由黎芷珊主持嘅清談節目《最佳女主角》，明晚嘅女主角輪到梁詠琪（GiGi）。芷珊同GiGi先後戀上鄭伊健，今次訪問內容點都會講到伊健，之前芷珊已經訪問過舊愛伊健，0依家就同舊愛嘅前度傾偈，聽落又幾吸引喎。

梁詠琪被指係「好勝GiGi」，佢喺節目度解釋成件事來源，原來起因係鄭伊健開嘅玩笑，GiGi話：「我哋未正式拍拖時，有傳媒問伊健點樣形容幾位好朋友，佢話我係白羊座，白羊座嘅性格是『好勝』、『倔強』，點知呢件事好似蝴蝶效應一樣，越滾越大。事後佢有向我道歉，我亦當係一個玩笑！」

芷珊跟住「打蛇隨棍上」GiGi覺得自己係咪「好勝」？GiGi就話自己唔係「好勝」！

當年盛傳GiGi為咗好勝同面子，趁住伊健生日，通知各大傳媒，話佢會去伊健屋企，結果真係影到GiGi喺伊健屋企門口行出嚟嘅相，逼伊健公開戀情，GiGi好肯定話：「一定唔係！」

GiGi亦否認係自己介入，令伊健同邵美琪分手：「當時伊健想開始戀情嘅時候，佢話已同Maggie（邵美琪）分開。」講到最後同伊健分手，GiGi話：「嗰陣相處時間少，睇唔到大家係對方嘅終生伴侶，所以就分手。」

講完舊愛，GiGi亦提及佢同西班牙籍老公Sergio閃電情緣，GiGi話喺2011年完成演唱會後，有兩星期假期，佢喺法籍前男友Sly介紹下，識咗一個西班牙嘅女性朋友，呢個女性朋友介紹GiGi去酒吧感受西班牙文化，結果GiGi遇到呢個生命中最重要嘅男人Sergio，芷珊仲專登搵咗Sergio，喺鏡頭前同GiGi用西班牙話講「我愛你」。

梁詠琪接受黎芷珊專訪，話題當然離不開舊愛鄭伊健。

梁詠琪否認介入鄭伊健及邵美琪戀情。

梁詠琪親解好勝之謎。

當年鄭伊健現身梁詠琪個唱。（資料圖片）

黎芷珊出席活動時，有時都要訪問舊愛鄭伊健。（資料圖片）