得來，我選美和拍《皆大歡喜》時未識佢。至於敗也陳豪？我家陣搵唔到錢咩？唔係新公司都唔會簽我啦，我唔使靠男人！唯一要靠的是我Daddy，佢唔會畀壓力我，我做得唔開心，可以隨時離開。」

林忠豪

否認戀林忠豪 成在Bernice 敗在陳豪

廖碧兒自小在加拿大長大，2000年參選溫哥華小姐奪魁後，01年再奪國際華裔小姐冠軍，隨後來港發展，同年演古裝版《皆大歡喜》成功入屋，廣告、片約不絕，一度成為無綫最賺錢藝人，當時她更揚言要進軍荷李活做武打女星。

04年廖碧兒跟陳豪合拍旅遊特輯撻着，隨即發展地下情，交往數年，兩人多次以情侶檔姿態出騷接Job，屬半公開關係，至08年女方闖影壇兼接拍西片，一度盛傳兩人感情告終；至去年6月又傳兩人復合，同年12月，廖碧兒被撞破跟富二代林忠豪密會。

華姐出身的廖碧兒，01年憑劇集《皆大歡喜》成功入屋。

廖碧兒與陳豪的四年地下情，去年因女方與林忠豪的緋聞而告終。 資料圖片